مصر موتورز مجتمع السيارات

مصر موتورز مجتمع السيارات (https://www.masrmotors.com/vb/index.php)

- رينو كليو Clio (https://www.masrmotors.com/vb/forumdisplay.php?f=163)

- - رينو كليو 2003 (https://www.masrmotors.com/vb/showthread.php?t=3450)

رينو كليو 2003

السلام عليكم
أنا قدامي عربية رينو كليو موديل 2003 حالتها يبدو انها كويسة جدا وتمنها 40 الف وفيها تكييف وباور وكاسيت ودواخل فابريقة وكمان التابلوه نفسه مجهز اوتوماتيك ! بس سألت فبعض الإخوة خوفوني منها عشان قطع الغيار غالية وعربية ملهاش سوق وكمان بيقولوا ان الاكصدام ورا وقدام بلاستيك !
فما رأي الخبراء في الكلام ده ؟ وهل تنصحوني بيها ولا بدايو لانوس ولا بإيه بالضبط في حدود المبلغ ده ؟
أرجو الإفادة بسرعة لو سمحتم

رد: عاجل : أسأل عن رينو كليو 2003

ابا عبد الرحمن السلام عليكم ورحمة الله وبركاته...
اولا احب اعرفك ان مش الأكصدامات بس اللى فبر ده جوز الرفارف والسقف كمان يعنى لما الرفرف يتخبط يتكسر وانا شفت بنفسى حمار لعربيه كارو واقف ياكل ماتبقى من رفرف مكسور لعربيه من هذا الطراز وشفت ايضا عقب سيجارة واقع من عمارة على سقف السيارة عامل فيها علامه كأنه سايح....
ولكن هذا اتجاه عالمى فى الصناعه الأن( الميجان وال c4 والبيجو 307 ) واغلب الظن ان دى عوامل امان فى السيارة.
والقصور عندنا مش عندهم يعنى هم فى اوروبا لا يوجد عندهم حمير اعزك الله ولا ناس بترمى اعقاب سجاير من فوق.
المهم ان موتورها 1200 سى سى وهى سيارة موفره للغايه فى البنزين اما بالنسبه لقطع الغيار فهى اغلى طبعا من الكورى واليابانى ولكنها معمرة جدا ومنتشرة جدا لهذا الموديل ولكن فى موديل 2001 و2002 كانت بتنزل صاج كلها وكان الموتور 1400 سى سى ياريت تلاقيها وكانت فرنساوى بالكامل مش تركى زى موديل 2003 وكانت بتنزل للمخابرات.

لكن خلاصة القول ان اي سيارة أوروبية الصنع لا تقارن بالسيارات الاسيوية ولا الصينيه فالسيارات الاوروبية احسن من حيث عوامل الامان والقدرة الموتورية والاتزان وجودة الصاج الغير قابل للصدأ وخلافه وسيبك من قولة ان السيارة سعرها بيقل واعادة البيع صعبة ده كلام فاضى يتشدق به التجار فقط .

والقرار الأخير لسيادتك وانصحك بلأستخارة ..
ولا تنسانا بخالص الدعاء

رد: عاجل : أسأل عن رينو كليو 2003

جزاك الله خيرًا أخي أيمن على هذه النصائح الطيبة
وأفهم من كلامك أنك تؤيد أني أشتريها بدلاً من الكوري، وأنا أميل لهذا الرأي لفرق الجودة بين الفرنساوي عموما والكوري وغيره، ولكن تبقى المشكلة في قطع الغيار والتصليح ، ولا زلنا ننتظر رأي باقي إخواننا فليشاركونا جزاهم الله خيرًا

رد: عاجل : أسأل عن رينو كليو 2003

بص يا استاذى العربيه الكليو محترمه جدا
وانا جربتها عجبتنى وكانت كويسه (انا جربت ال2004) اللى موتورها 1400
وبالنسبه لقطع الغيار فأحب اقولك على حاجه هى اللى سألت عليها لاننا كنا عايزين نجيبها وهى مروحه الردياتير وكان تمنها فى التوكيل بالضريبه 568 جنيه فى حين ان عربيه زى الماتريكس تمن المروحه فيها معدى الالف جنيه ودى قطعه فرنساوى ودى قطعه كورى ممكن انت تجرب تحسبها حتى الكورى بقى مبالغ فى قطع غياره وفى ناس كتير اوى شغالين فى صيانه الرينو وربنا يوفقك للى فيه الخير

رد: عاجل : أسأل عن رينو كليو 2003

ربنا يكرمك يا (بوب) على الإفادة دي وكلامك على كلام أخونا المحترم أيمن طمني من ناحيتها وممكن أخلص فيها وربنا يوفق
بس لو خلصت فيها هقرفكم شوية معلش لو قابلتني أي مشكلة لأني مش هلاقي أحسن منكم أستفيد من خبراته
وجزاكم الله خيرًا جميعًا وربنا يبارك في المنتدى ده ويبارك في أعضاؤه وفي صاحبه الأخ المحترم أبو نورا وائل مجدي