بسم الله الرحمن الرحيم

انا هقارن بينها و بين اللوجان المانيوال ال2010 اللي معايا

اول ما تركب العربية تحس بجودة التقفيل الداخلي اللي بيظهر جدا في مقابض
الابواب و الحتة الفضي اللي في الكونسول عند الكاسيت و التكييف فبعد ما
كانت مقابض الابواب في ال2010 بتعمل صوت تكتكة لما تيجي تمسكها المقابض
الحالية بسم الله ما شاء الله زي الفل و مفيهاش الهواء.

دخلنا العربية اول حاجة هنشوفها العدادات اللي مفيهاش اي اختلاف بينها و
بين ال2010 فيما عدا ان خط الكتابة بقى عادي مش Bold زي ما كان في
ال2010 و ان الخلفية برتقالي و الكتابة سودة في حين انها العكس في ال2010 ، في الاول انا استغربتوا جدا بس بعد كدة لقيت ان شكلوا احلى من ال2010 من وجهة نظري.

الشاشة الحالية

http://img707.imageshack.us/img707/7475/20022012887.jpg


الشاشة في ال2010
http://img710.imageshack.us/img710/2668/23042011444.jpg

الشاشة بتبين زيادة عن المانيوال النقلة اللي انت عليها ان كانت P R N D و اللي في حالة الصورة اللي تحت انا كنت على الN

http://img707.imageshack.us/img707/7475/20022012887.jpg

او رقم النقلة اللي انت سايق عليها في حالة الاستيبترونيك (كنت على الثاني)

http://img403.imageshack.us/img403/9113/20022012888.jpg

- و في حالة انك مشغل الmode الخاص بالثلج او الطرق المبلولة (هنتكلم عليه لما نيجي للفتيس قدام) هتظهرلك العلامة بتاعتو فوق على الشمال (اسف نسيت اصورها)

ورا الدريكسيون هتلاقوا الMulti Function اللي بعد استخدامو اكتشفت قد
ايه هو اوبشن حلو في العربية مش زي ما كنت متخيل انو حاجة رفاهية ملهاش
اي لازمة لكن بيخلي عينك على الطريق و متشلش ايدك من على الدريكسيون

نيجي على فتحات التكييف هنلاقي انها بقت اجمد من الاول و ليها درجتين
علشان تعرف تتحكم فيها اكثر من الاولى اللي يا كانت مفتوحة يا مقفولة و
بس

الكاسيت و السماعات:
http://img819.imageshack.us/img819/8861/20022012895.jpg

باين في الصورة انو MP3 و مكان وصلة الAUX

- الكاسيت ماليزي بس صوته محترم جدا و السماعات صوتها نقي و قوي في نفس الوقت

- الكاسيت mp3 مش Audio زي الثاني و فيه وصلة AUX بس صوتها معجبنيش - مش
عارف ده عيب في الموبايل بتاعي ولا في الكابل ولا في الكاسيت لسة هشوف -

- الMulti Function سهل جدا و لذيذ و مخليك تركز على الطريق جدا و مبتبصش
ناحية الكاسيت نهائي منو تقدر تعلي او توطي او تكتم الصوت او تعمل Pause
او تجري او ترجع Tracks او محطات الراديو و منو كمان تقدر تغير ان كنت
تشغل CD ولا AUX ولا راديو.

http://img593.imageshack.us/img593/8521/20022012889.jpg

- الزرارين اللي فوق اللي مكتوب عندهمSource ده تقدر تقلب منو من CD لراديو لAUX
- الAUX مش هيشتغل معاك غير اما يبقى في كابل واصل في الكاسيت غير كدة هيبقى عندك راديو و CD بس
- باين زراير الصوت في الجنب اليمين و زرار الMute لو في راديو او AUX بيشتغل Mute اما لو في CD هيعمل Pause
- الزرار اللي تحت اللي عليه سهم كدة ده بيغير موجة الراديو من FM1, FM2,AM و هكذا
- فيه في الجنب بكرة بس مش باينة في الصورة دي اللي بتقلب الTracks من الCD او المحطات لو على الراديو

نيجي بقى للكابوت:

اول ما تفتح الكابوت هتفرح فرح غير طبيعي لأكثر من سبب:
- هتلاقي الموتور شكله يفرح و هتحس فعلا قد ايه موتور المانيوال تكنولوجيا قديمة و هتلاقي الموتور مالي الحوض


http://img851.imageshack.us/img851/5532/img0010kk.jpg

و ده اتسبب في ان اللي بيرفع البصمة في المرور طلع عينه على ما ما رفعها لأنها تحت و الخراطيم مالية الحوض =)

