مصر موتورز مجتمع السيارات - إستشارة بخصوص ال Throttle & Idle Sensor

السلام عليكم،

محتاج خبراتكم في إستشارة ميكانيكية. أنا عندي لوجان بلاك لاين موديل ٢٠١٢. من فترة والعربية أحيانا بتبطل عند السلانسيه. يعني أبقي سايق ولما أجي أدوس فرامل ودبرياج العربية تبطل. الموضوع عشوائي تماما يعني ساعات يحصل وساعات لأ. بس بيحصل أكتر لو ماشي في طريق زحمة فبتحرك وبقف كتير. أو لو اتحركت بالعربية الصبح من غير ماسخن.

المهم رحت بالعربية للتوكيل فرع المقطم ولما كشفوا عليها قالولي محتاج تغير ال Throttle وهتدفع ٢٠٠٠ جنيه!! كنت عايز أشتم الصراحة. من ناحية تانية فهمت من المهندس الفني إن المشكلة مش في ال Throttle شخصيا المشكلة في ال Idle Sensor!! هو دا اللي شايفين إن المشكلة فيه لكن السنسور مابيتباعش لوحده. لازم أغير ال Throttle كله!!
في الأخر إتفقت معاهم إنهم ينضفوا ال Throttle وامشي بيه كدة واشوف هل المشكلة هتتحل ولا لأ. طبعا مش عايز أقولكم العربية بطلت مني وانا لسة خارج من عندهم.

أنا محتاج مساعة حضراتكم في الأتي:
١. هل فيه مكان بيبيع ال Idle Sensor لوحده؟
٢. لو مافيش، فيه مكان بيبيع ال Throttle بسعر أرخص
٣. هل فيه إحتمالات تانية إن المشكلة ماتكونش بسبب ال Idle Sensor?
٤. هل فيه مكان تاني ممكن أروحه غير الوكيل المستفز دا وخصوصا إن عربيتي طلعت برة الضمان خلاص؟ بس يكون مركز صيانة مش ورشة. أنا ساكن في الشيخ زايد يعني الأفضلية لزايد وأكتوبر.

شكرا مقدما