مصر موتورز مجتمع السيارات - ايه خطورة وضع بنزين 80 للسيارات الحديثه

والله ابدا ابدا يا جماعة
لا البنزين 80 فية شوائب ولا الـ 92 نقى

طب ادونى فرصة بس اشرحلكم وجهه نظرى بعد بحث طويل فى الموضوع دة

اولا مصر مش بتستورد بنزين من الخارج ولا حتى دول الخليج
وانما بتعتمد على الانتاج المحلى من البنزين
البنزين فى صورتة اولالى واحد الـ 80 والـ 90 والـ 92 والـ 95
اللى بيفرق بنهم هو المادة اللى بتتحط وبتدى رقم اوكتان للبنزين
يعنى البنزين فى صورتة الاولى واحد ولكن الاضافة اللى بتتحط ودى بنستوردها من الخارج هى اللى بتدى رتبة للبنزين وبتخلية اما 80 او 92
يبقى كدة شبهة النقاء والرواسب مش موجودة اطلاقا
وبكدة الاجزاء المتعاملة مع سائل البنزين هى فى امان
وهى
تانك البنزين
طلمبة البنزين
خراطيم السحب
فلتر البنزين
مسطرة الرشاشات
الرشاشات
كدة البنزين وصل لغاية غرف الحريق ودى النقطة المحورية والهامة فى قصتنا
وهنا بجد الفرق بيبان جدا بين بنزين 80 و92
عشان نتكلم والصورة تبقى واضحة
لازم نعرف ان كل محرك لة نسبة انضغاط وهى بكل بساطة
النسبة او الحجم المزاح من اول ما البستم بيكون فى النقطة الميتة السفلى وبين النقطة الميتة العليا
ولو جينا نكتبها فى صورة معادلة هانقول ان
نسبة الانضغاط = الحجم المزاح + حجم غرفة الحريق مقسوم على حجم غرفة الحريق
وكل لما النسبة دى زادت يبقى بنزين الـ 92 مناسب او الامثل ليها
تعالو ندى مثال
العربيات القديمة مثل الفيات وموديلات التسعينات كانت نسبة الانضغاط هى 8:1
فى الحالة دى احسن بنزين هو بنزين 80 وبنزين 92 هو مضيعة للمال

انما فى العربيات الحديثة اللى نسبة انضغاطها 10:1 بنزين 80 لا يصلح ليها وانما الامثل هو بنزين 92

طب اية الفرق بين الـ 80 والـ 92
هو قدرة البنزين على عدم الاحتراق المبكر تحت تاثير الضغط
يعنى نفهم من كدة ان بنزين 80 بيتحرق تحت الضغط اسرع من الـ 92
الاجابة نعم
وهو دة اللى بيعمل ظاهرة الصفع او ( التسقيف)
كلنا عارفين ان افضل توقيت للاشعال هو لما يكون البستم فى النقطة الميتة العليا او بعدها بقليل جدااااا
وفى حالة نسبة الانضغاط العالية مع استخدام بنزين 80 بنلاقى ان البنزين انفجر قبل وصولة للنقطة الميتة العليا مما يسبب قوة ضغط عكسية على سطح البستم وبالتالى يبقى البستم لسة فى مشوار الضغط ويلاقى قوة ضغط عكسية مما يسبب فى سماع صوت التسقيف

انما فى حالة استخدام بنزين 90 بيحصل الاشتعال فى المعاد المقرر والمناسب
الموضوع دة اتكلمنا فية كتير
وعشان كدة بطلب من الادارة تثبيت الموضوع
ودى اول طلب لية فى تثبيت موضوع او رد
وانا جاهز لاى سؤال