تجربتي مع الشيروكي و مركز خدمة أكثر من ممتاز ...
 

من حوالي شهر... وفقت في شراء سيارة جيب شيروكي موديل 2000 ... مانيوال 4 سلندر 2500 سي سي... و الحمد لله... اساسياتها كلها طلعت ممتازة... بس أكيد المستعمل بيحتاج شغل علشان يفوق...

بالصدفة البحته.. عرفت مركز خدمة في منطقة صقر قريش - المعادي (على الأوتوستراد) يملكه 3 شركاء كلهم كانوا بيشتغلوا في توكيل عز العرب...

و كلمة حق... ناس أمناء جدا جدا و شغلهم أفضل من شغل التوكيل... الى جانب أنه كله بيكون قدام عينيك...

أول مرة رحت المركز ده كان قبل اتخاذ قرار شراء العربية... و كشفت عليها عندهم...

الأجهزة اللي عندهم حديثة جدا و زي اللي موجودة في التوكيل بالظبط....

كشفوا على العداد (من خلال الكمبيوتر الداخلي) و اكتشفوا ان العربية عاملة 300 ألف كيلو مش 100 ألف زي عدادها ما بيقول...

كذلك تم الكشف على آلات الجر و الشاسيه و باقي الأساسيات... و كانت كلمتهم أن العربية كويسة... بس فيها 3-4 آلاف جنيه مصاريف...

و فعلا توكلت على الله و نفذت فيها... و عملتلها اللازم من ناحية الحاجات اللي بتحتاج تتغير...
و كان الاجمالي شامل مصنعيات و خامات و بقشيش... 2100 جنيه تقريبا...

تم تغيير 4 بوجيهات و طقم أسلاك
فلتر هواء
زيت موبيل 10,000 و فلتر زيت
طقم تيل أمامي
عدد 2 أويل سيل (بيكونوا بين الفيتيس العادي و فيتيس الغرز)
زجاج أمامي (القديم كان فيه شروخ)
صب قاعدة فيتيس
تغيير زيوت الكورونة الخلفية و الأمامية (بزيت 140)
تغيير زيوت الفيتيس العادي و فيتيس الغرز (بزيت 90)



معلش اذا كنت طولت عليكم... دا أول موضوع ليا في المنتدى...
و أي حد عنده استفسار عن الشيروكي أو مركز الخدمة المذكور ... يسأل و أنا تحت أمركم...

رد: تجربتي مع الشيروكي و مركز خدمة أكثر من ممتاز ...
 

اهلا بيك يا مينا نورت المنتدى

كنت عايز اسألك عن كبس الموتور طلع كام وحالتة عامة ايه دلوقتى وعملت فيه حاجة اكتر من تغيير الزيت ولا لاء

ثانيا ايه موضوع صب قاعدة الفتيس ديه هيا كانت مكسورة فى البودى نفسة يعنى ولا مفيش قاعدة بتتباع جاهزة فانتو صبتوها !!؟

معلش انا مش فاهم المقصود بالصب ايه اصلا

والف مبروك عليك العربية يا باشا وربنا يملاهالك بركة ويكفيك شرها يارب واهلا بيك مرة تانية ptmnlo123per122

رد: تجربتي مع الشيروكي و مركز خدمة أكثر من ممتاز ...
 

مينا بيه فام شرفنا هنا ! رجل الديزل و الشيروكي الاول :D

من ساعه ما ربنا فتح عليك بالحته ال"شيل و اكوي" بتاعتك دي و محدش عارف يتلم عليك علي المازنجر يا عم .. الله يسهله يا عم :D

ابو نورا ... بلاش تهري الراجل اسئله من الاول كده .. الراجل تبعنا برضه :D

رد: تجربتي مع الشيروكي و مركز خدمة أكثر من ممتاز ...
 

دا نورك يا أبو النور كله :)
بص يا سيدي... أولا بالنسبة لكبس الموتور فهشام ماعمللهوش قياس أساسا... هو دور العربية و طفاها حوالي 6-7 مرات ورا بعض... و سمع صوت الموتور و كبس البنزين...

بالنسبة لقاعدة الفيتيس... فديه عبارة عن قاعدة حديد (على شكل مربع كدا) و نايمة عليها حديدة تانية (على شكل اسطواني) و الاسطوانة ديه بتكون كلها مليانة كاوتش ... و الفيتيس بيبقا تحميله كله على الكاوتش ده....

__O__ <-- زي الشكل ده كدا

فمع الوقت و كتر الاهتزازات في الفتيس... الكاوتش ده بيتهري
و الحل انك تجيب قاعدة تانية... و ديه سعرها (حوالي 500 جنيه الهندي و 950 جنيه الأمريكي)

الصب مش هيكلفك أكتر من 80 جنيه...

الخلاصة أن الشيروكي ديه عربية تقدر تمشيها بقرش و تقدر تمشيها ب10 قروش.. و مش هتقول لأ في الحالتين...

رد: تجربتي مع الشيروكي و مركز خدمة أكثر من ممتاز ...