اشتريت تويوتا كورولا 1994 اتوماتيك أرجو الافاده
 

السلام عليكم ورحمة الله وبركاته

الحمد لله اشتريت تويوتا كورولا 1994 اتوماتيك 1300 سي سي وبحاله ممتازة
لكن فيها بعد الملاحظات أرجو تفيدوني فيهم

1- لما بجيب الدركسيون علي اقصي اليمين أو اقصي الشمال بسمع صرخة
2- رمز البطاريه بيكون موجود في التابلوه لما تكون العربيه منورة مارش بس
لكن لو دورت الموتور تختفي
3- لما بدوس علي دواسة البنزين قوي لحد نص المسافه مثلا بسمع صرصرة
ولسه ماجبتش دواسه البنزين لحد الاخر لاني لسه ماطلعتش بيها علي السريع
4- بعد ما غسلت العربيه في مغسلة من تحت بقيت بسمع صوت طقطقة مع دواسه الفرامل علي السلانسيه او السرعه البطيئه لكن مش بسمعها علي السرعات العاليه
5- في رعشه بسيطه جدا جدا في جسم العربيه علي السلانسيه بس
وسالت صاحب العربيه قالي كومبروسر التبريد عايز يتربط كويس وواحد تاني قالي
الجلب اللي عليه الموتور

أتمني تقدروا تفيدوني في الملاحظات دي وأكون شاكر جدا ليكم

* ازاي اعرف ان عربيتي ABS ولا لأ
* أيه الافضل لعربيتي بنزين 80 ولا 90 ولا 92
* العربيه بتحك جامد جدا جدا في المطبات لو في اوزان ورا او 3 افراد

أسف جدا علي الاطاله ومتشكر مرة تانيه علي المنتدي الرائع ده

رد: اشتريت تويوتا كورولا 1994 اتوماتيك أرجو الافاده
 

الف مبروك
اكشف على طلمبة الباور
نور البطارية ده العادى
احتمال تغير بلى العجل
التيل وحش شوية
محتاج بصه على قواعد الموتور
معليش العربية وسيبها على الفبريكا
بس ممكن تغير سوست ومساعدين
واى بنزين نظيف من بنزينة نضيفة شغال

رد: اشتريت تويوتا كورولا 1994 اتوماتيك أرجو الافاده
 

1- لما بجيب الدركسيون علي اقصي اليمين أو اقصي الشمال بسمع صرخة

سير الباور محتاج يتشد او يتغير

2- رمز البطاريه بيكون موجود في التابلوه لما تكون العربيه منورة مارش بس
لكن لو دورت الموتور تختفي

فعلا دا الطبيعى فى كل العربيات

3- لما بدوس علي دواسة البنزين قوي لحد نص المسافه مثلا بسمع صرصرة
ولسه ماجبتش دواسه البنزين لحد الاخر لاني لسه ماطلعتش بيها علي السريع

الصراحة الاصوات صعب الحكم عليها من غير ما تتسمع

4- بعد ما غسلت العربيه في مغسلة من تحت بقيت بسمع صوت طقطقة مع دواسه الفرامل علي السلانسيه او السرعه البطيئه لكن مش بسمعها علي السرعات العاليه

انا رايى انه طبيعى بس فعلا كاجراء وقائى اكشف على التيل

5- في رعشه بسيطه جدا جدا في جسم العربيه علي السلانسيه بس
وسالت صاحب العربيه قالي كومبروسر التبريد عايز يتربط كويس وواحد تاني قالي
الجلب اللي عليه الموتور

الرعشة اسبابها كتير لو بسيطة جدا جدا زيى ما بتقول فيبقى كويس
لكن لو عايز تجود فقائمة البحث طويلة
ابتدى فعلا زيى ما قالوا قواعد ماتور و كومبريسور التكييف طالما صاحبها قال فهو ادرى واحد بيها

أتمني تقدروا تفيدوني في الملاحظات دي وأكون شاكر جدا ليكم

* ازاي اعرف ان عربيتي ABS ولا لأ

جهاز ال ABS مميز و ديى صورة لخاجة قريبة منه
http://repairpal.com/images/managed/...p_01.16.12.png
دا غير انك حتلاقى الريليى بتاعه راكب لو العربية فيها abs

* أيه الافضل لعربيتي بنزين 80 ولا 90 ولا 92

92

* العربيه بتحك جامد جدا جدا في المطبات لو في اوزان ورا او 3 افراد

فعلا متعليهاش عن الفابريكة اخرك تغيير مساعدين و سوست لو تعبانين

رد: اشتريت تويوتا كورولا 1994 اتوماتيك أرجو الافاده
 

@ ahmedsalah
الف يبارك فيك وتسلم علي الرد الممتاز
وفعلا هاخد العربيه واظبط الحاجات دي في اقرب وقت

@ احمد على
متشكر جدا يا أحمد علي صورة توضيح الاي بي أس
بس غصب عني لازم اعلي العربيه عشان حلاوة المطبات اللي في مصر
وأجرب احوطلها بنزين 92 وأشوف الفرق

باذن الله هاتابع معاكو بعد تصليح كل واحده

رد: اشتريت تويوتا كورولا 1994 اتوماتيك أرجو الافاده
 

مفيش كلام تانى يتقال
بس عاوزك تغير سير المجموعة لاتة سبب صوت الصرير
كمان لازم تغير زيت الباور