لاقدر ربنا يكفينا جميعا شر الحوادث كلها بس مفيش حد فينا مش معرض للحوادث ويمكن مفيش حد يسوق اصلا الا وحصلتلوا حادثة سواء بسيطة او كبيرة لاقدر الله لاكن مين فينا بيعرف يتصرف صح ساعة ما الحادثة بتحصل

واحد يقولى هو الواحد فى اى ولا فى ايه ساعتها اسمحلى ده اكبر غلط لان تصرفك لو غلط بعد الحادثة ممكن تودى نفسك فى مشكلة اكبر من الحادثة فاسمحلولى بما انى خبير حوادث قديم اكتبلكوا مجموعة نصائح اعتقد ان مهم جدا نفتكرها فى حالة لاقدر الله حد اتعرض لحادثة

1- خليك شجاع
لو عملت الحدثة والحادثة دى ادت لخسائر فى ممتلكات حد او لا قدر الله فى الارواح اوعى تفكر تهرب مهما كان الموقف صعب وسواء انت غلطان او لو كنت ملكش ذنب واجه المشكلة ومتهربش لان هروبك هيكبر المشكلة اكتر وهيخليك مذنب قدام ضميرك وقدام الناس

2- اتاكد المكان امن
اتاكد انك واقف فى مكان امن ومفيش اعاقة للمرور وخاصة لو على طريق سريع كمان اتاكد ان مفيش اى تسرب للبنزين من العربيات اللى تضررت وشغل مصابيح الانتظار او استخدم المثلث الفسفورى الخاص بالتنبية

3- اتصل بالنجدة بسرعة
خاصة لو الحادثة ادت لاصابة حد لاقدر الله او مشكلة كبيرة فى الطريق لازم تتصل بالنجدة بسرعة حتى فى بعض الحالات اللى ممكن تكون متحبش تعمل بيها محضر يفضل برده انك تتصل بالنجدة علشان ممكن يكون الطرف التانى فى الحادثة انسان مش كويس ويعمل هو محضر ضدك باوصاف العربية ونمرها ولما تيجى تجدد تلاقى عليك غرامات بسبب الحادثة

4- خليك هادى
انا قولت اولا خليك شجاع فى مواجه المواقف بس مواجة المواقف بهدوء هيا قمة الشجاعة
متتسرعش فى انك تتخانق مع الطرف التانى او حتى تسمحلة يستفزك لان سواء كنت غلطان او متضرر هتضيع وقتك وتحرق دمك بدون فائدة والاهم انك كمان هتضيع حقك

5- سجل كل حاجة
استخدم ورقة وقلم اكتب على الموبيل صور بكاميرا المهم تسجل كل التفاصيل واهم حاجة رقم العربية
فى بعض الحالات مهم كمان تكتب كل التفاصيل التانية زى اسم الشارع تفاصيل شكل العربية التانية اتجاهك من فين لفين الاضرار بالظبط اللى نتجت عن الحادثة تفاصيل قائد السيارة التانية تفاصيل وملابسات الحادثة حالة الجو حالة الشارع ارقام العربيات التانية اللى شاهدت الحادثة ولو عرفت تصور الحادثة يكون افضل

واخيرا ربنا يكفينا جميعا شر الحوادث واللى عنده اضافة ياريت يفيدنا بيها

اللهم إحفظ الجميع .... الحادثة فى مصر .... و عن تجربة ..... بهدلة و قلة قيمة و دوخة على الفاضى ... و الغلطان زى اللى مش غلطان ... المهم تفتح مخك.... لكن لو معاك واسطة كله يسلك .... خارج مصر فى نظام ... لو حصل حادث لا قدر الله .... ما فيش خناقات ولا سباب .... فى ثوانى بتلاقى سيارة أو موتوسكل المرور وصل (دقيقتين على أقصى تقدير) و عاين و كتب تقرير بناء على ما شاهده مع أخذ البيانات ويطلب من الطرفين الذهاب الى قسم الحوادث لإستكمال الإجراءات فى الوقت المناسب لهما .... والتى غالبا ما تكون إجرائية لتحديد خسائر كل طرف و نسبة الخطاء لتقديمها للتأمين و إصدار ورقة الإصلاح (لكى تقوم بأى إصلاح فى أى ورشة مهما كان تافه .... لابد من ورقة مصدقة من المرور :w6w200504112236376d تخيلوا ....) يعنى فى نظام .... أما حادثة مصر .... فدى قصة طوييييييييلة و مملة ....