مصر موتورز مجتمع السيارات - حكايتي مع البطاريه

سلام عليكم
طبعا كلكم عارفين اني جبت لانسر من حوالي 3 شهور و الصراحه بسم الله ما شاء الله ما زعلتنيش في حاجه .
من يوم ما جبتها و انا مطنش البطاريه و روحت اكشف عليها بعد شراء العربيه بشهر و قبل سفري للاسكندريه
لقيت ما فيهاش ميه و الكهربائي زود الميه و حط كمان شويه ميه نار ز مشيت بالعربيه عادي جدا
بقيت الاحظ ان لما ادوس بنزين الاقي النور بيزيد و يقل مع الدوسه فقولت اكيد الميه حاميه
روحت لبتاع البطاريات قالي لازم تفك البطاريه و تجيبها نظبط الميه لان ما ينفعش اظبطهالك دلوقتي و البطاريه سخنه .
بالرغم اني كنت راكن العربيه 8 ساعات علشان ما يقوليش الكلمه دي !!!
المهم قولتله طب قلل الميه و انا حشتري ميه مقطره و بكره الصبح ازود الميه تكون البطاريه بارده.
الكلام دا من اسبوع بالضبط
اخويا اخد العربيه يروح راس البر و رجع يوم الجمعه و مشيت بالعربيه عااااادي جدا و النور مضبوط
و كل حاجه تمام .
لحد امبارح بالليل ماشي بيها و روحت عند ناس قرايبي قعدت عندهم ساعه و نازل من عندهم
كان واحده جارتهم واقفه و عارفاني
و كانت عاوزه تجوزني بنتها ههههههههههه :shy:
المهم بتقولي الف مبروك العربيه جميله اووووي
قولتلها الله يبارك فيكي يا طنط و ركبت :thinkW19:
ادور العربيه و سمعت صوت المارش عادي و ما لقطتش
جيت ادور العربيه تاني............. مش عاوزه تدوور !!!!!!ptmnlo123per195
ايه دا مش ممكن معقول ما كانت كويسه
ادور تاني لا صوت مارش ولا اي حاجه و نور التابلوه واطي جدا و الكلاكس صوته اتخنق فجأه!!!
ايه اللي بيحصل دا ايه اللي انا شايفه دا ptmnlo123per1127
نزلت ابص علي الكابلات يمكن يكون كابل مفكوك شويه ولا حاجه لقيت كله سليم
طب ايه السبب
لقيت صاحبتنا واقفه و بتقولي فيه ايه
قولتلها زي محمد صبحي في الهمجي دا البطاريه عمرها الافتراضي خلصptmnlo123per115 يا حوريه ههههه بس طبعا ما قولتش حوريه
و في عقل بالي بقول يا ام عين مدوره ptmnlo123per146
المهم لقيت واحد ابن حلال ماشي بالصدفه و زق معايا العربيه و دورتها
اول ما دارات لقيت الكلاكس صوته اتعدل و النور بقي طبيعي و كل حاجه تمام
طبعا لا شغلت لا نور ولا كاسيت ولا اي حاجه و بقيت ماشي بالعربيه كده.
و كل ما ارعش بالفوانيس علشان اشوف طريقي احس بنتشه في العربيه !!!!!
بقيت مش مصدق ان البطاريه فجأه كده تعمل حركه النقص دي من غير اي مقدمات خصوصا انها سائله مش جافه .
المهم قمت الصبح توكلت علي الله و قولت انزل اشوف اقيس شجن الدينامو و اشوف العيب منين
قمت و نزلت و اخدت واحد من المصنع عندي و زقيت العربيه و روحت لبتاع البطاريات قالي الميه حاميه
طب يا سيدي الحل ايه قالي نخفف الميه شويه
خفف الميه و قاس الشحن قالي خلي الكهربائي كمان يقيس الدينامو علشان انا مش متأكد
روحت للكهربائي قاس الميه الاول قالي دي خفيفهptmnlo123per1131 !!!!!!
و بعدين بقي هو كل واحد عمال يلعب في الميه اللي يخففها و اللي يحميها و اللي يليفها ولا ايه الحكايهptmnlo123per149.
و الكهربائي قالي العيب مش دينامو دا عيب بطاريه .
قولت اتأكد و روحت لكهربائي اخصائي دينامو و مارش و حكيت له اللي حصل قالي بطاريه
و ممكن تعملها من غير اي مقدمات و عموما نتأكد نقيش شحن الدينامو .
لما قاسه لقاه كويس مافيهوش مشاكل .
قولت ما بدهاش بقي نشتري بطاريه و بالمره اجيب واحده جافه علشان اريح دماغي
روحت للحاج عبد الله بتاع البطاريات
حازم: عاوزين بطاريه يا حاج عبد الله
الحاج عبد الله: اوي اوي تؤمر يا حازم بيه
حازم: عاوز جافه و تكون ac delco
الحاج عبد الله: وماله عندي هنا واحده بس خد بالك لانها ناقصه في السوق
حازم : هيا كام امبير؟؟
الحاج عبد الله: 55 امبير
حازم: لا انا عاوزها 70 امبير .
الحاج عبد الله: ال 55 حلوه و كويسه و العربيه بتنزل بيها اصلا و و و و و
حازم:طب ماشي حتديهالي بكام من الاخر و انت عارف اني زبونك
الحاج عبد الله: 340 جنيه+ البطاريه القديمه.
حازم:دا اخر كلام ؟؟
الحاج عبد الله :قالي اه و الله و عامل واجب و هيا اصلا مش في السوق .
في الوقت دا كان الواد اللي عنده بيفك بطاريتي قولتله استني ما تفكش حاجه حروح اجيب فلوس و آجي.
المهم مشيت من عنده و لقيت رقم غريب بيرن عليا مش عارف رقم مين دا
برد علي التليفون لقيت واحد بيقولي انا بتاع العيش و الحلاوه
طلع اخويا و حبيبي صلاح عبد النبي بيتصل يصبح عليا فبقيت فرحان اوي و اتكلمنا شويه حلوين
مع وعد منه انه يجي الفطار يوم 14 رمضان ان شاء الله و بجد كانت مكالمه رائعه
شكرا يا ابو صلاح.:)
بعد ما قفلت مع صلاح باشا عملت شويه اتصالات بواحد قريبي استشيره قالي علي مكان تاني بيبيع بطاريات
و واحد صاحبي عنده محل كاوتش بكلمه قالي روح للحاج عبد الله و قوله انت ابن خالتي و هو حيعمل
معاك الواجب.
روحت محل بطاريات لقيت عنده اندونيسي و كوري و ما فيش ac delco
و البطاريه ب 300 + البطاريه القديمه و بقيت متردد
فقولت ما بدهاش اروح للحاج عبد الله و ادفع 40 جنيه زياده و اجيب الحاجه اللي واثق منها و خلاص.
المهم و انا في الطريق خطر في دماغي واحد صاحبي بقالي كتير ما شوفتوش و عنده محل بطاريات و كاوتش و عمري ما اتعاملت معاه بس كنا جيران و بنلعب في الشارع سوا لما كنا صغيرين .
فقولت اروح اشوفه و اسئله بالمره و لو فيه عنده حاجه كويسه مش حيغشني.
المهم روحت له و بعد السلامات و الترحيب قعدت معاه و سألته
حازم: اخبار البطاريات ال ac delco ايه عندك منها يا باشمهندس
محمود: ايوه شوف اي بطاريه انت عاوزها و خدها و فيه كمان نوع مصري اسمه بوتستلايت جميل جدا
و يمكن كمان انضف من ال ac delco>
حازم : طب بكام يا حوده
محمود: المصري ب 275 + البطاريه القديمه و ال ac delco ب 285 + البطاريه القديمه!!!!!
حازم : اوك يا محمود عاوز واحده ac delco بس 70 امبير
محمود:خد ال 55 امبير علي اللانسر حلوه مالوش داعي تدفع 40 او 50 زياده في ال 70 امبير و البطاريه اللي بتنزل مع العربيه حتي البومه ال 1600 هيا ال 55 امبير ركبها و ما تقلقش.

