مشروع لادا نيفا اوف روود
 

السلام عليكم و رحمه الله و بركاته ..

دي اول مشاركه ليا هنا ف المنتدي وكنت حابب استفسر من حضراتكم عن شويه اسئله كده بما اني مش خبير و اتمني الاقي الاجابات عند المتخصصين اللي هنا ..

انا بفكر اشتري عربيه ف حدود ال 20.000 حالتها كويسه الي حد ما منها اقضي مشاويري و منها اتدرب احسن ع السواقه لاني مش بسوق علي طول و دي هتبقي العربيه الاولي و مش الاخيره اكيد باذن الله بس عقبال ما الظروف تتحسن وكده ..

بعد بحث و فحص لاقيت ان ممكن بالمبلغ دا اشتري لادا نيفا مثلا موديل "85:94" اساسها مش بطال او مش محتاجه مصاريف يعني مش هقلق من تحملها للطرق هنا و قطع غيارها المتوفره او الصنايعيه اللي فاهمينلها ..

نيجي للاسفسارات :

1) هل بالمبلغ دا الاقي نيفا نضيفه ولا لأ
2)هل ينفع اركبلها عفشه و جنوط اوف روود و تنفيخ و تعديل و الحركات دي
3)هل موتورها احسن ولا يتسقطلها موتور بتيربو وليكن 1600 او موتور ديزل
4)هل ينفع يتعمل بيها درفتات حتي لو شيلت فتيس الغرز و الكارونه
5)هل ينفع اغير التابلوه القديم بالجديد و اغير الكراسي بحاجه نضيفه
6)هل ينفع اركب كونسول بفتحه تكييف ورا و دا بعد حل مشكله الحراره و العزل
7)هل في شغل ليدات للفوانيس او ليدات معينه بتركب جوا الكابينه

احتاج فعلا لردود حضراتكم خصوصا اللي يملك النيفا .. و ياريت محدش يقولي و عليك بايه من دا كله ماتجيب كذا كذا بدلها حتي لو التعديل هيكلفني 20.000 كمان .. انا حابب اخليها مشروع للنيفا يتحكي بيه .. مش بقول هعمل دا كله ف يوم و ليله ولا ف سنه حتي بس انا عشقي للعربيات يخليني اتعبلها .. و طبعا لو في اي مقترحات اخري ابقي ممنون ليكم بجد و يارب اول مشاركه ماتبقاش اخر مشاركه باذن الله و اسف ع الاطاله

رد: مشروع لادا نيفا اوف روود
 

ربنا معاك ...
فى انتظار خبراء النيفا

رد: مشروع لادا نيفا اوف روود
 

يا مسهل الحال يا رب SLAM

رد: مشروع لادا نيفا اوف روود
 

حوالي 40 مشاهده و مفيش ولا رد .. صراحه مكنتش متوقع كده خصوصا اصحاب النيفا .. عامه شكرا للافاده

رد: مشروع لادا نيفا اوف روود
 

انا مش معايا نيفا ... فمش حعرف افيدك كتير
و لكن بصفة عامة .... ياريت حضرتك تحط سقف مادى علشان متخرجش عنها

و اجاوب حضرتك على خفيف كدة على ما حد معاه نيفا يفيدنا اكتر ...

1) هل بالمبلغ دا الاقي نيفا نضيفه ولا لأ

لازم حضرتك تنزل و تتفرج بنفسك على اكتر من عربية علشان تحدد ... و على العموم العربيات المستعملة رفعت شوية

2)هل ينفع اركبلها عفشه و جنوط اوف روود و تنفيخ و تعديل و الحركات دي
ايه الى يخليها متنفعش !! ممكن طبعا ... بس حضرتك حتحتاج تركب حاجة زى الطنبورة على الطنبورة الاصلية علشان تبعد الكاوتش الجديد شوية عن العفشة ... ده لو حجم الكاوتش كبير و بيخبط فى المقصات او المساعدين
لو حجم الجنوط الجديدة كويس و مش بيخبط فى حاجة .... مش حتحتاج تعدل فى الطنابير

3)هل موتورها احسن ولا يتسقطلها موتور بتيربو وليكن 1600 او موتور ديزل
لو زودت الكاوتش ... حتحتاج تكبر الموتور شوية علشان يكون كفاية على الكاوتش و الغرز و العزم

4)هل ينفع يتعمل بيها درفتات حتي لو شيلت فتيس الغرز و الكارونه
اى عربية عالية عن الارض بتتقلب بسهولة عند عمل الدريفتات .... حضرتك بتتكلم عن توطية العربية ... و برضو مش حتكون ثابتة زى العربيات السيدان

5)هل ينفع اغير التابلوه القديم بالجديد و اغير الكراسي بحاجه نضيفه
انا سمعت قبل كدة انه ممكن

6)هل ينفع اركب كونسول بفتحه تكييف ورا و دا بعد حل مشكله الحراره و العزل
اعتقد انه ممكن ينفع طبعا ... بس حتحتاج كونسول خلفى بياخد هواء مباشر من التلاجة الامامية ... او حتركب تلاجة خلفية

7)هل في شغل ليدات للفوانيس او ليدات معينه بتركب جوا الكابينه
انا شفت شغل اضاءة كتير و جميل جدا لكل العربيات .. فمن الممكن ان يكون كويس جدا للنيفا

متابع معاك