مشروع مغسلة سيارات
 

السلام عليكم
كل عام والجميع بخير وان شاء الله يكون الجميع بخير
انا فكرت فى فكرة مشروع كار واش او كار كير او مغسلة سيارات
وبفكر اعملها على مستوى كويس
ودى الافكار الى فى دماغى اتمنى من الاخوة الافاضل يعطونى رأيهم ويزيدونى من فضلهم ومعلوماتهم عن الاسعار وعن الفكرة .
اولا انا عايز اعمل مشروع متكامل للسيارات
بمعنى انى عايز افتح محل للكفارات والجنوط وتصليح الكفرات
وجنبه محل للاكسسوارات والكماليات الخاصة بالسيارات وجنبهم المغسلة
وممكن اعمل كافيه صغير اوى كده تيك اوى يخدم زباين المشروع
ايه رايكم فى الفكرة
وانا عايز اشترى الارض عشان الواحد يحس بالمشروع وما افضلش ادفع دم قلبى فى الايجارات ولا اتعرض لاستغلال اصحاب الملك ويزود عليه سنة بعد سنة والكلام ده وبعدين كمان ممكن بعد التظبيطات الى هعملها والديكورات يقولى انا عايز المكان عشان كده اول حاجة استقريت عليها ان شاء الله انى اشترى الارض الى هعمل عليها المشروع .
وقسمت المشروع زى ما قلت لحضراتكم
مغسلة متكاملة للسيارات
محل كفرات وجنوط
محل اكسسوارات وكماليات
وكلهم يبقو جنب بعض ويخدمو بعض
اتمنى من الكل يتفاعل مع مشروعى واعرف ارائكم من ناحية الفكرة
وبرده عايز اعرف ممكن المشروع هيتكلف كام
وعدد العمال ورواتبهم
وهحتاج اجهزة ايه واسعارها
وتفتكرو افضل مكان للمشروع على طريق سريع مثلا ولا جوا البلد افضل
وبالنسبة للتصاريح والاوراق المطلوبة للمشروع بحيث انى ابقى شغال قانونى
يعنى المشروع هيبقى تحت اى بند وتصاريحة واوراقة هتبقى عبارة عن ايه
اتمنى الافادة
وشكراااااااا للجميع
وربنا يرزقنا واياكم

رد: مشروع مغسلة سيارات
 

ايه يا جماعة
حوالى 30 مشاهدة ومفيش ولا رد واحد

رد: مشروع مغسلة سيارات
 

المفروض ان حضرتك تبفى دارس الموضوع كويس لان انت عايز تبدا بأكثر من نشاط ف وقت واحد .
ودا اللى ممكن يكون خلى الرد على موضوعك يكون بالمشاهده فقط دى حاجه كنت عايز اوضحهالك .
نيجى لفكرة المشروع
هنبدا بالمكان وانت بتقول انت عايز تشترى تمام بس في حاجات كتير قبل موضوع الشرا لان انت لسه ماتعرفش السوق هايمشى معاك ازاى , هو الايجار مش تمام اوى بس انت لو اتقنت الموضوع وجيت مشيت من المكان انت ممكن تشتغل في اى مكان تانى بسهوله , الا بقى لو انت أصلا شغال ف المجال , ممكن تبدا في مكان بالايجار وبجزء من مشروعك لحد لما تشوف الدنيا هاتمشى معاك تمام انشاء الله وبعدين تتوسع. دا بالنسبة للمكان .
اما عن العدد اللى ممكن تستخدمها انا ممكن افيدك ف موضوع المغسلة لان انا عندى نفس الفكرة وبحاول انفزها,
العدد اللى ممكن تبدا بيها * ماكينة غسيل ضغط عالى 5.5 حصان - 200 بار - 5500جنيه* كمبروسر ايطالى 300لتر -4500 جنيه دا لو انت هاتبدا وبعد فترة ممكن تكبر النشاط ل كار كير * ماكينه الفوم المصرى - 900 جنيه- 120 لتر * مكنسة 3 موتور صيني - 1900 جنيه* دى أسعار مبدايه كنت سالت عليها ف شارع الجمهوريه ,
ودى افادة ياريت تكون على القدر اللى تديلك معلومة ,
ويا ريت انت كمان تقولنا انت وصلت لفين , والخطوات اللى انت وصلتلها , علشان نتبادل المنفعه

رد: مشروع مغسلة سيارات
 

بشكر حضرتك على الرد استاذ شريف
بس انا فعليا لسه ما بدأتش فى المشروع
انا لسه بفكر فى الفكرة وبستشير وباخد الاراء
وبالنسبة لملحوظة حضرتك اانا هبدا باكتر من مجال ليها سبب ( لان انا عايز بقدر الامكان استرد رأ المال المدفوع فى المشروع باسرع وقت ممكن وتانى حاجة اانا حابب ان المشروع يبقى متكامل فى مجاله بمعنى ان كل حاجة تبقى موجودة للعميل او الزبون الى هيجيلى .. كار كير وغسيل عادى وكفرات وجنوط وغيار زيت وبرده كماليات )
فكرة بقا اننا عايز اشترى الارض الى هنفذ عليها المشروع مش كتر فلوس ( زى ما ناس قالتلى كده فى مكان تانى كنت ناشر فيه الموضوع ) الفكرة اانا هعمل المشروع على كبير وهعمله على مستوى كويس وتوصيلات مياه وصرف وكهرباء غير المحلين بتوع الكفرات والكماليات فطبعا لما يكون كل ده فى ملكى هيكون احسن بكتييير عشان الزبون يبقى عرف المكان والاهم من ده ان ماجيش بعد كل المصاريف والتظبيطات دى والاقى صحاب المكان بيقولى مش هجددلك مثلا .. وحاجة كمان المكان الى هعمل فيه المشروع ده اعتقد على الاسعار الى بسمعها مش هيقل ايجاره عن 10000 الاف جنيه شهريا ...
فشرائى للارض الى هيتعمل عليها المشروع هيوفر عليه مع الوقت الايجار ..وتوفير الايجار هيساعد فى سرعة استرداد رأس المال للمشروع ..
دى وجهة نظرى

رد: مشروع مغسلة سيارات
 

1- لم يكن بجانبك من يعمل نفس العمل 2- تكون المغسل في منطقة مكتضة مزدحمة