دلوقتى انا هشترى عربية من واحد معه توكيل من المالك و هيعملى توكيل والرخصة هتخلص فى 2015 بس انا مش عايز امشى بتوكيلات عايز اروح انقل ملكية باسمى
 

دلوقتى انا هشترى عربية من واحد معه توكيل من المالك و هيعملى توكيل والرخصة هتخلص فى 2015
بس انا مش عايز امشى بتوكيلات عايز اروح انقل ملكية باسمى
ايه الى مفروض اعملوا بالترتيب لانى سمعت كلام كتير عكس بعضه
مثلا :
* ناس قلتلى اروح الشهر العقارى بالتوكيل + الرخصة واعمل عقد بيع لنفسى
* اخود العقد واطلع على المرور الاصلى بتاع العربية واعمل مطابقة بصمة و اجيب شهادة بيانات و حجة مش فاكر اسمها ايه معمل جنائى
* بعد معملت مطابقة بصمة اروح المرور الى انا ساكن تابعه واعمل نقل الملكية وهيخدوا منى الرخصة ويدونى تصريح 6 شهور لحد ما الملف يجى

هل الكلام ده صح و لو انا نقلت ملكية هل هيضيع عليا الفترة الى مترخصة فىها العربية ولا لا و هل هاخد نمر جديدة , هى اصلن فى النمر الجديدة

رد: دلوقتى انا هشترى عربية من واحد معه توكيل من المالك و هيعملى توكيل والرخصة هتخلص فى 2015 بس انا مش عايز امشى بتوكيلات عايز اروح انقل ملكية باسمى
 

السلام عليكم بص يا سيدى اولا :- بالتوكيل اللى هيعملهولك البائع هتروح تعمل عقد بيع ليك فى الشهر العقارى . ثانيا :- هتروح المرور اللى انت تابع ليه ( اللى هتنقل العربية ليه ) وتقولهم عاوز انقل ملكيه وهتجيب ملف فحص + الطفاية وهترفع بصمة الشاسية + الموتور والمهندس بتاع الفحص هيكتبلك على ضهر ورقة الفحص زى جواب كده موجه للمرور الاصلى بتاع العربية بمطابقة البصمات + الاستعلام الامنى . ثالثا :- هتروح بعد كده على المرور الاصلى بتاع العربية ( اللى مكتوب فى رخصة العربية ) وتقولهم عاوز اطابق بصمة ( طبعا هيكون معاك الملف بتاع الفحص اللى اتكتبلك عليه الجواب) هيقوموا هناك باحضار الملف ومطابقة البصمات من خلاله والتاشير بالمطابقة من عدمه (احتياطى خد العربية معاك ) وبعدين وانت هناك هتقولهم عاوز اعمل استعلام امنى (يعنى تعرف العربية لو متبلغ عنها بالسرقة او حاجة مشبوهة ) وهتروح لبتاع الكمبيوتر وهيأشرلك بان العربية غير مطلوبة جنائيا ويختم ( اهم حاجة ختم النسر على كل حاجة ). وبكده هتكون علاقتك بالمرور ده اتقطعت خلاص. رابعا :- هترجع على المرور بتاعك بالورق كله وهتقوم داخل على مهندس الفحص بورقة المطابقة هيأشرلك عليها وبعدين تختم من الظابط وبعدين تروح على الشباك بتاع التجديد ونقل الملكية وتقدم الملف ( ومتنساش التامين الاجبارى قبل ماتقدم الملف ) وهما هيقدروا الرسوم وهيدوك اذن دفع وتدفع للخزنة وبعدين هترجع بالايصال وتسلمه للموظف اللى معاه الملف بتاعك وتستريح . خامسا :- لو بتنقل من محافظة لمحافظة يبقى هتاخد لوحات جديدة وتسلم القديمة ولو نفس المحافظة متهيالى هتفضل هى هى النمر ( بس تاخد بالك لان فى رسوم لوحات بتتقدر مع التقدير الاجمالى عشان تدفعه فى الخزنة ). سادسا :- هتستلم الرخصة على خيرة الله واتاكد من كل البيانات المكتوبة فى الرخصة قبل ماتمشى بارقام الشاسية والموتور واسمك والتواريخ . بالنسبة لموضوع النمر متهيالى انك مش هتغيرها الا لو بتنقل من محافظة لمحافظة حتى ولو كانت جديدة ( يعنى مابين القاهرة والجيزة مثلا )لازم هتتغير . واكيد طالما هتنقل ملكية يبقى لو الرخصة لسه فيها يبقى هتروح عليك المدة . انا لسه عامل الكلام ده من اسبوع عشان كده تقريبا فاكر كل حاجة (يارب اكون منسيتش حاجة ). متهيالى طالما العربية فيها توكيلين يبقى زيادة فى الامن انقل على طول ومش مشكلة المدة الباقية فى الرخصة . ارجو ان اكون قد افدتك .

رد: دلوقتى انا هشترى عربية من واحد معه توكيل من المالك و هيعملى توكيل والرخصة هتخلص فى 2015 بس انا مش عايز امشى بتوكيلات عايز اروح انقل ملكية باسمى
 

طب استفسار
*الاستعلام الامنى ده بعملوا فى المرور بتاعى و المرور القديم بتاع العربية
و لو طلع لقدر الله ان العربية متبلغ انها مسروقة هيحصل ايه
*يعنى انا لو نقلت ملكية دلوقتى المدة الى فى الرخصة هضيع عليا

رد: دلوقتى انا هشترى عربية من واحد معه توكيل من المالك و هيعملى توكيل والرخصة هتخلص فى 2015 بس انا مش عايز امشى بتوكيلات عايز اروح انقل ملكية باسمى
 

كلام الاخ مودى كله سليم
وانا لسه عامل المشوار ده من يومين
وللتاكيد النمر مابتتغيرش لو نفس المحافظه
وبالنسبة للاستعلام الامنى بتعمله من المرور القديم اللى العربيه تبعه
ولو لقدر الله طلعت متبلغ عنها معرفش ا ايه اللى ممكن يحصل
لان انا عربيتى الحمدلله طلعت سليمه
ومتنساش تجيب من المرور القديم مع المطابقه والاستعلام الامنى شهادة مخالفات
ومشهم شهادة بيانات طالما الرخصه ساريه
ارجو ان اكون افدتك
وربما يعينك ع المشوار ده
انا خد منى اربع ايام

رد: دلوقتى انا هشترى عربية من واحد معه توكيل من المالك و هيعملى توكيل والرخصة هتخلص فى 2015 بس انا مش عايز امشى بتوكيلات عايز اروح انقل ملكية باسمى
 

الاستعلام الامنى من المرور القديم بتاع العربية
ولو العربية مسروقة اكيد هيحجزوا عليها ولمن المسئولية الجنائية هتكون على اللى بايعلك العربية لان انت معاك مستند انك لسه شاريها وبتنقل باسمك ( راى شخصى ).
لو نقلت العربية باسمك الرخصة القديمة بح والمدة بتاعتها بحين وهيتعملك رخصة جديدة حسب ماهترخص.