احترسوا من طريق مصر/ أسكندرية الصحراوى
 

للأسف صحفى بجريدة الأهرام / ملحق السيارات كتب من أسبوعين فى الصفحة الأولى من محلق السيارات بانه تم رفع اعمال الاصلاح من طريق مصر اسكندرية الصحراوى لحين الانتهاء من موسم الصيف واصبحت السرعة عليه 120 كيلو متر فى الساعة
وقلت اكيد دى غلطة مطبعية ويمكن الأعتذار عنها لكن ولا حس ولا خبر ولما سافرت على الطريق و من بعد البواباتت فى اكتوبر لم اجد الا اليفط كلها بتقول السرعة القصوى 100 وفهمت ان دى غلطة او بومبة واحتياطى مشيت بسرعة 90 وفوجئت بكتير جايين يجرو على الطريق وتأكدت ان الخبر غير صحيح لما وصلنا لجنة رادار مدينة السادات
وياللهول ( على رأى يوسف وهبى)
وجدت طابور طوييييل اول مرة أشوفه كله ممسوك رادار وفيهم ناس بتتناقش بعصبية وسمعت واحد بيزعق ويقول انتو اعلنتو فى الجرنان ان السرعة 120
وفهمت ان دى بومبة
ثانيا /لعلمكم الخاص طريق مصر اسكندرية الصحراوى الوحيد اللى عليه من 3الى 7 رادارات احيانا كلهم بيشتغلو واحيانا جزء منهم واحيانا مبيشتغلوش خالص وانا شخصيا مرة قابلنى ال7 رادارات دول واستغربت لان اخر رادار فيهم كانت لجنته واقفه قبل بوابات اسكندرية واعتقدت ان ظباط الكمين نقلوه ادام شوية لكن لما عديت البوابات لقيت الكمين كما هو كامل العدد وسالت امين شرطة واقف انتو واقفين قبل البوابات وبعدها فقال التانى رادار
ثالثا / ممنوع الجرى وراء الميكروباس لان معظمهم اما مرخصين رحلات او مدارس او اى حاجة وبالتالى الشرطة بيستخدموهم فى الايقاع بالفرائس من الغلابة اللى زى حالاتنا لما يجرو وراهم لاعتقادنا انهم عارفين الرادار فين ثم تفاجأ انك ممسوك رادار وسواق الميكروباس مشى ولا حد كلمه
رابعا خلى بالك لان ممكن يقف لجنتين رادار ورا بعض وخصوصا من السادات الى مدخل العلمين ومن مدخل العلمين الى النوبارية وطبعا بعض اخواننا اول م يعدى من لجنة الرادار يفتح البرجل ويفاجأ برادار تانى بينادى عليه
دى تجارب شخصية وأرجو انى اكون افدتكم

رد: احترسوا من طريق مصر/ أسكندرية الصحراوى
 

ههههههههههههههههههههههههه ههه

عاملين كامين للناس في الجرايد يقولك تمشي 120 وتتنفخ مع اول ردار

عامل زي مراقب علينا ايام ثانوي قال يا جماعه كل واحد عايز يغش يخلص نفسه بسرعه قبل ما رئيس اللجنه واللي معاه برشام ينقل اللي فيه بسرعه

كل العيال طلعت البرشام وواحد طلع جرنال الجمهورية وبينقل الاجابة بتاعة الاسئلة اللي فيه واول ما الكل طلعوا اللي معاهم راح مدبسلهم كل البراشيم في ورق الاجابة بتاعتهم وتقريبا كدا 90% من اللجنة شالت المادة

بس بيني وبينك العيال عملوله كامين بره المدرسة ونفخوه وكان معاه عربية هيوانداي اكسيل خلينهاله مش محصله سيات


بس انتا يا خلوده مبيهمكش كماين يا عم لان مصر كلها علمت عليك وعلي عربيتك وانتا طبعا ليك علامات في الجبال والطرق الصحراوية عملت ايه صحيح في رخصتك اللي اتسحبت منك في طنطا

رد: احترسوا من طريق مصر/ أسكندرية الصحراوى
 

يخرب عقلك ياكروزير حمدا لله على سلامتك كل ده بتصيف ؟؟؟؟؟؟؟؟؟؟؟ طب قل لى انك جيت بالسلامة
ثم ياعم انا ماشى على الصراط المستقيم دلوقت هو كل اللى هنكسبه هنديه للحكومة والا ايه
وريحت نفسى وعملت فكرة نميسة هقول لك عليها علشان تعرف انك حبيبى بس
شلت الرخص فى البيت وعملت محضر فقد رخص وماشى ومعايا البطاقة والمحضر وكل شهر اروح اعمل محضر بيكلفنى 10 جنيه
لو حد غلس ياخد المحضر والبطاقة فى 2 غيرها فى البيت
اى خدمة

رد: احترسوا من طريق مصر/ أسكندرية الصحراوى
 

ههههههههههههههههههههههههه ههههه يا ابن الايه يا جامد طول عمرك بتغزينا بافكارك

والله يا عم ولا الحوجه لسحب الرخص ولا الكلام الفاضي ده

وبعدين انتا اللي نايم في العسل مع الحكومة انا جيت من المصيف بقالي شهر

رد: احترسوا من طريق مصر/ أسكندرية الصحراوى
 

الرخص موجودة فى البيت عملت بيهم محضر وشايلهم فى درج فى البيت وقفلت عليهم بالمفتاح ورميت المفتاح فى النيل