مصر موتورز مجتمع السيارات - اشتريت جنوط اسبور من اشرفكو وكاوتش هانكوك

اولا احب اقدم جزيل شكري لكل من بالمنتدى على المعلومات القيمة التى استفدت بها في غالبية المشكلات التى قابلتني على الرغم من انني متابع جدا للمنتدي الا ان هذة اول مرة اشارك فيها
اولا سيارتي فيات 132 1600
اشتريتها من سنتين وكان فيها حاجات كتير عايزة تتعمل والغاوي وبصراحة صرفت ولازلت بصرف لاني حاسس انها تستاهل غير ال 128 مرضيتش اصرف عليها وبعتها مع اول حركة غدر
المهم الكاوتش بتاعي كان متبهدل بس اهو ماشي وفي يوم وانا راجع على مصر اسماعيية شيعت منى فردة والحمد لله ربنا ستر بقيت ماشي بالاربع فرد بدون استبن
بعدين اخوي اداني فردة من عندة بس مقاس مختلف لكن اهي تقضي الغرض وقت الزنقة
من اسبوع وانا رايح الشغل لقيت العجلة نايمة فسبت العرية ورحت مواصلات وللاسف مرجعتش الا بالليل وتاني يوم كنت مشغول في صباح اليوم التاني خت العربية ورحت اكشف الصنايعي قاللي الفردة اتلوحت:sd: ازاي محدش يسالني
المهم قولتلة اعملها وامشي بيها لغاية ماجيت الجديد
بقيت ماشي العربية تدبدب وترقص المهم السواد لما بيحط بينفخ
وانا ماشي بالعربية بفردة ملوحة ومن غير استبن عجلة فرقعت وانا في حتة مقطوعة واقرب واحد بتاع كاوتش بيني وبينه محطة قولت مش هينفع اسيب مراتي وبنتي واروح واجي
رحت مجرجرها لغاية المحل علي بال ما وصلت كانت هية كمان :fun_36_3_16[1]:
خد فردة مستعملة من عندة بايظة بس المهم امشي
ودي كانت نهاية الماساة دية
النهاردة روحت لاشرفكو مدينة نصر على الرغم من اني في المطرية
وسالت عند كام واحد على كاوتش وقولت لو ادوني اسعار كويسة اجيب جنوط وكاوتش 14" لقيت الاسعار وحشة اخليني في 13"
وبالفعل تم شراء كاوتش هانكوك 185/70/13 كوري انتاج 15/10/2011
وده احدث حاجة لقيته
ورحت لاشرفكو اركب جنوط اندونيسي محفورة من جوه الجنط مش استيكر
المشكلة اني موسوس فعشان كدة جبت اتقل جنط عشان يتحمل تقل العربية
ونبهت علية اني مش عايز افك مسمارين الدليل او اركب فلانشة (ومحدش يقوللي يعني اية فلانشة لاني مش عارف بس حاجات بسمع عنها ومشفتهاش)المهم مش عايز اي تعديل في اي حاجة عايز اشيل واحط وبس
جبت الجنوط ولقيت الواد وهوة بيركب حط غويشة بلاستيك اسمها رنجات
سالتة قاللي دي عشان تتطبع (ياريت تفيدوني)دي خطر ولا عادي واية فايدتها لاني مش مقتنع ان حتة بلاستيك في وسط الحديد ليها لازمة خصوصا اني بسمع جنوط تتكسر او تتشرخ وربنا يستر فارجو من الاخوة بعض النصائح للمحافظة على سلامتى اولا ثم السيارة والجنوط ثانيا واسف للاطالة
بعض الاسعار اللى عرفتها للكاوتش
185/70/13
دي ستون تايلندي لاسا تركي برسا تايلندي 300
كومهو فيتنامي 320
هانكوك كوري ارورا كوري 340
بيرللي تركي 360
185/70/14
سلفرستون ماليزي 355
185/65/14
سلفرستون ماليزي 345
175/70/13
ارورا 300
هانكوك 325
دي ستون 285
بيرللي 315
لاسا 330
بريد جيستون من التوكيل كاتكس مدينة نصر عباس العقاد ومصطفى النحاس
427 ومفيش تخفيض للمهندسين ولا للاطباء زي ما قال زميل قبل كدة
كومهو 387 ارجو الا اكون قد اطلت عليكم وتقبلوني صديقا