مصر موتورز مجتمع السيارات - اشتريت التو 2008 انجكشن

السلام عليكم اعضاء المنتدى الكرام

انا بفضل الله اشتريت التو 2008 1100 سي سي النجكشن مكيفة وحبيت انقل تجربتى مع العربية دى بعد تجارب سابقة من 128 الى نيسان صنى 2008 و اليارس 2009 اوتوماتيك حتى الالتو

انا طبعا كان المبلغ معى لا يتجاوز ال 40 الف جنية وانا مقتنع بانى اجيب موديل عالى والعربية تكون صغيرة عن انى اجيب عربية كبيرة والموديل يكون بعيد

كان قدامى عدة اختيارات منها الفليشيا 99 مكيفة لكن سمعت عن مشاكل موتورها فبلاش وكمان كان قدامى السيينا لكن مش عارف لية انا مش حاببها وكمان العربية دى صاجها زبالة وبتجيب بارومة بسرعة والاكسنت والاكسيل بس ملقتش يومها حاجة كويسة والحلوة كانت ب 47 الف يعنى مش قد امكاناتى

بصراحة انا رايح وناوى على الالتو لانى بجد عاوز عربية صغيرة ومحندقة لان مشاويرى فى الاسماعيلية قليلة جدا ومبسافرش كتير اخرى هايبر وكارفور مرة كل كام شهر وكمان علشان مراتى ناوية تتعلم السواقة وتدخلنى السجن لانى عارف سواقتها هتكون ازاى :120102~318: ربنا يستر
[SIZE="4"]
المهم رحت سوق مدينة نصر الحى العاشر ولفيت شوية ملقتش حاجة عدلة غير واحدة حمراء 2008 مكيفة انجكشن 4 سلندر باور وازاز كهرباء وحالتها كويسة فاصلت فيها واخدتها على 38 الف جنية [/SIZE

ملاحظاتى على السيارة
السحب ممتاز جاى بيها من القاهرة على 100 وثباتها كويس جدا لكن فى وسط المدينة التكييف بياثر على السحب ولازم تزود رجلك على البنزين علشان تجيب معاك
التكييف بتاعها ثلاجة بمعنى الكلمة وعندى احسن من النيسان لانه تقريبا كان عاوز يتشحن وبرضة احسن من اليارس بصراحة رائع
الصوت مكتوم لانها عربية انجكشن بس مع التكييف الصوت بيعلى شوية لكن عادى ومقبول ومع قفلة الازاز مش بسمع صوت عالى
الصالون جميل وكويس لكن فى رايي لا يصلح الا لاسرة صغيرة اخرها اربعة افراد بالغيىن وللسفر مانصحش بيها لان السحب هيكون ضعيف مع العدد 4 يعنى اخرها مشوار القاهرة 120 كم كل شهر مرة لانها عربية صغيرة ومعمولة للمشاوير القصيرة

التابلوة جميل تقليدى انوارة هادئة فية كل المؤشرات اللى الواحد بيحتاجها يعنى الزيت والبطارية والابواب والبنزين وال rpm والكم وفرامل اليد والحرارة والتكييف

الموتور هادئ جدا وكل حاجة فية واضحة انا لسة ماشتغلتش فى حاجة فيه الا البوجيهات بس ولما غيرتها لقيتها مقاس 14 والمحل قالى دى بتاعة الشارك والرينو وجبتها والله ب 140 جم MAD

الشنطة الخلفية صغيرة جدا جدا جدا يادوب تحط فيها شنطة متوسطة او 2 صغيرين وممكن تشيل الرف اللى موجود فيه سماعتين ورا وساعتها المساحة هتتضاعف معاك

الصاج بتاعها بحس انه متين جدا عدا الرفارف حاسس انها ضعيفة ومش بتستحمل

استهلاك البنزين رائع وافضل بعد تغيير البوجيهات يعنى انا حسبتها تقريبا التانك 35 لتر مشلا حوالى 450 الى 500 كم معظمها والتكييف شغال وساعات بشغل العربية واقف بيها واسيب التكييف شغال يعنى استهلاك من 13-14.50 كم للتر فى رايي مع العلم انى مشيت نص التانك بالبويجات القديمة وكانت مهببة

طبعا الاكسسوارات ازاز كهرباء مساحات خلفية فتح الشنطة والتانك من الداخل لمبة الصالون مكانها جميل ومناسب فية درج فى التابلوة واسع ويشيل وكمان فى درج خارج التابلوة مفتوح بصراحة ملوش ريحة اللازمة ولو كانو خلوة زى اى تابلوة عادى كان اشيك وافضل وطبعا فى الموديلات الجديدة تلافوا الموضوع دة

لقيت الباب الخلفى اللى على مساعدين مبيفتحش للاخر وطبعا اللى باع لى العربية عامل اختراع عبقرى علشان يفضل مفتوح وميترزعش على دماغ الواحد جايب (دراع مقشة ) شفتوا العظمة المهم انا عملت حركة صايعة هبقى اقولكم عليها بعدين واستغنين عن دراع المقشة :fun_36_1_4[1]: لانى سالت على المساعدين فى الاسماعيلية عندنا بيقولى 270 جم وانا شايف ان دة كتير جدا لان اخويا جايبهم للاسكودا فليشيا جداد ب 100 جم

عموما العربية جميلة ودمها خفيف والواحد حاسس انه سايق حمامة صغيرة بس المشكلة فى التعليقات من الناس اللى شافتنى معايا نيسات وتويوتا واول مشافونى بالالتو حسيت فى كلامهم بنوع من المواساة كان الحال اتقلب بيا وبقيت بشحت مثلا يا جماعة دى عربية زى اى عربية تانية فيها 4 كوتش و4 باب و4 سلنر

باذن الله لما اغير حاجة فيها هكتب تقرير علطول وحاسس ان العربية دى هتعمر معايا

:GROWIN~12: