ضعف فى السحب وبرجلة
 

النهاردة رحت للميكانيكى لتغير طقم السيور وبلية الكتينة وجوان غطا التكيهات عشان كان بيجيب زيت المهم قبل عمل الصيانة رحت غسلت الماتور بناء على طلب الميكانيكى عقبال ما الصنيعية اللى عندة تيجى المهم غسلت العربية وتم بالفعل تغير السيور والبلية وكذلك تغير البوجيهات وسلك البوجيهات ونضفلى البوابة بسبراى التنضيف وطلعت اجرب العربية سحبها بقى سىء ولما اشغل التكيف تبرجل وتبقى عايزة تبطل رحتلو تانى قلى دة عشان انت غسلت الماتور هو اللى عامل كدة وامشى بيها مشوار ولو لسة كدة لحد بكرة ابقى تعالة ابصلك عليها الحقيقة انا مش عارف اية اللى حصل للعربية هل اللى حصل دة فعلا من غسيل الماتور ولا هو قسم الكتينة غلط وبيكابر ارجو الرد عشان شكلى كدة هرو اتخانق

رد: ضعف فى السحب وبرجلة
 

تقسيم الكاتينة مش مظبوط و كمان شوية هتبتدي العربية تطفي منك

رد: ضعف فى السحب وبرجلة
 

لو السير متقسم مظبوط يبقى تشك فى البوجيهات و سلوكها ( ممكن اللى جبتهم يكونوا بايظين )
و ممكن تكون الموبينة باظت من الغسيل

رد: ضعف فى السحب وبرجلة
 

مش انتا بعد الغسيل العربية كانت كويسة صح
انا من وجهة نظرى الى ممكن يخنق العربية التقسيمة مش صح او سلك البوجيهات جرب القديم مفيش حل تانى بس الغسيل مش بيعمل حاجة خالص فى العربية

رد: ضعف فى السحب وبرجلة
 

من بين كل 100 ميكانيكى واحد بس بعرف يضبط الكاتينه و الباقى (على متفرج)
إعمل اللى عليك و سيبها تسخن و خد بيها مشوار حلو و بعدين شوفها لو لسه مش مضبوطه ارجع له
و خليه يفك البوجيهات و شكلها هو اللى هيقوله (انت غلطان)
و أكيد هيكسل انه يضبط الكاتينه, رخم عليه على قد متقدر و خليه يوريك العلامات و الزونب أدام بعض بالضبط.
(لسه كنت فى الحوار ده من يومين ,3 ميكانيكية و بيحلفو أنها مضبوطه بس العلامات مش أمام الزونب يبقى كلامهم !!!)