مصر موتورز مجتمع السيارات

مصر موتورز مجتمع السيارات (https://www.masrmotors.com/vb/index.php)

- بروتون PROTON (https://www.masrmotors.com/vb/forumdisplay.php?f=40)

- - محتارة وخايفة (https://www.masrmotors.com/vb/showthread.php?t=106590)

محتارة وخايفة

السلام عليكم ورحمة الله
ده اول موضوع ليا هنا اتمنى تفيدونى
انا قاعدة بتفرج على الموضوعات بقالى فترة فى القسم هنا والحمد لله مرتاحة انى اشترى جين 2 العربية شكلها جميل وكمان ليا ناس معرفتى معاهم بس الموديل القديم 2007 ومهرية مشاوير وسفر مابتقولش لا

بس خايفة جدا من التوكيل والصيانة

ايه اخبار التوكيل وفعلا مش كويس ولا ايه اصلى انا اللى هاوديها التوكيل والصيانة ف خايفة يبقى الموضوع بياخد وقت طويل او يبقى فى اهمال

ورأيكم عموما فى الفيرجن الجديد منها انا شفت آراء ناس كتيرة بتشكر فى العربية ف محتاجة اسأله عن التوكيل كمان علشان اكون فكرة عامة عن العربية
وايه رأيكم فى اللون ؟ انا عايزة اجيب الاحمر بس مش عارفة فى منها درجات ولا لأ لانى مش عايزة الاحمر الفاقع ولا النبيتى انا عايزة اجيب دم غزال مش عارفة اللون ده كويس ولا لأ

يارب تفيدونى واسفه للاطالة

رد: محتارة وخايفة

اقتباس:

المشاركة الأصلية كتبت بواسطة yoyo.yasso (المشاركة 831830)

هوا عربيات البروتون بشكل عام سمعتها حلوة جداً خصوصاً الجين 2 عشان منتشرة أكتر من الباقيين بالتالى قطع غيارها متوفرة ، و برة التوكيل كمان ، هى ولا برخص الصينى و لا غالية زى اليابانى فى حين انها ماتقلش كتير عن اليابانى و تقفيل بلدها و متقفلة بضمير فعلاً مش زى التقفيل المصرى ، المشكلة فعلاً فى توكيلها اللى على حسب اللى بيتقال عنه انه اتحسن بشكل ملحوظ و اتحول من سئ لمقبول ، أنا جارتى العربية معاها بتقول انها عربية حلوة جداً و مريحاها على الأخر و الفلوس فيها بتبان ، هى بقالها 5 سنين و بطلت تروح التوكيل ، أكبر عيب فى العربية بالنسبة ليها العفشة ناشفة حبتين ، و دا أعتقد بسبب ان فيها فى نظام التعليق الخلفى قضيب اتزان اللى مخليها ثابتة فى الملفات و فى الغرز على السرعات العالية ، برغم ان التعليق الخلفى متعدد الوصلات و ده أحد أنواع التعليق المنفصل اللى هوا الأفضل من ناحية الراحة ، يعنى من غير الميزان ده كانت هتبقى مريحة لاكن مش ثابتة فى الملفات.
و الله تعالى أعلى و أعلم

رد: محتارة وخايفة

جزاك الله خيرا ربنا يكرمك انا طبعا مش فاهمة اى حاجة فى الجزء الاخير اللى حضرتك شرحته انا اللى فهمته انه عفشتها تقيلة
طيب هل ده يفرق بين انها مانيوال او اوتوماتيك ؟ اعذرنى على السؤال بس لانى مش خبرة فى الحاجات دى
انا ان شاء الله هاجيبها اوتوماتيك ومن رأيك يعنى العيب ده كبير ولا فى مقابل مميزات العربية يتعدى ؟

رد: محتارة وخايفة

اقتباس:

المشاركة الأصلية كتبت بواسطة yoyo.yasso (المشاركة 832148)

لا مافيش أى فرق بينهم من ناحية العفشة و باقى الكماليات باستثتاء مثبت السرعة بيبقى فى الأوتوماتيك بس ، و دا أصلاً فى ناس مش بتعتبره عيب لأن العربية فعلاً ثباتها رهيب و عربيات قليلة هى اللى بتقدر تاخد غرز على 180 من غير مشاكل و دا راجع للعفشة دى ، فكده الموضوع نسبى على حسب كل واحد عايز نعومة فى العفشة على حساب الثبات أو العكس

رد: محتارة وخايفة

الحقى بسرعه كل السيارات زادت 5 الاف على الاقل بسب الجنيه اللى واخد غطس جامد
ولسه يعنى الجين بقت 105ROSE4U