مصر موتورز مجتمع السيارات - الفتيس وعلاقته بالسرعة والأداء.

كتير مننا فاكر أن الموتور هو أهم حاجة فى العربية وأن الموتور هو اللى بيدى للعربية سرعته وقوتها لكن العربية نظام كامل كل حاجة فيها من أول الموتور لحد العجل بتساهم فى أداء العربية.
وكلمة اليوم هى الفتيس, والفتيس يارجالة هو اللى بيخليك تسفيد من كل القوة اللى بيطلعها الموتور وهو اللى بيربط حركة العجل بالموتور.
http://www.bestwesterntransmissions....ansmission.jpg
بدون شرح علمى كبير فى الفتيس والدبرياج, الفتيس بكل بساطة هو مجموعة من التروس, التروس دى بقى شغلتها كالتالى:-
كلنا عارفين أن الموتور بيطلع عدد معين من اللفات, 3000 ,4000 حسب ضغطك على دواسة البنزين, فلنفترض أن الموتور مرتبط بالعجل من غير فتيس وأنت دوست بنزين, العربية هتبرجل وتبدأ تطلع على أقل من مهلها, كأنك بتطلع بالعربية وأنت مديها الرابع(الترس الرابع مساوى لترس الموتور تماما فى معظم العربيات) وغير كده لا فتيس يعنى لا دبرياج, ومش هتقدر تقف بالعربية من غير متبطل الموتور لأنك مش هتعرف تفصل الموتور عن العجل, فلما العجل يقف الموتور هيحصله.

الفتيس بيشتغل كالتالى, الموتور بيطلع مثلا 1000 لفة وبيطلعهم من خلال ترس حجمه 1 , الأول فى الفتيس عبارة عن ترس حجمه 2 كده ترس الموتور لما ييجى يدور الترس ده هيخليه يلف بسرعة 500 مش 1000 علشان الترس الأول أكبر من ترس الموتور بالنص وده بالتالى هيدى عزم قوى وقدرة للعربية على أنها تحرك من وضع الوقوف أسرع.
ده بقى فايدته أن العربية يبقى فيها تروس لكل المواقف, الترس الأول بيديك أكبر عزم للموتور علشان تقدر تتحرك بالعربية على عكس الخامس اللى بيديك أكبر قدرة حصانية تخليك تحتفظ بالسرعة بتاعتك.
http://www.motivegear.com/MotiveWeb/...ion/Group2.jpg
والموضوع نسب, يعنى نسبة ترس الموتور الى الترس الموجود بالفتيس, ومن خلال معرفة عدد لفات الموتور تقدر تعرف الترس بيخرج كام لفة.

علاقة ده بالأداء هى الأتى, لو أنا عندى فتيس نسب تروسه كبيره وقريبة من بعض هيدينى عزم كبير وبالتالى تسارع رهيب, بس فى المقابل السرعة القصوى هتقل من 200 الى 150 ونفس الحكاية لو عندى عربية نسب تروسها صغيرة العزم هيقل والعربية هتبقة بطيئة جدا بس سرعتها القصوى هتعلى بس هتاخد وقت طويل علشان توصلها.
http://kereta.info/wp-content/upload...-3-500x375.jpg
لاحظوا الفرق بين الترس الأول وترس الموتور اللى تحته والترس الخامس واللى تحته( الصف اللى فوق تروس الفتيس والتانى الموتور)
الكلام ده بيطبق فى السباقات, لو التراك مليان منحنيات بيستخدموا فتيس نسبه كبيرة وقريبة من بعض علشان التسارع مطلوب بعد الفرملة والسرعة القصوى متهمش, على العكس لو التراك فيه مساحات طويله بيستخدموا فتيس يدى تسارع كويس وفى نفس الوقت سرعة قصوى جيدة.

الناس اللى بتسقط مواتير فيه ناس بتجيب الموتور بفتيسه وناس لأ, اللى بيجيب الفتيس مع الموتور بياخد سرعة قصوى عالية وتسارع العربية الأصلية (اللى كان فيها الموتور), اللى بيسيب فتيس الموتور القديم الضعيف بياخد تسارع أقوى وسرعة قصوى أقل علشان الفتيس القدم نسب تروسه كبيرة بالنسبة للفتيس الثانى.

ولو تلاحظوا العربيات الأمريكية القديمة موتورها قوى جدا بس الفتيس 3 أو 4 سرعات, وده بيسبب أن العربية متستفيدش بقوتها وممكن عربية يابانى فيها فتيس 5 سرعات تسبقها بعد 150 مثلا.

وبرضه مينفعش كتر التروس وخلاص وألا هتبقى ماشى من 0-20 نقلة ومن20-50 نقلة ومن50-80 نقلة ومن 80-100 نقلة وهكذا حتى 200 .
وأفضل مثال هو الموتوسيكل موتوره مش قوى بس فتيسه فيه من 8 الى 15 نقلة وده بيخليه يستفيد من الموتور فى التسارع والسرعة القصوى الى أقصى حد.

العبرة من الموضوع فى مصر هى التالى, لو هتسقط موتور شوف لو عايز تسارع قوى والسرعة القصوى متهمكش(بعد 170 العربية هتموت) يبقى خليك مع الفتيس القديم أنما لو عايز سرعة قصوى لفوق 200 خد فتيس الموتور معاك وممكن تجيب فتيس عربية موتورها أقل من عربيتك وتركبه هيخلى العربية صاروخ بس هتضحى بالسرعة القصوى..
طبعا الأرقام اللى فى الفقرة اللى فوق دى مثال بس هو ده اللى هيحصل.

ملاحظة: كل ما النسب كانت كبيرة كل ماعدد نقلاتك هيزيد يعنى بدل ماكنت بتنقل الأول عند50 هتنقل عند 30 بس العربية هتوصل لل30 فى ثانية يعنى عند 150 مثلا هتكون خلصت نقلاتك بس هتبقى وصلت ل 150 فى 9 ثوانى.
ولو حد عنده أستفسارفى الأسس الميكانيكية يقولى أنما فى أنواع الفتيس فى مصر أنا جاهل فيها:)
أنا حبيت أفكركوا بأهمية الفتيس للعربية, ولو حد عايز يعرف أكثر ده شرح عنجليزى مع الصور والتوضيحhttp://auto.howstuffworks.com/transmission.htm
اللى أنا قلته ده شرح مبسط, الفتيس معقد علشان كده الناس بتبدله وقليل اللى بيصلحه.