مصر موتورز مجتمع السيارات - ملف ســـــــرى جداااا

أخوانى موضوعنا هو ملف سرى جدا -وسـرى لأنه بينا وبين بعضينا (أحنا المصريين)
مش عارف ليه بحب المنتدى ده وحاسس كأنه بيت العيلة اللى كلنا بنتجمع فيه ناكل ونشرب ونفتح قلبنا لبعض...
تعالوا نتكلم بصراحة أكتر وندخل فى الموضوع -يا ترى من وجهة نظر كل واحد فيكم أيه أحسن حاجات شيفنها فى بلدنا وأيه أسواء حاجات فيها ؟؟ ياترى بتحب مصـر ولأ لأ؟
ببساطة أكتر ..(السلبيات )

*انا عن نفسى شايف الناس بقت وحشة اوى وأتغيرت كتير -وماعدش فى روح أنتماء والكل عاوز يهج -الناس ساعة مايبقى معاك فلوس وذا منصب تلقى الكل صحبك وحبيبك وبيتقرب منك ويوم ما توقع فى مشكلة تلأقى اللى انت مديت له ايدك أول واحد بيبعد عنك ويهرب منك
*ما عدش حد بيحترم حد ولأ بيخاف من حد -قلة الأدب وقلة الذوق أصبحت يعلموها للناس فى التليفزيون اللى بيسموها كوميديا زى فيلم (خالتى فرنـســــــــــا )هى بصراحة همجية وأسلوب مقزز .
*ما عدش فى حاجة أسمها تعليم صح - تعليم حكومــى المدرسين مكبرة دمغها عشان تدى دروس وتعرف تعيش -بصراحة ليهم حق شوف مرتباتهم كام متأكلش عيش حاف !!!!!- تعليم خاص تلأقى فيه العيال هى اللى بتدرب المدرسين ويعملوا فيهم مقالب والمدرسة أصبحت للكوميديا والهزار والمدرسة بتزيف نتائج نجاحهم وتوهم اهاليهم أنهم متفوقين عشان تلم فلوس أكتر والعيال تستمر معاهم ..
*ماعدش حد بيرحم والناس بقت تفترى على بعض بالقول والفعل وماعدش حد راضىء والكل بيحسد غيره على اللى معاه(ده حتى أبنك بيحسدوك عليه) -حتى الضحكة الناس بتحسدك عليها ويقولوا ماهو أصلك رايق والدنيا ماشى معاك حلأوة .
*الكوسة كترت أوى واللى بيعرف يسببت ويقول أحلى كلأم هو اللى بيكسب -مش مهم انت خبريتك أيه ولأ عندك أيه-المهم تعرف تسببت مديرك أزاى وتضحك فى وشه بالباطل عشان تكسبه وتحطه تحت باطك !!!!!!!
*الأب فى الأسرة أصبح يغيب كتير عن المنزل ويوم مايقعد ياأما نايم ومش عاوز ييتكلم -يا أما بيتحدث مع الجماعة فى مشاكل الشغل ..الدنيا لهية الكل ومخلية الجميع بيفكر ولأ الغنى مستريح و لأ الفقير راضى-والعيل أصبح من صغره مشاغب وتافه بيقلد اللى بيحصل وبيتقال فى التليفزيون وبس لأن هو ده اللى هو شايفه أدامه وبيردد ألفاظ مش بتاعت سنه ( يا عم أشترى دماغك -موززة -فكك-أنت هاتصيع-هاشرحك ....الخ)
*الناس أصبحت تتكلم كتير عن بعض -بتحقد وبتفكـر كتير وأزاى تئزى بعض .
*أنا بصراحة نفسى أعيش فى سلأم وهدوء -عايز أغمض عينى وأفتحها وأنا مطمئن مش خايف من بكرة ومش خايف من حد -نفسى أعبد ربنا وأنا هادى النفس مش مستعجل -مش عاوز أكرووت الصلأة( والله فى أحيان كتير وانا بصلى بنسىء أنا صليت كام ركعة وبتلخبط ) !!!!!!!!!!!

-(الأيجابيات )
مش عارف بصراحة -يمكن أنتوا اللى تعرفوا وتقولولى .....بس انا عن نفسى بحس بالراحة كل ما ببعد عن المدنية وعن الناس-وأنا على البحر وفى حضن الجبال -وأنا فى زيارة القبور بحس براحة -لما برمى الدنيا كلهاوراء داهرى وأدخل الجامع أمسك المصحف وأصلى ساعتها بحاول أعيط وبحس بقمة الراحة -جربتوا تزوروا ملجأ أيتام ( راحة أخرى ليس لها نظير)
*أعذرونى أذا كنت صدعتكم وبعدت عن فكرة المنتدى... بس أنا بصراحة ماليش أصحاب ومعاكم فى المنتدى ده بحس بالراحة والصحبة الحلوة...
انا قررت أبدا بنفسى وأحاول أصلح السلبيات اللى مش عجبانىفى مجتمعى من أهل بيتى -يمكن فى يوم من الأيام بلدنا تتصلح حالها ونبقى زى الدول المتقدمة-

قال رسول الله صلى الله عليه وسلم
خيركم للناس أنفعكم للناس والدال على الخير كفاعله
صدق رسول الله