مصر موتورز مجتمع السيارات - شهادة حق للاسبرانزا m11

صباح الفل عليكوا
دية تجربتى مع ال m11 بعد استخدام شاق 40 الف كيلو كاملين
اولا العربية

1- التكييف :
تلج بمعنى الكلمة بيوجعلى عضم الجمجة من السقيع بعد عشر دقائق بزبط مهما كانت درجة الحرارة و بيسقع العربية بسرعة كويسة

2-الباور ستيرينج :
لعبة زى عربيات الملاهى معرفش بس انا مش بحبة كدة انا اعشق الباور التقيل اللى زى الالمانى كدة بس فى البلد دية الباور الخفيف اوى هو اللى ينفع كدة

3- السماعات :
ساوند حلو و متقسم صح بس للامانة بعد سنة و شوية الكاسيت زرايرة اتغيرت بس لسة كلة شغال يعنى بمعنى رقم واحد بيجيب اتنين و اتنين بيجيب تلاتة و كدة يعنى بس كل الزراير اتشقلبت بزراير تانية بس كل حاجة ليها زرار بس

4- فرش الصالون : شيك اوى و حلو و خامتة نضيفة اوى بس عيبة انة فاتح بيتوسخ بسرعة رهيبة خصوصا انى عايش فى العربية اكل شرب نوم لعب هههههه

5- العربية لما بيبقى معمولها سرفيس بتبقى سحب طيارة و تجيب اى حاجة و تحرق و تعمل شاقلباظات مع التكييف و التحميل

6- بتستحمل تمشى من غير سرفيس مدة حلوة لانى مهمل شوية لظروفى المادية عشان لسة طالب

7- فرامل : تحفة و الابى اس شغال عسل و اللى ورا سكاكين و دية فاجرة و عمرها ما اتزحلقت منى مع انى سواقتى غشيمة جدا جرى و غرز و مواقف مميتة خدت غرزة امبارح و لاقيت واحد بيعدى الشارع عايز ارجع تانى رجعت بفرامل و عوجت زاوية جامدة اوى على سرعة 85 و سبحان الله ربنا ستر و عدلت مسارها بكل سهولة و عدت في حتة ضيقة ثبات مش بيطلع من اليابانى ذات نفسة عن تجربة انا كان معايا تويوتا 2006 و قبلها هوندا 93

8- الوسع الداخلى : افضل من عربيات كتير زى اللانوس و الفيرنا و الساجا و مش اكبر من التويوتا 2006 مثلا بس معقول جدا للى عارف التويوتا و فاهم لان انا بقول عاللى انا مجربة

9- فيها عيب متنفعش للناس القصيرة عن 160 لان كرسى السواق استحالة يشوف الكبوت او ابعاد العربية مع ان ابعادها سهلة جدا

10- منظر خارجى و داخلى صالون تحفة

11- انا عملت بيها 40 الف كيلو و كنت شاريها 18 الف كيلو : العربية ولا شخللت ولا فكت من بعضها ولا حصلها اى حاجة من الكلام الاهبل اللى الناس بتطلعة على الصينى دة و انزلوا شوفوا عربيات مستعملة عاملة عداد كبير و استهلاك شاق هتبقى عادية جدا زى اى عربية حصوصا انى كنت راكب عربيات اعلى فى الخامات و محستش بفرق خالص فى العمر الاستهلاكى
تم تغيير تيل على 32 الف كيلو مع استخدام فرامل قمة فى الاستهبال و طنابير و كانت الطنابير اصلى ب 350 محفور عليها اسبرانزا و نضيفة اصلى
و اشتريت اكصدام امامى فاضى ب 250 جنية من التوفيقية بتاريخ 10/5/2013
السيور كل 40 الف كيلو و رخيصة
الفلاتر فى الاسبرانزا يفضل كل 15 الف كيلو و حاجات تانية كل 20 الف
توكيل محترم بتاع طريق الاسكندرية كيلو 32 كان بتاع بى ام و بينجزوا بسرعة من غير حجز بس اسعارهم هبلة شوية فى المصنعية و الضرايب
بس العربية بتطلع من تحت ايديهم زى الساعة
الكهرباء بتاعتها نضيفة اوى الانوار تفرش على الارض بطريقة روعة سافرت الصيف اللى فات طريق العالمين فى الفجر كان فية شبورة فظيعة مش شايف قدامى ب 2 او 3 متر بالكتير و كانت الفوجات عاملة شغل عالى كانت العربيات متبعانى

12- : الثبات : اقسم بالله العربية دية فيها ثبات محدش يتخيلة انا مش بخاف خالص لحد ال 170 والله بتبقى تقيلة و ثابتة و فراملة مطمئنة جدا و لوحدى و بتغرز بكل سهولة والله و تحفة فعلا انا ملقتش الثبات فى العربيات اللى قلت عليها اللى كانت معايا قبلها دية بجد ثباتها فوق الوصف للثمن

13- عيوب : جاية فى رقم 13 نحس عيوب اعادة البيع بس انا استخدمتها ميزة ليا بانى اشتريتها كسر زيرو نقصت من تمنها 14 الف جنية لما كانت جديدة و كانت لسة زيرو باكياسها و تمنها عالى دلوقتى الحمدلله

14- الفامية اللى على الرخصة حكاية

15- حلمى للعربية دية تسقيط ميفيك 2400 عليها و اتوماتيك و بتتعمل بكل سهولة و من غير مشاكل مع دفع فرق 5 الاف جنية تبديل مكن و ناس عملينها و العربية اتحولت و بقت حاجة تانية و مستحملة