بصراحة انا قرت من العربية دى ومش عارف اعمل اية
 

السلام عليكم

صباحك قشطة كلكم نفر نفر

دلوقتى يا جماعة انا العربية الشارك مزعلانى اوى اوى اوى ... وانا جيبت معايا اخرى ومفكرة انى لوحدى ومش ورايا رجالة فى مصر موتورز هنا مستنية اشارة وتبتدى الهجوم

.... انا عمال اسخنكم اهو علشان تتصرفو لحسن اولع فى نفسى وفيها MAD

العربية دى ي جماعة عزل زى الزفت ... عفشة زى الطين ... مكنة تسارعها جميل لكن صوتها مقرررررف وحاسس ان الصوت جوة ودانى ...

انا كل فترة كدة اخدها من الحاج علشان اشيك عليها واغيرها زيت واشوفلها الصينات اللازمة واعملها وخصوصا انى كان بيشتكى وبيقول ان العربية ماشية تشختخ وبتعمل اصوات

المهم اخدتها ورفعتها وكشفت عليها وغيرتلها تيل ... جبتيلها تيل اصلى وربنا ومش استخسرت فيها حاجة 490 جنية ... وياريتة بيتمر فيها بنت .............

وربط عفشة وغيرتلها زيت وطقم فلاتر وروقت ع شبابها .. وكمان اكتشفنا ان فى مساعد واحد ضرب زيت .. وقولت لما اسافر هجيبة

اجى ادور العربية واجربها الاقيها لسة بتعمل اصوات غريبة ... روحت فاتح الشنطة ومفضيها ومفضى العربية كلها من كراكيب او ورق او اى حاجة كانها لسة خارجة من المعرض ... الاصوات اختفت بنسبة كبيرة وفضل صوتين هيجنونى

اول صوت ... صوت طقطقة والعربية ماشية والطريق مكسر او لو دست فرامل مفأجاأة او وانا طالع مطب او نازل من مطب بسمع صوت طقطقة فى الاربع اتجاهات ورا وودام

تانى صوت ودة بسبب العزل السىء للعربية ... العربية وهى ماشية تسمع صوت العجلة وهى بتلف كانك بتلف حوالين ودانى وتسمع صوت الرمل او التراب او بخبيط فى الفجاوى ... عربية ب 157 الف جنية تبقى من غير كارتيرات ورا لييييييييييييية غالين اوى ؟؟؟


المهم روحت اكشف ع العربية تانى قالى يمكن المساعد بيعمل صوت فغيرتهم وركبت المساعدين الجداد وبردة الصوت هو هو مفرقش اى حاجة

مسكنا العفشة حتة حتة فسفوسة فسفوسة انننا نلاقى حاجة فيها مش بايظة لا دة احنا بنتلكك ع اى حاجة تكون لية بتفكر هتبوظ مفيييييش خالص العفشة كلها زيررررو مكنش فية غير المساعد وغيرت بدل الواحد الاتنين

رجعت الجراج وقولت ادور انا فتحت الكبوت جيت ابص لقيت الغطا بتاع المكنة بيعمل صوت تكتة كدة الجلد بتاعة من السخونية معتش ماسك كويس فكيتة وثبتة جامد اوى

بعد ما فكيت الوش ظهر ودامى الوش الى بيركب ع الفرن بتاع الشكمان لقيتة سايب هو كمان وبيعمل صوت جاااامد

بينى وبينك قلت بس والله وجبت الديب من ديلة يا ابو حميد وحققت ما يعجز عنة الاخر كانى واثق ان دة السبب فى الصوت .. وبعد ما فكيتة ووضبطة وركبتة تانى وثبتة كويس قلت اجرب بقى

وبقى مفتوح مترين من الابتسامة والثقة ان الصوت راح .... ولسة طالع من الجراج والاقى مزيكا حصبلة اشتغلت تانى


قوليلى انتم دة يبقى اية بقى ؟؟؟؟؟


من الاخر كدة انا عاوز التمام فى الموضوع دة وعاوز حل للموضوع دة ولازم نعمل اعدة كبير وابو نورا ويحيى والشيخ طارق وهشام الجزار وكلة كلة كلة كدة يجيلى هنا وتشوفولى حل مع بنت التيت الى تحت دى :GROWIN~12:

رد: بصراحة انا قرت من العربية دى ومش عارف اعمل اية
 

العربية دى عاملة كام كيلو
التيل يبيقى له سوست عشان مايخبطش في المشى ودوسة الفرامل
ترصيص العجل ونقشة الكاوتش لو بتلم ظلط هتقعد تدب في الداير بتاع العجل
سهل اى سمكرى شاطر او كهربائى يعملها كرتيرات تفصيل او توفقلها كرتيرات
غلطة كبيرة اوى انك اشتريت العربية دى والبومة برقبتها

رد: بصراحة انا قرت من العربية دى ومش عارف اعمل اية
 

حبيبى يا هشام باشا

انت شكلك اتأثرت بمشكلتى اوى لدرجة انك عاوز تجيلى بنفسك بس للاسف المسافة بينى وبينك بعييييييدة

العربية عاملة 24000 كيلو بس تخيييييييل بقالها 3 سنين اهى
فعلا والسست موجودة وراكبة وانا مسكت جهاز الفرامل كلة ع بعضة علشان اطلعة منة صوت لدرجة انى كنت هخلعة بايدى بس مطلعش صوت
الكاوتش بتاعها الفبريكة وكمان انا عارف صوت الظلط وكويس وبردة من حيرتى فصفصت الكاوتش كلة ومفيش اى نتيجة
ههههه غلطة وندمان عليها والمصحف ... مشكلتى انى لما جبتها مكنش لسة حد جابها وانا غامرت وجبتها ع حساب ان شكلها كان خرافة وسمعة البومة الممتاذة فقولت فى بالى اكيد دى هتكون تكميلة لمسيرة البومة الناجحة :12F099~16::12F099~16:

رد: بصراحة انا قرت من العربية دى ومش عارف اعمل اية
 

الموضوع مضايقنى جدا طبعا وخصوصا موضوع ال24 الف دول يا ألف خسارة
يعنى انت قفلت الازاز واتأكدت من ربط العجل وكل الفبر اللى في الحوض
ولسه صوت الشخشخة ، على فكرة انا اعرف ناس في توكيل مصرية اللى قرب الحرفيين في جسر السويس لو عاوز تشيك عليها

رد: بصراحة انا قرت من العربية دى ومش عارف اعمل اية
 

قفلت الازاز والله يا هشاام وقافل الكاست ومش مشغل اى حاجة خالص حتى ربط الحزام وانا بجربها ع سرعة 20 علشان ميعدش يصفر

الفبر كلة متربط كويس حتى الفبرة الى تحت المكنة دى فى منها كام كلبس متشال وطبعا مستبعد انها هى الى تعمل صوت الطقطة دى بس بردة جبت افزان وربطها كويس جدا

الصوت تحسة طالع من المساعدين لانى مع حركة جسم العربية .. تيجى تكشف عليهم تلاقى كل حاجة جديدة

دة انا حتى جبت اصحابى شوية عضلات حلوين كدة واعدت جو العربية وقلتلهم يهزو العربية كل واحد وقف فى جمب واعد يهزو العربية فوق وتحت انى اسمع صوووووت مفيييييييييش

ما هى المشكلة مش فى ان حد يشيك عليها لان لو جبت مين يشيك عليها مش هيطلع فيها حاجة لان العفشة كلها سلييييييمة والفبر كلة فى مكانة