رحت مول سبير كار فى التجمع الخامس النهاردة
 

توكلت على الله وخرجت من المكتب النهاردة متوجها الى مول سبير كار فى التجمع الخامس بعدما ضبط الموقع تقريبا على خريطة الGPS عن طريق المعلومات التى أستخلصتها من الانترنت.

طبعا المسافة مش هينة -يوم الخميس مساءا بالذات- من المهندسين لغاية التجمع الخامس وأتزنقت فى جامعة الدول العربية ييجى ساعة لوحدة والحمد لله قدرت أوصل بعد حوالى ساعتين الا ربع وأنا أمنى نفسى بشراء كل ما لذ وطاب للعربية لكن فى نفس الوقت أظبط نفسى طول السكة انى مصرفش كتير واحنا داخلين على عيد كل سنة وأنتم طيبين.

أول ما دخلت من باب المول الفخم تلقانى الباعة بترحاب حار ومقابلة فى منتهى الدفء خليتنى أحس انى مش غريب عن المكان وكأننى كنت بروح المكان دة كل يوم. أول لما توسطت المكان بضرب عينى على المعروضات شفت حاجة صدمتنى. دة أنا بالى أسبوعين عمال أتكلم وأسأل على البلوتوث كاركيت بالأف أم ترانسميتر (Bluetooth Car-Kit with FM Transmitter) اللى بيركب فى الدركسيون وسألت علية الأستاذ أمير فى موضوع سابق فى المنتدى ومردش علية وكلمت سبير كار فى التليفون وقالولى معندناش وفى الآخر صدمت انى أجدة معروض عندهم وكمان نوعين منة!!!

لما سألت عن سعر النوع اللى أنا عايزة قالولى 320 وعملولى تخفيض 50 جنية من غير ما أجيب سيرة مصر موتورز وخلوة 270 جنية. وكمان التخفيضات التانية على التلاجة والGPS دى لكل الناس مش لمصر موتورز بس. دة حتى عرض الفرش الثالث الهدية على أى فرشين تشتريهم دة كمان لكل الناس حتى أدونى مطبوعات بيوزعوها لأى حد بخصوص العرض دة وهى معايا. ولما قولتلهم على مصر موتورز رحبوا بية زيادة شوية كمان لكن بدون أى تمييز فى التخفيضات اللى هى موجودة أصلا.

بس للأمانة أسعارهم -اللى هى لأى حد- كويسة جدا وأرخص من السوق وأرخص كتير من شارع دمشق كمان وأنا فعلا اشتريت كاركيت ب270 جنية وأرخص سعر فى شارع دمشق كان 340 بعد الفصال بس بردة عايزين التخفيضات اللى بيقولوا عليها لمصر موتورز علشان يكونوا صادقين انها حاجة خاصة بنا مش عامة زى ما لقيت.

رد: رحت مول سبير كار فى التجمع الخامس النهاردة
 

حمد لله على السلامه يا استاذ هشام من الرحله الطويله دى ده انا بروح من العجمى الى ابو قير فى ساعه الا ربع وبكون ماشى برحتى كمان شوفت الاسكندريه نعمه ازى
لكن اهم حاجه انا عاوز اعرفها هو ايه كاركيت ده انا اول مره اسمع عنه

رد: رحت مول سبير كار فى التجمع الخامس النهاردة
 

رد: رحت مول سبير كار فى التجمع الخامس النهاردة
 

يا راجل مول سبير كار التجمع دا جنب الكلية بتاعتي و كل اللي هناك أعرفهم كويس .. مبروك يا ريس علي الحجات الحلوة اللي جبتها

رد: رحت مول سبير كار فى التجمع الخامس النهاردة
 

مبروك عليك يا استاذ هشام و فعلا المشوار علقة ربنا يكون فى عونك و بالنسبة لسبير كار فعلا محتاجين شوية اهتمام بالاعضاء على الاقل فى الرد على الاستفسارات