مصر موتورز مجتمع السيارات

السلام عليكم ,,

انا اسلوبى مش حلو فى الكتابه بس هاحاول اختصر الموضوع , اول امبارح عندى فرده كاوتش اتقطعت خالص و انا عامل حوالى 32 الف كيلو على الكاوتش ده و سبحان الله انا من ساعه ما اشتريته مش مستريحله مع انه هانكوك و مقاسه 195/60/15 و برده من ساعه ما جبته حاسس بعومه صغيره قوى فى العربيه ماحدش يحسها الا صاحب العربيه نفسه لأنه انا اللى عارفها كويس ...... المهم انا بحب اشترى 4 فرد مره واحده طالما فيه فرده اتقطعت و قلت ادور على 4 فرد ماركه محترمه و بالذات انى بحب اشترى كاوتش ماركه كويسه علشان الأمان و بالذات انى بجرى كتير و سفرى كتير و كنت جربت الميشلان من قبل و كانت من اوحش الأنواع اللى ركبتها فى عربيه لأنها غير مخصصه للأسفلت المحترم طبعا بتاع شوارعنا و كانت بتزحلق فى اى نقطه ميه او شويه تراب على الأسفلت ............
و جربت انواع كتير قوى و فى الأخر عرفت ان من افضل الأنواع بالنسبه ليا هو الكونتينتال و هى فرده محترمه جدا على الطريق و لكن بها عيب و هو انها مهما عملت هاتقعد معاك سنه بالظبط و ليس اكتر و تتقطع من الجنب .......
المهم , نزلت ادور على كاوتش جديد و كل اللى فى دماغى انى اشترى كونتنتال و كلمت التوكيل اللى فى مساكن شيراتون و قاللى ماعنديش المقاس ده حاليا !!!!
و كتر خيره ادانى نمره موزع كلمته و لقيته عنده ... بالمناسبه كمان المقاس ده مش موجود فى بريدجستون من حوالى 3 شهور حتى الأن !!!!
المهم قلت اروح للموزع و انا فى السكه رحت واقف عند واحد بتاع كاوتش اسمه اسحق موريس امام نادى الشمس و نزلت اسأله و قالى :- عندى كومهو كورى و بيريللى تركى .
طب البريللى التركى ده بكام ؟؟
قالى : 500 جنيه !! قلتله لأ اركب كونتينتال احسن بارغم من اللى موجود دلةقتى مش المانى و لكن صناعه سولفانى .

المهم سبحان الله افتكرت انى كنت كلمت EGYTYRES http://www.egytyres.com/ من فتره و رد عليا استاذ محمد و كان وصفلى عنوان مكانهم و قلت فى عقل بالى طب ما اروح و اشوف عنده ايه نوع كويس .....

المهم رحتله و فكرته بنفسى و قلتله عايز كاوتش محترم و رد عليا برده عندى البيريللى .
قلتله التركى ...مش كده ؟؟
قاللى نتأكد
طلعنا فرده منهم و بنبص عليها و احنا الأتنين جالنا ذهول !!!!!!
طلعت بيريللى صناعه ....... انجليزى ......
طبعا قلت فى عقلى هايعمل فتح و نصب و دول انجليزى و بيريللى و من احسن الكاوتش فى العالم ... فطبعا بسأله عن سعرهم و انا متردد : سعرهم كام الأربع فرد ؟؟؟
قاللى 650 جنيه للفرده .....
طبعا انا قلت يستاهلوا , المهم من هنا لهنا و انا عينى طالعه عليهم افتكرت انه كان قايلى فى التليفون قبل كده عليهم بسعر 500 جنيه بس الظاهر انه كان بيتكلم على التركى و رحت قايله لأ انا ماليش دعوه انت قلتلى سعر و انا هاخدهم بالسعر ده ......
و رد عليا قاللى :- لأ ..................... انا هاديهوملك ب 480 !!!!!!!!!!
ايه ؟؟؟ بجد طبعا طلعت الفلوس و دفعت و انا بدفع قلتله بس التركيب عليك و الترصيص و البلوف هههههههه و مستنى يطردنى بره المحل .... و كان رده الغريب انه قالى حاضر و هابعتك لحد يركبهوملك !!!!!!
انا مش مصدق بجد انى اشتريت اربع فرد بيريللى 195/60/15 صناعه انجليزى بالسعر ده ... و الحمد لله الثبات اكتر من رائع و الفرامل ممتازه
بالمناسبه كمان ادانى كشف حساب علشان لو فيه حاجه فى الكاوتش من عيوب صناعه علشان الضمان لمده سنه