ممكن في يوم الشمس ما تطلعش
 

سألت يوما:
ممكن في يوم الشمس ما تطلعش
يعني الليل يمتد
يعني الظلام يسود
وهل لو اتعودنا على الظلام هيبقى نور
قالوا: ما تسألش
يعني إيه ما أسألش
برده مش فاهم
يعني هأفضل نايم
ولا هأصحى وأقوم
ولما أصحى هألاقيها نور
ولو ما لقيتهاش، كدة ينفع أكون صحيت
قالوا: ما تصحاش إحنا أصلا عايزينك ما تفوقش
يعني إيه ما أفوقش
يعني هأفضل مسطول
عاجز مشلول
طيب وأعيش ليه
ما الأفضل أموت
ولا لأ ما تتمناش الموت
اتمنى المنبه يضرب ويفوقك
بس إزاي وأنا ما ظبطوش
يعني إيه برده، مش فاهمك
معنى كلامك إني لازم أنا أبدأ
لازم أتحرك
قالوا: لأ ما تتحركوش
استنوا المنبه يضرب لوحده، لكن ما تتحركوش
برده مش فاهم هيضرب لوحده إزاي
إنتم إلا صنعتوه
ظبطوه على إنه ما يضربش
عشان ما نصحاش وما نتحركش
بس نرجع تاني للسؤال الأولاني
لو ظبطه هأصحى ألاقيها نور
قالوا: المهم ما تظبطوش
لأ هأظبطه ما أنا لازم أبدأ
لازم أتحرك
مش هيضرب وحده
أنا متأكد
لازم حد يدوس على الزر
يظبط المؤشر على ميعاد الصبح
على ميعاد النور
وحتى لو صحيت ما لقيتش النور
هأفضل كل ليلة أحاول
ولازم في يوم هأصحى ألاقيه
هأصحى ألاقي النور موجود
قالوا: لازم تيأس، من غيرنا النور ما يتوجدش
لأ، عمر النور ما كان بإيديكم
إلي بإيديكم الظلم
لكن الشمس لازم هتطلع
ربنا أخرها علينا
عشان بس طاوعناكم في الظلم
أيوة كل ده وهم
هما عايزينا نفضل عايشين في الوهم
لكن الشمس لازم تطلع
دي سنة ربنا في الكون
مستحيل الشمس ما تطلعش
ده حتى في آخر يوم هتطلع
هتطلع من الغرب، بس هتطلع
أما كونها ما تطلعش
لأ، مستحيل الشمس ما تطلعش
الخواطر دي أنا كنت كتبتها في موضوع الدكتور تامر الجميل: نور الحرية. ثم خطر بذهني أن أنقلها في موضوع خاص، يعني يمكن أزود عليها
إذا عجبت أعضاء المنتدى طبعا، وشكرا ليكم

رد: ممكن في يوم الشمس ما تطلعش
 

خواطر جميلة وكلمات معبرة تحمل فى طياتها معنى كبير
شكرا لك

رد: ممكن في يوم الشمس ما تطلعش
 

نسير على خطاكم، ونستمد مما كتبتم، وطبعا الشكر ليك

رد: ممكن في يوم الشمس ما تطلعش
 

مش المهم إنك تغلط لأن كل الناس بتغلط
المهم إنك تحس إنك غلطت عشان تصلح
لازم الندم جواك يدفعك لتصليح الغلط
وإلا هتبني حياتك كلها وبعد ما تخلص
تلاقيها لازم تتهد لأنك بنيتها على الغلط
وساعتها الندم هيبقى حسرة، ومش هينفع الندم

رد: ممكن في يوم الشمس ما تطلعش
 

الحرق
كلمة لما بنقولها بيخطر في الذهن
الظلم والقسوة والعذاب والألم
إنسان بيحرق يعني بيظلم
يعني إنسان قاسي القلب
إنسان مهمته إيصال الألم
إنسان مهمته توسيع الجرح
لكن مش هو ده بس معنى الحرق
في إنسان بيحرق عشان يداوي جرح
جرح غائر جرح بينزف، قلب وسايل منه الدم
إنسان بيحرق عشان يوصل الدفء
لجسم بيرتعد من لسعة البرد
إنسان بيحرق عشان ينور طريق الظم
الظلم إلا عشش وباض وفرخ في العتمة وتحت خيوط العنكب

إذا كنا عشان نرفع عنا وعن عيالنا الظلم
لازم ننور طريق للحق
يبقى يحيا الحرق
إذا كنا عشان نوقف نزيف القلب
لازم نوصله لسعة الدفء
يبقى يحيا الحرق
إذا كنا عشان نتجمع
لازم في وسط الصحرا نحرق
لازم في وسط الصحرا نولع
أهي تبقى علامة في الظلمة تنور
تهتدي إليها الأنفس
إذا كان هو ده معنى الحرق
يبقى يحيا الحرق