ابيع النترا عشان فلوانس
 

اصدقائي الاعزاء
انا عندي النترا 2011 عاملة 85000 كم مانيوال منذ اكثر من 5 سنوات والشهادة لله مافيهاش اي مشكلة والحمد لله بسافر بيها اسبوعيا مسافة 700كم منذ سنتين بانتظام لظروف العمل ومن افضل السيارات في سعرها اللي انا سوقتها .... ولكن
عندى احساس بالملل وعايز اغير وفكرت في اني اجرب اشتري حاجة من الجديد رينو فلوانس 2016 او سيات توليدو 2016 .... ناس كتير قالتلي حرام عليك .. وخايف اندم بعد البيع...

ممكن النصيحة ... ابيع ولا احافظ عليها

رد: ابيع النترا عشان فلوانس
 

العربية دى بيسموها سماسرة السيارات والميكانيكا الجمل وهى فعلاً جمل وحضرتك عارف ان كل شركة مصنعة للسيارات بيبقى عندها غلطة اواتنين فى صناعة موديل من موديلاتها وبعد فترة من الأستعمال وباالذات فى بلد زى مصر طرق وجو وصنيعية ومحطات بنزين معندهاش ضمير وحاجات كتير يطول سردها يعنى من خلال كل هذه الخلطة الملعبكة التبهدل دبابة مش عربية تطلع عربية زى بتاعت حضرتك وتقول انا عبدالعال بطل الأبطال او الأسطى عمارة فى ضرب الطارة المهم حضرتك بعد كل الرغى والملل السببته لحضرتك اسمحلى احترم إقتنائك لهذه السيارة المحترمة بكل المقاييس ودى حتة ذهب كل ماتطول معاك وربنا يرعاها ويرعاك يبقى انت كسبان مش خسران وسيبك من اى عربية تانيه يااما تركب حاجة تكون زى عربيتك اوأحسن منها ,,لكن ارجوك ماتبعهاش ومش هقولك متجبش كذا علشان اصحاب كذا وكذا فى مصر موتورز ميزعلوش وربنا يوفقك...

رد: ابيع النترا عشان فلوانس
 

لو معاك عربية مريحاك ماديا و نفسيا اوعى تبعها ... لان الجديدة مش حاترييك زى القديمة و دايما هاتقارن بينهم ... لو الجديدة طلعت نضيفة من غير عيوب صناعة برده مش حاترييحك لان سعر قطع الغيار فى صالح القديمة ... نصيحة خليها معاك و لو عايز جديد اشترى جديد و خلى القديم

رد: ابيع النترا عشان فلوانس
 

حافظ عليها و أوعى تبيعها مادام مريحاك ....ولو حاسس بملل دلعها شوية ... جنوط و كاوتش جديد... تلميع بولش .... فرش جديد الخ و خليها عروسة
و الرأي الأخير لك أكيد

رد: ابيع النترا عشان فلوانس
 

شكرا جزيلا على الردود المحترمة والإضافة ... مش هابيع....انا أساسا كنت بتلكك وطالعة من عيني خصوصا اني مش هاركب مرسيدس اس مثلا ..... شكرا مرة أخرى