حكايتي مع ( شيفرولية افيو) "وسوء التصنيع"
 

أنا معايا الأفيو من شهر ٤ وطلعلي فيها بلاوي وهي
١) أكس شمال عيب تصنيع وإتغير
٢) تزييق في العافشة متحلش لحد دلوقتي من ساعة ما إشتريت العربيه راحت التوكيل عشان الموضوع ده حوالي ١٥ مره
٣) الهاند بتعمل صوت تكه وصلحوها كذا مرة وكل ما تتحل ترجع تاني بعديه بإسبوع مع إني ما بشدش هاند وأنا ماشي خالص
٤) لمبة البنزين بتعلق من ساعت ما جبت العربيه و متصلحتش
٥) العربية كانت بتترج جامد وغيرو الطنابير
٦) في حاجه إسمها البوابات Tps ودي بتعطل وملهاش حل العربية بتكبس بنزيل بمزاجها يعني شويه تدوس وشويا لأ وبتاكل بنزين بغباوه ١٦٠كم/صفيحه
٧) تارة الدركسيون معوجه للمرة التانية

ولما رحت المركز الرئيسي الي في طريق مصر إسكندرية وتخنيئت معاهم
قلولي حكايت البوابات دي مشكلة في كل العربيات ومش معروف سببها(يا فرحتي)
وهما غيرولي بعد الخنائه
١)مساعد
٢) نظام الفرامل كله
٣) صلحوا البوابه بس قلولي هترجع تاني
٤) نزلوا سوفتوير جديد للعربية
٥) عملولها زواية
٦) عدلو التاره

لكن
١) لمبة البنزين قالولي مفيش قطع غيار ولما تيجي العوامات بتاعت البنزين هنقلك والعداد بقى بيعلق مع إنو كان شغال كويس قبل ما أوديهلهم
٢) تزيقت العفشه لسا متصلحتش
دا وهما لسا عملنها إمبارح!!!
٣) قاعدة المتور مفكوكة
٤) العربية بتحدف يمين للمره ٥ من ساعت ما جبتها

أنا عامل بالعربيه ١٢٠٠٠ كم بالظبط

رد: حكايتي مع الأفيو "وسوء التصنيع"
 

????????????
لا حول ولا قوة إلا بالله
قدرك كده للأسف
لكن مهما حصل فى النحس دا أفكرك بشئ واحد بس:
قريبا هتفكر تبيع العربية
أرجوك تقول مشاكلها للى هيشتريها وهو وقراره

رد: حكايتي مع الأفيو "وسوء التصنيع"
 

اولا قدر الله و مشاء فعل

انا راي بيع العربيه و اخسر فيها 10 احسن متتعبك

ده المستعمل مبيعملش كده

رد: حكايتي مع الأفيو "وسوء التصنيع"
 

ptmnlo123per160
يا خبر..... للدرجه دي.....

ptmnlo123per126

فعلا المستعمل عمره ما بيعمل كده .... ولو بقاله 20 سنه


ر بنا يصبرك ويعوض عليك.... متعرفش الخير فين

بس هي دي التقفيل المصري ولا الكوري؟؟؟؟

رد: حكايتي مع الأفيو "وسوء التصنيع"
 

طبعا شىء مؤسف وليك حق تزعل بس ده ميخليكش تتعقد من العربية

بص اولا ميبقاش اعتمادك كله على التوكيل انا دائما لما كان يبقى فى العربية حاجة كنت اكشف عليها برة واروح للتوكيل وانا عارف العيب وممشيش الا لما يغيروه

بناء على الوضع الحالى حضرتك لازم تكشف على العفشة عند حد او مكان محترم تتاكد ان كل حاجة تمام وتعرف محتاجة ايه بالظبط وده اللى يتكتب فى جوب الاصلاح واذا كان فيه حاجة لازم تتغير تتاكد من الكلام ده ورقيا برضو (المفروض بيتعمل اذن صرف من المخزن ويرفق بامر الاصلاح)

لنفرض مثلا ان العفشة سليمة وبس ناقص تغيير قواعد الموتور يبقى يتغيرو وتتاكد زى ما قولتلك

وتخرج من التوكيل على مركز ظبط زواية محترم برضو ترصص وتظبط وتطلع تجرب لحد ما تتظبط الحدفة واذا كان فيه لسه شغل فى العفشة بتاع الزوايا هيقولك وظبط الدريكسيون برضو هما هيعملوهولك

ومتدايقش نفسك ديه عيوب مقرفة معاك بس متكرهكش فى العربية ولا تخليك تبيعها وتخسر فيها حرام

وتابعنا عملت ايه

اه صحيح بخصوص سينسور ال TPS ده فعلا مشكلة فى الانجكشن عامة ومحتاج تغير السنسور بس اسأل عليه برة بكام احتمال يكون نفس بتاع الانوس ويكون رخيص ان مكانش برضو متمشيش غير لما يتغير السنسور فعلا لان اعادة تحميل السوفتوير وتنظيف السنسور والكلام ده كله مش بيحل المشكلة
وعلى فكره استهلاك البنزين زيادة بسبب السنسور برضو

فانت ملخص مشكلتك دلوقتى السنسور ده يتغير وتغير القواعد وتظبط الزوايا وترصيص العجل (وتكشف على الكوتش) وتراجع على العفشة

على فكره الكلام ده يفضل ان اى حد شارى عربية اقتصادية وخاصة التقفيل المصرى / ايرانى / تركى الخ انه يراجع علية والعربية لسه زيرو حتى

ده بقى العادى مش الافيو بس ومتقلقش باذن الله هتتظبط معاك وتبقى زى الفل ptmnlo123per171