مصر موتورز مجتمع السيارات - تقرير عن اللوجان 2012 اوتوماتيك (من غير صور للاسف )

بسم الله الرحمن الرحيم
النهاردة كنت بتمشى انا وواحد صاحبي وكان غاوي عربيات زيي
شفنا معرض عربيات قلنا نروح نتفرج على العربيات اللي فيه
فجاة لقيت قدامي لوجان اوتوماتيك
معقولة هنا في سوهاج في لوجان اوتوماتيك واللوجان في القاهرة انقرضت
المهم
قررت اعمل تقرير (من غير صور للاسف ) عن اللوجان 2012 اوتوماتيك
نبدا على بركة الله
التقرير مقسم الى اجزاء وهي
السيارة من الخارج
داخل السيارة
خلف عجلة القيادة
الخامات الداخلية
التقفيل
بسم الله
السيارة من الخارج
في البداية لما تقف قدام العربية مش هتلاقي تصميم رياضي فيها
هتلاقي تصميمها عادي جدا لكن مش وحش يعني
لما تشوف الواجهة الخلفية للوجان هتشوف اسوا حتة في اللوجان لان شكلها مش حلو والفوانيس غريبة واللي زاد الطين بلا لمبة المارشدير الواحدة
لكن للامانة اللي عجبني من ورا الشريط الكرومي وهوا بيلمع
منظره يجنن والله ومحسن المنظر الخلفي
لما تبص للعربية من الجنب هتستغرب شوية
لانك هتلاحظ ان العربية سقفها عالي وقاعدة العجلات مش ماشية مع ارتفاع السقف
وهتلاحظ برضه ان مساحة زجاج الابواب كبيرة لكن مش زي الماتريكس
وهتلاحظ بشدة اكبر ميزات اللوجان وهيا الارتفاع عن الارض
ودي ميزة تخلي مفيش اي مطب يقدر يبص للوجان ابدا
......................... ................
داخل السيارة
صالون العربية واسع بكل ما تحمله الكلمة من معنى
انا فعلا كنت عارف الحكاية دي كويس وعارف انه واسع
لكن لما شوفته على الحقيقة لقيت انه اوسع من اللي انا كنت فاكره
وكمان الكراسي حلوة وتنجيدها ممتاز
وفي سهولة شديدة في الدخول والخروج من السيارة
......................... ................
خلف عجلة القيادة
وانتا قاعد على كرسي السواق هتحس انك راكب عربية عالية جدا لان وضعية القيادة هتحسسك انك عالي عن الارض مش زي عربيات تانية تحس انك لازق في الارض
وكمان انا لاحظت ارتفاع عصاية الفتيس الاوتوماتيك بشكل مبالغ فيه تحس انه برج القاهرة يعني كان افضل انه يبقا اقصر من كده شوية وبالذات انه ممكن يضايقك وانتا بتضبط زراير التكيف
وكمان هتلاحظ ان الدركسيون كبير لكن بصراحة هوا خفيف مش زي ما الناس بتقول انه تقيل
اما عن اماكن الازرار الغريبة فانا لاحظت فعلا كده
لكن بصراحة الزراير كلها في متناول ايدك ومش بعيدة عنك
الازاز الكهرباء زرايره ممكن تطولها بسهولة
المالتي فانكشن التحكم فيه سهل على الرغم انه خلف الطارة
اما عن وضعية الجلوس لباقي الركاب فهيا لا تقل اثارة ومتعة عن وضعية قيادة السائق
العربية من جوه واااااااسعة جدااااااا والكنبة اللي ورا ممكن تشيل 3 من الحجم الضخم او 4 رفيعين بمنتهى الراحة
......................... ................
الخامات الداخلية
العربية خاماتها الداخلية معقولة (مش وحشة ومش حلوة) لكن افضل من عربيات كتير في فئتها
......................... ................
التقفيل
تقفيل العربية ممتاز وانا لم الاحظ عيوب في التقفيل وافضل من عربيات كتير في فئتها
......................... ................
التقييم العام للوجان (من وجهة نظري)
الشكل الخارجي 7/10
الوسع الداخلي 10/10
التقفيل 9/10
الخامات الداخلية 7/10
......................... ................
من الاخر
اللوجان صفقة رابحة وعربية ممتازة
واتمنى اني اكون افدتكم
وللاسف انا مصورتش العربية
وتقبلوا تحياتي
......................... ................