مصر موتورز مجتمع السيارات - الجزء الثانى من عودة GOL للحياة : اصلاح المارش خطوة خطوة

الجزء الأول من هنا

عودة GOL للحياة بعد الحادث و تجربة الاصلاح - مصر موتورز مجتمع السيارات

نيجى بقى لموضوع انهارده المارش و سنينه

الأعراض بتاعته :-

1- تعتيل فى الدوارة

2- لما العربية بتسخن جامد بعد 200 كيلو مشى مثلا بيعتل اكتر

3- جه فى مره و راح فاصل خالص مفيش يا عم يرضيك يهديك مفيش فايده يا حج ده انا لسه لامم العربية مفيش فايده

قولت خلاص نفك و نشوف القصة ايه :

الفك و الكشف :

المسامير اللى بنتعامل معاه علشان الفك

1-مسمارين 13 رخمين لكن بالصبر هتخلص

2- فكيت قطاش البطارية قبل ما افك اى سلك

3- فكيت فيشه السولونيد بتاع المارش و مسمار 13 بتاع الموجب اللى رابط المارش

4- اخدت المارش البيت و فكيت مساميره بالترتيب ده

أ- مجموع 3 مسامير بتوع السليونيد

ب- مسمارين ربط جسم المارش ببعضه دول مسمارين 7 مم و يتفاكو بحذر علشان لو راس المسمار بوشت هتبقى قصه

ج- اسحب المارش من ورا طلع معاك يبقى هسيسيب مجموعة البيندكس فى مكانها ما طلعش يبقى هيسحبها و يطلعو سوا " ممنوع اى عنف "

د- فكيت اخر مسمارين ورا و دول رابطين غطاء صاج صغير مغطي على عمود الموبينه فى اخره تيله تلات تربع دايره تتفك المارش هيطلع بالشكل ده

" ملحوظة المسمارين دول برضو رابطين قرص الشربون فى جسم الغطاء الخلفى للمارش "

وصلت للمنظر ده فى الاخر :)

http://www.masr1.com/di/VQ63/1.jpg

الصورة من الشمال لليمين

1-غطاء المارش الامامى

2-مجموعة البندكس الترس اللى بيروح للحله فحصه ان السنون سليمه مش مكسورة او معووجه و " انه بيلف لوحده فى اتجاه و بيمسك فى اتجاه " لو بيلف فى الاتجاهين يبقى بايظ "

3- التراك بتاع المجموعة و لما تحركها لقدام و لورا هتتحرك معاك بمرونة

4- الشوكة و التعامل معاها بحذر و تتأكد انها سليمة مافيهاش كسور و بتتحرك بمرونة و فى وسط الشوكة فيه جلبة بتركب على غطاء المارش الامى و انت بتجمع لازم تكون حالتها كويسه مش مشققه او ناشفه

http://www.masr1.com/di/0I6X/3.jpg

5- فى اخر الشوكه ماسك تقال السيلينويد مهم يكون العمود سليم و السوسته بتنضغط بدون ما تقفل و فيها نفس

6-بعد كده السيلونيود و ده فحصه لما ياخد كهربته هشرحه و احنا بنقفل

7-الموبينه و مهم ما يكونش فيها حاجه مفصولة و اخرها الريش التوصيل بتاعتها نحاس تكون فى مكانها كلها مفيش سنه مخلوعه او مهزوزه

8-ظرف المغناطسيات اللى هو جسم المارش و ده ليه كلام طويل فى وقته

9- قرص الشربون و ده المفروض يكون فيه 4 شربون كاملين نضاف بيوصلو الكهربة تمام للمارش و 4 اقفاص ليهم بسوستهم و يوصلو الكهربة تمام للموبينا و ده مكانش حاصل و هنا المشكلة :)

http://www.masr1.com/di/HCGJ/2.jpg

10- اخيرا غطاء المارش و ده بيكون فيه حلقه نحاس علشا تمسك المارش و اتمنى تكون سليمه لو خربانه او مكسورة الموبينه هتلب و لازم تتعمل حلقه غيرها عند الخراط

تحديد العطل : -

1- شربون بايظ

الحل تغيير الشربون كلها

الاصلاح :-

1- نزلت جبت طاقم شربون جديد ب 20 جنيه

بيتباع بناء على حاجه من اتنين يا توريله الشربون القديم او ما تبقى منه و القفص و هو يجيبلك بديل يا تاخد الكود بتاع المارش و تدور عليه

مثلا المارش عندى بيكون مكتوب على جسمه كود بادئ ب اربع ارقام 9000 و ده للنوع البوش اللى معمول لكل العربيات البرازيلى و بعدين الكود التانى 3 ارقام

161 دول بقى للمارش نفسه و هتلاقى على الكيس نفس الكود

دية صورة للكيس و جمبيه ال 3 شربون اللى كانو راكبين و الرابع مش موجود اساسا :)
http://www.masr1.com/di/6VJK/6.jpg

2- نضفت قرص الشربون كله فى البنزين علشان اعرف اشتغل عليه

لقيت الشربون ملحوم لحام كهربة و انا ما عنديش لحام كهربة ..!!