العزل:
- عزل الصوت ممتاز الحمد لله و حاسه يمكن احسن من ال2010 بالاضافة لعزل الكابوت زي ما موجود في الصورة علشان يعزل صوت و حرارة في نفس الوقت

http://img814.imageshack.us/img814/4709/img0008ik.jpg

- الحرارة اللي كانت تحت الدواسات مش حاسس بيه نهائي و ده هيبقى راجع للعزل اللي في الكابوت قبل مواسير السخن ما تدخل على المقصورة + عزل اللي عند المواسير نفسها من جوة تحت الدريكسيون (التوكيل كان بيكتفي فقط بالعزل اللي من تحت الدريكسيون و مكنش بيبقى كافي)
العزل اللي كنت بتكلم عليه قبل مواسير السخن هو اللي عند راس المساعد من على الشمال و ممتدة لحد ورا الموتور زي الصورة اللي تحت دي

http://img441.imageshack.us/img441/5558/img0009jx.jpg

الفتيس:

http://img843.imageshack.us/img843/8505/20022012891.jpg

- الفتيس هو هو نفس فتيس ال 7 راكب و فتيس السينك 2003 (السينك 1) و هو فتيس اربع سرعات استيبترونيك
- هنلاقي في القاعدة بتاعة الفتيس زرار كدة الزرار ده هو بتاع الاراضي المزحلقة علشان لما تدوس بنزين العجل ميفركش منك لما بتشغل الزرار ده العربية بتطلع على الثاني علشان ميبقاش في عزم كبير رايح ناحية العجل فيخليه يفرك و انت طالع و بالتالي هيسهل عملية الطلوع (ده بيستخدم في لو على مطلع و ارضية مزحلقة او مطينة او في الثلج)
- الفتيس نقلاته سلسة 1 2 3 4 R بس احيانا مش دايما لما تيجي تهدي و تنزل من نقلة اعلى لنقلة اقل تحس بنتشة خفيفة و دي في اعتقادي هتتحل بكل سهولة ان شاء الله لأنها مش مشكلة ميكانيكية لان الفتيس بينقل للاعلى بسهولة و بدون ما تحس + انها مش دائمة و مش مسببة اي مشكلة في اداء العربية ولا متعة القيادة
- الفتيس مش هيسيبك تغلط بمعنى انك مقلا لو جبتها على الاستيبترونيك و وانت واقف جبت ثالث علشان تطلع بالعربية هتلاقيه راح منزلك على الثاني و مش هيجيب 3 علشان مفيش عربية بتطلع على الثالث
- لو جربت تنقل من غير ما تدوس على الزرار الفتيس مش هيتحرك معاك
- لو جربت تنقل من غير ما تدوس على الفرامل الفتيس بردو مش هيتحرك معاك
- جبته استيبترونيك و منقلتش الفتيس هينقل من نفسو قبل ما يوصل للRed Zone (مجربتهاش في العربية دي بس جربتها في سوبارو امبريزا بس الفكرة واحدة)

الفرش:
فرش البلاك لين عموما مختلف عن فرق الفول اوبشن و بعتذر على ان الصور مش واضحة اوي علشان انا مكنتش مالك الموبايل قوي ولا شايف هو بيصور ايه من اساسو =)

ظهر الكرسي
http://img577.imageshack.us/img577/4706/20022012892.jpg

قاعدته
http://img814.imageshack.us/img814/7223/20022012893.jpg

التحرك بالعربية:
- العربية طلعتها بطيئة شوية بس مش هتحس بيها الا لو جربت طلعة المانيوال + ان في دوسة معينة هتديلك عزم ممتاز في الطلعة و دي لما عرفتها مبقتش احس بالموضوع ده اوي
- العربية بتنقل من اول لثاني على 30 تقريبا من ثاني لثالث على 50 من ثالث لرابع على 80
- استجابة العربية بعد ال80 رهيبة بمعنى اتها جمعت من ال80 لل130 بسرعة غير طبيعية و لولا اني اخدت بالي من السرعة كانت كملت عادي جدا و ده كلوا بدون كيك داون

العفشة:
العفشة كعادتها ناعمة و قوية و مدية ثبات حلو الحمد لله

الكاوتش:
نازلة بكاوتش اسمو Barum حاسس ان خامته انضف بس في نفس الوقت نقشته واسعة فبيلم ظلط كثير =)

التكييف:
- العربية نازلة بفلتر تكييف (ال2010 مكنش فيها)
- شغلتو يوم الخميس اللي فات على 1 عمل شغلوا بسرعة جدا الحمد لله و محستش بانو اثر على السحب نهائي بالرغم من توقعي انو مع عربية اوتوماتيك هيخليها بطة بلدي بس الحمد لله خلف ظنوني

الكشفات:
حدث ولا حرج الحمد لله بفضل الله كاشفة الطريق قدامي كويس جدا جدا

الخلاصة:
- رينو اخدت بالها من كل مشكلة صغيرة و كبيرة قابلت الناس في الموديلات اللي فاتت و عالجتها من جذورها علشان يطلعوا العربية زي ما بيقولوا مفيهاش غلطة و فعلا الحمد لله العربية كل ما بركبها بحمد ربنا انو رزقني بيها و بحس ان كل قرش اندفع فيها الحمد لله اتحط في مكانو.
- الموتور الجديد سحبه بوجه عام افضل من القديم و صوته الحمد لله قليل جدا
- الفتيس نقلاته سلسة بس في بعض التنتيش الخفيف الغير دائم لما تنزل من نقلة اعلى لنقلة اقل - غير مؤثرة على اداء العربية خالص -
- المسايت و السماعات محترمين جدا جدا جدا
- التقفيل بتاع العربية ممتاز
- عزل الصوت ممتاز يخليك تسمع اللي برة الشارع لو كالكس ولا حاجة بس في نفس الوقت قاعد في هدوء
- العفشة ناعمة و قوية و كلها حنية =)
- العربية تستحق كل قرش يندفع فيها و الحمد لله (منقول)

الموضوع من إعداد و مجهود العضو المحترم gebreel