مصر موتورز مجتمع السيارات

http://masrmotors.com/vb/picture.php...id=3766http://
كلنا بنقابل دي على الطريق وفيه ناس ماتعرفش عنها حاجه الا انها اول ما تشوفها توسع يعني تشوف حته ف الطريق بعيده تمشي فيها
الموضوع ده للي عايز يتعرف على التريللا والعربيات النقل عموما وهيبقى كلام مبسط سلس يعني خالي من الفذلكه والحذلقه
يعني ماتتوقعش انك ها تطلع من هنا مهندس سيارات بس اوعدكم تطلعوا بحاجات مفيده يمكن .. يمكن تنفعكوا
اول حاجه ايه دي ؟ دي تريللا او راس تريللا وده علشان نميزها عن الجرار اللي هنتكلم عنه بعدين واللي كان عليه مشاكل واضرابات ديسمبر 2010 انما مبدئيا خلينا ف دي حلوه ومالهاش ف الاضرابات
بسرعه دي عربيه نقل 400 حصان بس مش كل العربيات النقل عند الرقم ده دي بتختلف من عربيه للتانيه بس انا بقربلك الارقام عشان تقارنها بعربيتك الملاكي
نكمل : المكنه ع العربيه اللي ف الصوره 6 سلندر حرف V ودي برضه تختلف من عربيه للتانيه يعني فيه مكن عدل زي الملاكي برضه ولكن كلهم متفقين ف انهم يشتغلوا بالجاز اللي هوا السولار
طبعا لازم تربوا وكمبرسور هوا علشان الهوا هنا عليه عبء جامد وطبعا كلنا بنعدي جمب النقل وبنسمع العربيه وهيا بتفرمل بتعمل فسسسسسسسسسس ده هوا وهاابقى اقولكم حكايته ايه
فيه كمان بور ستيرنج وتكييف ف العربيات الحديثه وبرضه المكن متفق انه يكون بالطول مش بالعرض
وورا المكنه فيه الفتيس حاجه كده قد البرميل ونفس فكرة الفتيس العاده وتخفيض السرعات على التروس لكن مع بعض التعديلات علشان طبعا العربيه حمولتها بتبقى كبيره ومحتاجه عزم كبير وهيا طالعه عشان كده ممكن تكون سمعت كلمة غيارسريع وغيار بطئ وهنبقى نتكلم عليها برضه وفيه عربيات نقل فتيس اوتوماتيك ولا مش مصدقيني ؟ وبيشتغل بزراير مش عصايه كمان
اللي ورا دولاسمهم الدفرنسات وهما هنا اتنين وفيه عربيات بيبقى فيها واحد بس طبعا بتكون حمولتها المسموحه اقل واعتماديتها برضه اقل واللي قدام تحت الكابينه وراكب فيه الكاوتش اسمه الاكس او الدونجل القدماني او دونجل الدركسيون انما يعني ايه دونجل ؟ اللي عاوز يعرف يسأل وانا اقوله
واللي فوق ورا دي اسمها الصينيه لانها شبه الصينيه فعلا انما فيها فتحه ف النص علشان يدخل فيها البنز اللي ف المقطورة ويتحركوا الاتنين مع بعض
الكابينه اتنين قزاز كهربا مرايات كهربا وسنتر وراديو سي دي وكرسي السواق ممكن تعديل ارتفاعه وطاره ملتي فنكشن وزراير القزاز ف الابواب مش زي اللوجان ماعلينا بس برضه مش كل العربيات كده فيه عربيات من غير تكييف والازاز عادي والمرايات ظبط يدوي والموضوع كبير
وكمان هنبقى نتكلم عن السواقين ومغامراتهم ومش بعيد اجيب لكم سواق اون لاين تسالوه ويجاوبكم
بس دا لو رديتوا عليا
ياللا سلامو عليكم