" الحل اللى لقيته متاح انى حطيت فلاكس على السلك القديم لضمت عليه الجديد و لحمته قصدير بكاوية لحام قوية علشان تخلى النحاس كله يشرب القصدير

و بعد كده جمعت الشربون تانى و انا بقفله حطيت غطاء ازازه صغير علشان اعود السوست على الضغطه الجديدة خصوصا ان كهربائى زمان اشتغل فى المارش و بدل ما يغير الشربون راح شد السوست بتاعة القفص بقى بالشكل ده

http://www.masr1.com/di/G3QH/4.jpg

ملاحظتين :

1- لحام القصدير لو ناشف هتبقى كارثة و هيفك

2- قرص الشربون فيه موجب و سالب الجسم بتاع القرص سالب و بعدين عليه حته فايبر و راكب فيها الموجب

بقول ده ليه علشان تحت اي ظرف ممنوع السلك النحاس يلمس الجسم بتاع القرص

3- و انا بجمع حصلت مشكلة فى ظرف المغناطيسات و مغناطيسين منهم طلعو مع الموبينه

علشان اعرف اركبهم تانى اتبعت الأتى :-

أ- لكل قلب مغناطيسى توزيعه واحده SNSNSN شمال جنوب شمال جنوب

ب- عشان تحدد ده فى التركيب استخدمت مغناطيس مستطيل الصحيح هينجذب لطرف و بنفس وضعيته يلف مع القلب هيتنافر مع طرف اللى بعده على طول و ينجذب للى بعده و كده

ج- علشان تحدد الطرف المطلوب تركيبه هتشوف انت وقفت فيه تجاذب ولا تنافر لو تنافر يبقى الطرف اللى يركب يحصل معاه تجاذب بنفس اتجاه المغناطيس اللى بتستخدمه فى الاختبار لو تجاذب يبقى الطرف اللى يركب تنافر

د- التركيب ليه ريجلاش شوف كلهم رايحين ناحية اليمين يبقى هتظبط على اليمين لو رايحين على الشمال يبقى هتظبط على الشمال

ه- لو طرف وقع على الارض هيتكسر

و- لو اتكسر منك لا قدر الله ما ترميش المارش هتشترى غيره من باب اللوق عند بتوع الاجهزة العلمية

4-تنضيف ريش التوصيل النحاس بصنفره ناعمه و بدون عنف لحد اما تنضف و تبقى بتبرق

5- تجميع الجزء الامامى و تزييت مجموعة البندكس و الجلبة اللى اتكلمت عليها قبل كده تتحط ليها شحم ابيض زى بتاع الفيديوكاست او يتحط ليها فازلين

6-تركيب الشربون و ده لازم يتم بصبر و حذر شديد و استخدمت حته ماسورة بى فى سى علشان تظبط الريش على الشربون بالحركة الاهليجية للماسورة
http://www.masr1.com/di/MHE9/5.jpg
7- تقفيل المارش و تقريط المسمار لحد اما تسمع التكه بتاعته
http://www.masr1.com/di/M92J/7.jpg
8- ادارة ترس المارش يدوى 20 لفه بلقمه على مقاسه مش بأى كماشة او اداة تضر الترس و السبب من كده ان الفرش تبداء تطبع المسار بتاعها

9- تركيب التيلة و تشحيم غطاء الصغير اللى كان مغطيها و ربط مساميره و ظبطها مع الشربون

الاختبار :-

الاتخبار بيتم بسلك نحاس 6 ملى طرف يتربط فى جسم المارش و سلك كمان نفس العيار يتربط على المسمار اللى فى سيلونيود المارش

فيه فيشه تالته فى السيلونيود بيوصل عليها كلبس ركبه دلوقت هوصل السلك اللى ماسك فى الجسم بالارضى كويس جدا

السلك التانى النحاس هيوصل على موجب البطارية

دلوقت هنثبت المارش على ترابيزه و نضغط بقماشة او فوو نخلى السلك ابو كلبس يوصل على الموجب هنلاقى ترس البندكس طلع لبره و المارش دار

احيانا بسبب عدم ربط الارض او الموجب كويس ياخدالشرز و البندكس يطلع و ما يلحقش يدور وصل كويس وعيد تانى

التجميع النهائى :-

بنفس طريقة اللى طلع بيها المارش هيرج بيها لماكنه

هنربط المسمار بتاع الموجب و بعدين نربط المسمار ال 13 بتاع الحلة اللى فوق

نسند بأيد و نجمع روباط بأيد

نربط المسمار اللى تحت نفس الطريقة

نبداء نربط بالمفتاح او السيستيم لحد اما نسمع تزيقة المسمار

نوصل بقية الكلبسة و فيش الكتاوت بتاع المارش و نوصل قطاش البطارية و نسمى الله و ندور

و دية النتيجة

( بعتذر عن صوت سير الدينامو و البلية البايظه بتاعته انا زى ما قولت فى الموضوع السابق سايبهم للشتاء علشان ليهم حساب معايا )

http://youtu.be/HidllvqG63Q

شكرا ليكم