سيارتي الافيو 2014 اتوماتيك وصيانة ال 5000 ( تقرير )
 

السلام عليكم ورحمة الله وبركاتة

النهاردة عملت صيانة ال 5000 كيلو وكنت فاكر ان العملية هتكون مرهقة بس الحمد لله عدت علي خير

اولا بالنسبة للتوكيل

الاول انا حاولت احجز بالتليفون عشان متاخرش ويبقي ميعادي محدد والخدمة تبقي تمام
اول ما اتصلت ادوني ميعاد بعد 5 ايام ولما لقيت مفيش مواعيد اقرب من كدة قلتلهم مش عايز احجز ومش عامل صيانة دلوقتي لان بصراحة موضوع 5 ايام دة استفزني جدا

النهاردة بعد ما خلصت مشاويري بصيت في الساعة لقيتها 2.30 م قلت اروح التوكيل وانا ونصيبي يا اعمل الصيانة او معملهاش النهاردة مش فارقة

روحت مركز منصور اللي في الاسكندرية - العامرية الكيلو 28

اول ما دخلت لقيت قدامي حوالي 3 عربيات بعد ما دخلوا جالي المهندس وخد بيانات العربية وسالني علي طلباتي ولو باشتكي من حاجة في العربية وبعدها خد العربية علي جوة وقاللي استني في الاستراحة وممكن اتابع العربية من الاستراحة عشان هما مركبين كاميرات في الورش وهاقدر اتابع

في الاستراحة معرفتش اتابع حاجة قلت انزل بنفسي واخش الورش ملقيتش حد سالني انت داخل فين او عايز اية وفي لحظات لقيت نفسي جوة جنب العربية وتابعت الصيانة وهما رافعين العربية وبيربطوها وبيغيروا الزيوت والفلتر بس لقيت وقفتي ملهاش لزمة دورت علي المهندس قاللي اول ما العربية هتخلص هيبعتوللي مسج علي الموبايل

مفيش بعدها بنص ساعة لقيت رسالة علي الموبايل بتقولي ان العربية خلصت روحت حاسبت في الخزنة وختمت الضمان بالصيانة اللي اتعملت وروحت اشوف العربية لقيتهم بيغسلوها واستلمتها مباشرة

اللي لاحظتة في اثناء الانتظار ان كل الموجودين متضايقين جدا ووقتها عرفت انهم كلهم كانوا حاجزين الميعاد وكلهم خلوهم ييجوا الساعة 10 الصبح وفضلوا ملطوعين لغاية الساعة 5 العصر بدون اي سبب غير ان المهندسين والعمال بيتلكعوا ومبيخلصوش شغلهم غير علي اخر الوقت وفعلا انا دخلت وعملت الصيانة وخرجت وفيهم كتير جدا لسة عشان كلام فارغ زي ان اورق لسة مخلصش او الفاتورة ناقصة مش عارف اية او المهندس اللي استقبلهم لازم هو اللي يسلمهم او اي كلام من دة

الخلاصة عايز تخلص شغلك في التوكيل متروحش بدري واتاخر زي ما انت عايز وخليهم في الاخر عشان هما كدة كدة هياخروك وهيبوظوا اليوم بتاعك

ثانيا بالنسبة للعربية بعد 5000 كيلو وبعد ما سوقتها في السفر ووسط البلد وفاضي ومحمل العربية علي الاخر ناس وشنط وغيرة وبالليل وبالنهار

العربية جميلة جدا بالنسبة للفئة بتاعتها
يعني ثبات محترم لغاية 120 ودة مش محتاج اكتر منة كرب اسرة وباستخدم العربية في تنقلاتي
تكييف جميل وفي الصيف دة اكتر حاجة استعملتها كانت علي 2 لاني مستحملتش برودة اكتر من كدة
كاسيت جميل بصوت نقي
استهلاك بنزين كويس جدا وخصوصا علي الطرق السريعة
كاوتش سئ وبيلم اي مسمار في طريقة زي ما يكون مغناطيس
ارتفاع مناسب عن الارض يخللي العربية متحكش في المطبات مهما كنت محمل عربيتك

اتمني اني اكون فدتكم باللي حصل معايا ولو حد عنده اي سؤال باذن الله هاجاوبوا علية



,

رد: سيارتي الافيو 2014 اتوماتيك وصيانة ال 5000 ( تقرير )
 

رد: سيارتي الافيو 2014 اتوماتيك وصيانة ال 5000 ( تقرير )
 

عقبال صيانة المليون :HAPPY_~211:

رد: سيارتي الافيو 2014 اتوماتيك وصيانة ال 5000 ( تقرير )
 

ربنا يباركلك فيها

رد: سيارتي الافيو 2014 اتوماتيك وصيانة ال 5000 ( تقرير )
 

الف مبروك الصيانة وعقبال صيانة ال 100000