مصر موتورز مجتمع السيارات - السيارة الأونو

السلام عيكم ورحمة الله وبركاته
كان عندي عربية فيات أونو بدون تكييف موديل 2002 بولندي ، وفضلت معايا سنتين وبعدين بعتها وحبيت أنقل لحضراتكم التجربة كما عشتها ، للإستفادة
أولا : مميزات العربية الأونو :
1- ماتورها 1000 cc ، وده معناه إنها إقتصادية جداً في البنزين " بتشم ريحة البنزين " .
2- شكلها حلو وإنسيابي جدا ، وخظوطها الخارجية ناعمة ، وده بيديها أفضلية في عملية إختراق الهواء .
3 - سريعة وسحبها يديها أكبر من ال cc بتاعها .
4 - عائلية ومناسبة لأسرة مكونة من زوجين وطفلين .
5 - واسعة من الداخل وقاعدتها مريحة .
6 - أبعادها تقدر تلمها بعنيك وإنت جوه العربية .
7 - ماتورها سهل إنك تشوف كل جزء فيه جوه الحوض بتاعها .
8 - خفيفة الوزن - 630 كجم - و تقدر أي ست تزقها بسهولة .
9 - لوحة العدادات بتاعتها بسيطة تقدر تقراها بكل سهولة .
10 - حجمها الخارجي صغير وتقدر تركن في أي مساحة صغيرة بسهولة .
11 - فتيسها ناعم جدا جدا ونقلاتها متحسش بيها .
12 - تقفيل العربية من الداخل كويس جدا .
ثانيا : عيوب العربية الأونو :
1 - قطع غيارها غالية جدا .
2- فيه قطع غيار ليها مش موجودة جديده وتتركب مستعملة " وبختك ياأبو بخيت ".
3 - العربيه بسكوته خالص يعني حته غريبة ، شاسيها ضعيف جدا من أي خبطة إن شاالله في رصيف ولو بسيطة يتأثر الشاسيه علي طول وإستعداله مؤرف وصعب يرجع زي الأول بسهولة .
4 - شنتطها صغيره جدا ، يعني في أي سفر صعب أنها تشيل كل الشنط وتحتاج شبكة .
5 - مش بتاعة بهدلة وطرق مدغدغة وسفر في مناطق وعرة يعني عايزة طريق محترم وكويس علشان تديك أفضل آداء ليها .
6 - إعتمادها الكامل علي الكهرباء يخلي أي سلك يضرب فيها أو حتي يحصل ليه حاجة يبرجل العربية كلها وتحس إنها مش مظبوطة .
7 - في رأيي إنها تناسب الستات أكتر من الرجالة " إللي إشترت العربية بتاعتي واحدة ست كانت بتدور علي أونو ".
8 - عفشتها ضعيفة جدا مش بتاعة طرق مكسرة وتتأثر بسهولة من الطريق .
9 - واطية من الأرض ولو 3 قعدوا ورا وخدت بيها مطب تاني يوم أكيد وإن شاء الله وبدون مقاطعة بتروح علي بتاع الشكمانات يروقهالك من تحت .
مع خالص تحياتي
د / خالد ptmnlo123per154