بصراحه بقيت واقف مذهول الفرق بين محلين 55 جنيه ليه يعني.
المهم بعت الواد عنده فك البطاريه و انا قاعد بشرب بيبسي و سجاير علي حساب صاحب المحل ptmnlo123per1147
و ركب البطاريه الجديده و دورها و كله تمام و اديته 400 جنيه رجعلي 135 جنيه
و قالي انا عملتلك تخفيض 20 جنيه كمان.
كتر خيرك يا باشمهندس و نخدمك في الافراح .و هو قالي عيب يا حزوم دا المحل بتاعك و اي اوامر
و اخدت بعضي و مشيت و انا موفر 75 جنيه بحالهم في بطاريه من غير ما اسافر اجيبها من مكان تاني و كمان شربت بيبسي ptmnlo123per122
لمجرد بس اني قولت الف شويه عليها ما اشتريش علي طول .رغم ان الحاج عبد الله عارفني و دايما بجيب من عنده بس الجشع و الطمع و الاحساس ان الشخص اللي بيبيع له بيثق فيه و مش حيبص في مكان تاني.

طبعا عملت ليكم صداع و دوشه بس حبيت احكي الموقف كله من اوله لاخره علشان الناس تستفيد.

1.اول ما تشتري عربيه مستعمله اكشف علي بطاريتها لو كانت سائله علشان ما يحصلش ليك اللي حصل ليا بسبب اني اهملت البطاريه اول ما جبت العربيه و لما حسيت بالمشكله كسلت افكها و اشحنها مكنش دلوقتي زماني مغير البطاريه.

2.البطاريه لو سائله تراجع عليها كل شهر عند كهربائي متخصص و ما تهملش في العربيه.

3.لا تثق في اي تاجر ايا كانت صله معرفتك به و لما تشتري بطاريه اسأل في كذا مكان الاول علشان البطاريه من الحاجات اللي الناس بتستسهل فيها و مش بتغيرها غير و هيا مضطره و دا بيخلي التجار دايما يضربوا اي سعر لان انت كده كده حتشتري و العربيه عطلانه.
لاء دور العربيه بالزق او الواصله و لف بيها لحد ما تلاقي افضل سعر للنوع اللي انت عاوزه.

.4 ودا اهم حاجه لما تخرج من بيتك اقرأ دعاء الخروج من المنزل و دعاء السفر علشان ربنا يحميك من المواقف المفاجأه و ما تاخدش عين محترمه زي الليانا اخدتها امبارح و الحمد لله انها جات في البطاريه و بس.