رخصة القيادة ببلاش ومن غير لارشوة ولا واسطة
 

السلام عليكم
انا كان ليا تجربة جميلة مع المرور (مرور السلام)
اولا: انا ماكنتش بعرف اسوق رحت مدرسة اتعلمت مبادىء السواقة وللحق كان ليهم فضل عليا بعد ربنا وبعدين رحت اشتريت العربية وانا لسه بتعلم واخويا كان بيخرج معايا بعربيته فكان التعليم مكثف وبقيت بخرج بعربيتى فى اوقات مختلفة وشوارع فاضية و شوارع زحمة و بعد نهاية التدريب اخدت حوالى ساعتين تدريب اقماع فى المدرسة والحمدلله اتدربت بعربيتى (عشان الابعاد) على كل اشكال الاقماع رايح جاى
وثانيا: حفظت الاشارات كويس والمهم كمان انك تبقى فاهمها وبصراحة الاخوة فى المنتدى هنا ساعدونى بحاجات كتير زى الامتحان النظرى (الكمبيوتر) والاشارات وكتاب المرور كمان اللى بيحطوا منه امتحان المرور النظرى
ثالثا: رحت المرور مرة قبل الامتحان عرفت ايه الاوراق المطلوبه واشتريتها عشان يبقى ملفى جاهز يوم الامتحان عشان تبقى مركز فى الامتحان بس وسالت عن الامتحان النظرى وعرفت انه مش بالكمبيوتر دا شفوى والظابط هو اللى هيسالك مباشرة وكمان رحت شوفت الامتحان العملى ولقيته سهل جدا
رابعا: اهم حاجة: وهى الدعاء والتوكل على الله لانى قعدت ادور على واسطة ورغم انى كنت قبل كده جبت وسايط لناس غيرى لكن سبحان الله.... ربنا عز وجل شاء بان يكون اعتمادى عليه وحده وفعلا توكلت على الله و صليت ركعتين قضاء حاجة وهما فعلا ياجماعة مهمين جدا قبل اي حاجة ناوى تعملها وخاصة انك تبقى ناوى خير بانك ماتدفعش رشوة حتى لو حد حللها لك
فى المرور
اول ما تدخل الشارع تلاقى عيال وشباب وستات كلهم بيستقبلوا حضرتك اى خدمة ياباشا انت جاى تعمل ايه لو هتجدد او رخص مسحوبة اى حاجة احنا تحت امرك واحنا نعرف نخلصها لك (طبعا سيبك منهم) اه انت ممكن تشترى من امام المرور ورقة الاشارات لان هى دى اللى بيمتحنوا منها.
دخلت على الشباك المخصص والحمدلله الورق كان تمام و دخلت على الظابطPOLICEE سالنى عن اشارات كانت صعبة شوية نسيت اسمها الاصلى (اللفظ) ولكن قلت له معناها مثلا:
اشارة نهاية منطقة تحديد السرعة انا جاوبت بمسموح ليا تجاوز السرعة دى دلوقتى
قال لى انزل امتحن سواقة كان فى واحد بيمتحن والظهر اذن كان معاه صاحبه قال له استنى لما نخلص امتحان العملى الاول وبعدين نروح نصلى بصراحة الراجل ما ستناش راح لربنا الاول عملت زيه ودعيت ربنا بانه ييسر الامور ورجعت لقيت العربيات واقفة كل واحد مستنى دوره اخدت عربيتى و قلت بسم الله ولا حول ولا قوة الابالله
والحمدلله عديت بسلام وبصراحة اى واحد يدوب بيعرف يسوق كان يعدى الامتحان بسلاسة
المهم انا شايف الناس جنبى عمالة تدفع فى فلوسفلوس كتير وتعمل تليفونات و فى الاخر كل الناس اللى نجحت خلصوا مع بعض اللى دافع واللى لأ والحمدلله
لله الفضل من قبل ومن بعد
بجد ياجماعة خلوا واسطتكم ربنا بس وكفى بالله وكيلا
هتاخدوا ثواب كبير عشان ما دفعتوش رشوة وتانى حاجة هتوفر فلوسكhttp://www.masrmotors.com/vb/images/..._11%5B1%5D.gif
مع تمنياتى بالتوفيق

رد: رخصة القيادة ببلاش ومن غير لارشوة ولا واسطة
 

الف مليون مبروك يا استاذ ميدو بس انتا كان حظك حلو لان في ناس بتقابلهم غيلان لو مدفعتش المعلوم لو معاك رخصه درجه اولي وجي تطلع الخاصه هيسقطك بردك

رد: رخصة القيادة ببلاش ومن غير لارشوة ولا واسطة
 

انت نجحت لانك صليت الظهر
و دايما النصر كان بيجى بعد صلاة الظهر
و الله اعلى و اعلم

رد: رخصة القيادة ببلاش ومن غير لارشوة ولا واسطة
 

مبروك ياميدو يا جميل انت
واضح انك ابن حلال وطيب علشان كده ربنا وفقك

رد: رخصة القيادة ببلاش ومن غير لارشوة ولا واسطة
 

بس اوعدنا بقى ادام ربنا اهو

ان ما تستغلش السواقة بقى فى حاجات تضر الناس والبلد

زى السرعات الجنونية - القياده باستهتار - ............ الخ

القيادة مسئوليه عليك قبل ان تكون نعمة لك