مصر موتورز مجتمع السيارات - نقل ملكية السيارة من الالف للياء

السلام عليكم
انا حبيت انقلكم تجربتى مع الشهر العقارى والمرور لاول مرة فى حياتى وذلك للافادة والاستفادة
الموضوع كلة خد معايا 3 ايام
اول يوم طلعت على الشهر العقارى ومعايا كل توكيلات العربية والرخصة والبطاقة وبعدين اشتريت عقد بيع سيارة ودخلت عالموظف راجع على الورق وكتب البيانات وقالى روح للتقدير روحت لموظف التقدير فتح الجدول اللى عندة وكتب المبلغ وختم العقد وقالى روح الخزنة ادفع روحت دفعت وخدت الايصال وبعد كده رجعت للموظف الاولانى راح كمل التسجيل وقالى روح اختم العقد من مدير المكتب ختم النسر طبعا وخلص اول يوم
تانى يوم روحت المرور الجديد اللى تابع لمنطقتى السكنية اشتريت ورق من الشباك اسمه ورق نقل ملكية وطلعت على الضابط راجع على الورق وراح ادانى التاشيرة على الورق وبعد كده دخلت على مهندس الفحص لسه بيقولى ياباشا الستارة الخلفية شغالة روحت رزعتة 20 جنية راح قال لواحد معاه ارفع البصمة الفنى لاقيته بيقولى يابيه الماتور سخن مش عارف ارفع البصمة روحت حطيت العشرة جنية فى جيبة لاقيتة اتشقلب ونام تحت العربية وراح مدخل ايده من ورا الاكصدام وخد البصمة زى القرد ورجعت تانى للمهندس راح ختم الورق وكتبلى فية للمرور القديم عشان اطابق البصمة روحت للضابط راح خاتملى بختم النسر وطيران على المرور القديم دخلت على شباك مطابقة البصمة رزعته الورق وقالى اقعد شوية لغاية الدوسية ينزل شوية ولاقيتة بينده عليا روحت لاقيتة شغال فى الورق بتاعى خلص مطابقة البصمة وقالى اختم من الضابط روحت ختمت تانى بختم النسر ورحت طالع على نيابة المرور ودفعت المخالفات وجبت الشهادة وعملت الاستعلام الامنى ونزلت تانى للضابط عشان ختم النسر تالت مرة وبكده خلص اليوم التانى والحمد لله
تالت يوم طلعت عالمرور بتاعى ومعايا كل الورق روحت للمهندس اللى فحص راح كتب شوية كلام وختم بالختم بتاعه وكلاكيت رابع مرة ختم النسر روحت خارج بعد كده على بتوع التامين الاجبارى دفعت واخدت الاستمارة وروحت على شباك المعاناه قصدى شباك نقل الملكية وصلت للشباك بعد ساعة ونصف طبعا عشان الطابور وطول ماانا واقف فى الطابور سامع الناس بتقول للموظف ياابو حمادة اتاريها كلمة السر قولتله صباح الخير يابو حمادة راح ضحك وقالى فين رشا افتكرت ساعتها فيلم عسل اسود روحت رزعة 20 جنية قالى صباح الفل روحت اديتة الورق وادانى وصل الضريبة رحت دفعت فى الخزنة ورجعتلة قالى فك النمر وروح على شباك الرخص فكيت النمر وشوية لاقيت الموظف بتاع الرخص بينده عليا ادانى امر صرف وامر استلام وقالى روح سلم النمر روحت شباك النمر خد منى امر الاستلام ومضى علية وختمة وادانى صورة منه رجعت على شباك الرخص ادانى الرخصة الجديدة ورجعت تانى على شباك النمر خد الرخصة وراح طلع بالنمر الجديدة مضيت على اذن الصرف وخدت النمر والرخصة وطيران على البيت عشان انام وبكده بقت العربية بتاعتى رسمى فهمى نظمى وعقبال المرة الجاية