مصر موتورز مجتمع السيارات - عايز اعرف سعر السيارة شيفرولية بليزر ك5

مصر موتورز مجتمع السيارات (https://www.masrmotors.com/vb/index.php)

- شيفروليه الكورية CHEVROLET و دايو DAEWOO (https://www.masrmotors.com/vb/forumdisplay.php?f=39)

- - عايز اعرف سعر السيارة شيفرولية بليزر ك5 (https://www.masrmotors.com/vb/showthread.php?t=85424)

عايز اعرف سعر السيارة شيفرولية بليزر ك5

افيدونى رجاء أريد معرفة ما هو سعر السيارة شيفرولية بليزر ك5 من موديلات 85 فما فوق واسعر قطع الغيار وأستهلاك البنزين بالنسبة للموتوريين 6سلندر و8سلندر وفى منها انجكشن ولا لا انا من إسكندرية وعشاق للسيارة شيفرولية بليزر5 وعايز أعرف كل المعلومات الممكنه عنها .

رد: عايز اعرف سعر السيارة شيفرولية بليزر ك5

السلام عليكم

الاول النصيحة لله ....... لو مش بتحب العربية دى بجد يبقى بلاش منها احسن .... واخد بالك من كلمة بجد دى !!!!

انا معايا بليزر موديل 80 موتور 5700 سى سى 350 مانيوال و فيها فتيس غرز و مفيهاش تكييف و كنت شاريها بـ 35 الف جنيه

العربية حجمها كبير حبتين و عالية عن الارض و من الصعب ظبط ابعادها و انت سايق
نظرا لان العربية موديلها قديم فمن الطبيعى جدا انها تبقى متهالكة و كل شوية فيها حاجة تحتاج تتغير و تتصلح
لو ربنا كرمك بميكانيكى كويس يبقى حظك حلو
قطع الغيار مفيهاش مشاكل كبيرة ... فى القاهرة موجودة فى شارع شامبليون ... و موجودة فى المنوفية و دمنهور كمان ... و فيه حاجات بتجيبها بالشبه .... يعنى تاخد قطعة الغيار القديم و توريها للراجل الى بيبيع و يديك زيها
الى خلانى الف عليه مصر كلها ..... مسمار .... علشان الامريكان بيستعملوا سن ناعم ... و اغلب الموجود فى السوق سن خشن
مشكلة البليزر الكبرى فى الزجاج الخلفى ... الزجاج حجمه كبير و الماكينة الى عليه بتبوظ كل شوية و التانية .. كتر خيرها برضوا
الموتور حوت بنزين ..... انا بعمل 80 كم فى الصفيحة ... و الكربراتير لازم يبقى مظبوط
الاسبراتير الكترونى ... يعنى مفيهوش ابلاتين و لا كوندسر ... فيه مشط ( موديول ) لما يبدأ يبوظ بيديك علامات تحذيرية قبلها .... زى ان العربية تقطع معاك و تطفى و انت ماشى و ترجع تشتغل تانى
كنت سمعت ان فيه منها انجكشن فى موديلات 88 و الله اعلم
العربية على سست ورقية امامية و خلفية ... يعنى ناشفة جدا ... الى يقولك ان اللادا ناشفة يبقى مركبش البليزر ... الرانجلر ناشفة .. برضو مركبش البليزر
الصيانة .... اكتر حاجة بتوجعلى ظهرى ... علشان لو عاوز اعمل اى حاجة لازم انط و اقعد جوا الكبوت
فيها خاصية طاردة للجنس اللطيف .... مراتى و والدتى و عماتى و اخواتى بيكرهوها عما ..... و سواقين الميكروباص برضو بيكرهوها جدا
فيها خاصية جاذبة لعربيات التاكسى .... حتلاقى بتوع التاكسى عندهم مزاج يرموا عليك
و مع ذلك انا بحبها جدا و مبفكرش ابيعها
انا فى الخدمة لو فيه اى استفسارات تانية و لسة مغيرتش رايك :1281F1~121:

رد: عايز اعرف سعر السيارة شيفرولية بليزر ك5

اقتباس:

المشاركة الأصلية كتبت بواسطة ahmed_eng2001 (المشاركة 661485)

ده انت مرجع ياباشا :THUMBS~220:

رد: عايز اعرف سعر السيارة شيفرولية بليزر ك5

اقتباس:

المشاركة الأصلية كتبت بواسطة crime (المشاركة 661490)

ده انت مرجع ياباشا :THUMBS~220:

يا باشا ربنا يكرمك .... لا مرجع و لا حاجة ... انا بس حاطط البليزر فى دماغى و ساعات كدة دماغى بتقفل ... و يا انا يا العربية FLASHCar