مصر موتورز مجتمع السيارات - تجربة قيادة سريعة لبورش كاريرا فور إس Carrera 4S

السلام عليكم يا شباب .. جايبلكم النهاردة على السريع كد تقرير و تجربة قيادة فريدة من نوعها و هى للنجمة الألمانية بورشا متمثلة فى إحدى أقوى موديلات العظيمة 911 و هى كاريرا فور إس

Carrera 4S

و قد قادتنى الظروف السعيدة ان تكون السيارة تحت تصرفى لمدة نصف يوم و قلت لازم اعمل حسابكم معايا فى التجربة الفريدة من نوعها
و أبدأ بالمواصفات الفنية للسيارة

بورش كاريرا فور إس موديل 2009
موتور خلفى 6 سلندرات متتالية
سعة المحرك 3800 سى سى
القوة الحصانية 385 حصان ألمانى
دفع رباعى مستمر
مع جير بوكس ثنائى القابض PDK و مزود بإمكانية تيبترونك
سرعة قصوى محددة إلكترونيا 300 كيلومتر فى الساعة
سبويلر متكيف مع السرعة
كراسى رياضية حاضنة للسائق و الراكب الامامى بدرجات مختلفة كهربائيا
إكزوست سيستم رياضى
جنوط 19 بوصة تيربو

طبعا بدأت التجربة فى الصباح الباكر و طبعا كنت خايف من العربية لأنى لسة مش عارف أداءها عامل ازاى و مش متعود عليها
الانطباع الاولى عن الشكل الخارجى .. تصميم رياضى بحت معمول علشان يخدم الايرو دياناميكس بشياكة متوحشة و أرداف عريضة توحى بالثقة و الثبات الخزعبلى
الانطباع الاول عن الشكل الداخلى .. طبعا منتهى الشياكة و الاناقة و جودة الخامات و الجلد الاحمر المثير بتطعيمات السموك سلفر و اللون الاسود و الابيض الداخلى .. منتهى الفخامة

و اتوكلت على الله و ركبت العربية و ظبطت الكراسى و المرايات و الذى منه .. و شغلت و إذا بصوت الوحش يزأر بقوة و مما زاد الاثارة و قوة الصوت نظام سحب العادم الرياضى المزودة به السيارة و اللى بيحسسك انك فعلا راكب صاروخ لما تضغط على دواسة البنزين و انت على وضع المور

اتوكلت على الله و طلعت بالعربية و حسيت انها متضايقة منى جدا لأنى ماشى على سرعة قليلة و مش مرتاحة و صوت الموتور عمال يعلى و يوطى طلعت على الشارع الرئيسى و

قلت مابدهاش بقى يلة .... و دوست بنزين على الاخر حسيت انى لزقت فى الكرسى و العربية ركبها عشرميت عفريت و الار بى ام جاب اخره و فى غضون ثوانى تعد على اصابع

اليد الواحدة لقيت عداد السرعة 120 .... يا نهار ابيض ايه ده طبعا ماصدقتش القوة دى لأنى فعلا اول مرة احس بيها فا هديت شوية وقلت اشوف نظام الغرز معاها ايه :)
و كانت اول غرزة وب صراحة كرهتنى فى الغرز ليه بقى ... لأنى ماحسيتش انى اتحركت من مكانى اصلا لا العربية مالت ولا اتحدفت ولا اى حاجة كل اللى حصل انى كنت فى الحارة اليمين بقيت فى الحارة اللى فى النص من غير اى تعب ولا مجهود و بعدين ظهرت عربية شرطة للأسف و لقيته بيوقف عربية موستنج .. قلت اهدى يا واد كدة و ابعد عن الشر و غنيله .... و قد كان ... و فضلت ماشى هادى شوية و كمان الزحمة زادت ... فا بقيت اشوف بقى الغرز الخفيفة و انعامل معاها و كالعادة نفس القوة و الرشاقة

و للأسف مافيش حد سخن معايا ولا شد خااالص .. و كل ما ادوس الاقى الناس بتوسع لى ... ايه يا جماعة دا هو نص يوم .. حد يسخن معايا ... مفيييش

المهم بصراحة ماحاولتش اجيب بيها سرعات عالية لأنى بردة خايف منها بصراحة و مش متعود اللهم الا مرة شديت شدة كدة كان الطريق فاضى و جابت برده 140 فى حوالى 6 ثوانى مع صوت صاروخى فظيع و مرعب

و ان شاء الله احتمال اخدها تانى قريبا و فى المرة اللى جاية بإذن الله يكون معايا اخويا و صاحبى العزيز شريف منسى لأنى افتقدته جدا فى تجربة النهاردة اللى كان يهمنى جدا اعرف انطباعاته عنها و يقارنها بعربيته البورش كايين إس أخت الكاريرا الكبيرة

المزايا و العيوب من وجهة نظرى المتواضعة ..

المزايا ...

تسارع اقل ما يصفه انه (جحيييييييم)
شياكة و فخامة غير طبيعية و خامات و تقفيل فوق الدرجة الاولى بشوية و طبعا برستيييج عاااااااالى
ثبات وهمى بالرغم من انى مازودتش عن 140 و ثبات العربيات دى يقاس بعد 250 ولا حاجة
ساوند سيستم (بوز) و يكفى الاسم
صوت صاروخى مجلجل :)
طبعا اوبشنز بقى للصبح فتحة سقف - كراسى تدفئة وتبريد - ليدات - تحكم دركسيون - سنسر - ميموري - بلوتوث - نافيجيشن -زنون - سي دي - دي في دي و حاجات تانية مالحقتش اشوفها ....

العيوب...

القعدة فى العربية غير مريحة و خصوصا من عند الرجلين (رجليا مزنوقة شوية ) و انا متعود على الرحرحة
فعلا العربية تخوف و ليس من السهل التعود عليها و تحتاج لسائق محترف
طبعا ناشفة و حاسس بالطريق و ده طبعا راجع للجنوط ال 19 و الكاوتش الرفيع جدا و يا سلام بقى لو شغلت التعليق الرياضى عييش يا برنس

و سامحونى على سرعة و كروتة التقرير و ان شاء الله اللى جى يكون مفصل أكتر

و اسيبكم مع الصور ...

http://img27.imageshack.us/img27/2458/57251077.jpg

http://img854.imageshack.us/img854/3841/37175119.jpg

http://img43.imageshack.us/img43/484/99489495.jpg

http://img830.imageshack.us/img830/7959/66639935.jpg

http://img803.imageshack.us/img803/1306/p1807111500.jpg

http://img231.imageshack.us/img231/1...0711150001.jpg

http://img824.imageshack.us/img824/7137/p1807111501.jpg

http://img543.imageshack.us/img543/8...0711150102.jpg