مصر موتورز مجتمع السيارات - صوت الماتور عالى بعد التليين للi10، إيه السبب؟

بعد لما جبت ال i10 الحمد لله كانت بتمشى كويس وجميل. وعلشان أوصل لأول ألف كيلو رحت بيها العين السخنة مع واحد صاحبى، بس هوه ساقها أكتر من نص المسافه وكانت رجله تقيله حبتين على البنزين (هوه عنده عربية دفع رباعى ومش جديدة وواخد على الدوس الجامد على البنزين).

المهم، بعد المشوار ده سوقت العربية بعديها بيومين لاقتها فعلاً تم تليينها (كانت عامله حووالى 700 كم ساعتها) بس لقيت إنى لازم أدووووس جامد على البنزين علشان تمشى. كنت قبل مشوار العين السخنة ده مع صاحبى بدوس خفيف تمشى على طول.

وحاجة تانيه برضه، كنت مثلاً عادى بمشى على سرعة 30 لى الجير التانى، بعد مشوار العين السخنة ده مع صاحبى بقى صوت الماتور عالى جداً لو مشيت على 30 على الجير التانى ولازم أحول على الجير التالت أوام. ولو مشيت على سرعة 60 على الجير التالت الماتور صوته بيكون عالى موت.

المشكلة إن الكاتالوج ناقص بعض الصفحات، ومن ضمنها الصفحات إلى فيها أغير على أنهى جير فى سرعة كام.

العربية جميلة وحلوة الحمد لله، بس مش عارف حكاية الصوت العالى عن اللازم ده (إلى حصل بعد رحلة العين السخنة مع صاحبى) سببه إيه. بحس إنها بتعافر جامد أوى ولازم أغير الجير بسرعة على جير أعلى.

أنا عملت صيانة الألف الأولى فى قليوب، بس المهندس مش سألنى حتى إذا كان فيه أى مشاكل، ولذا مش قلتله على مشكلة الصوت العالى ده إلى حصل بعد رحلة العين السخنة.

أنا دلوقتى عامل حوالى ألفين كم، أقل قليلاً، ومفروض أعمل الصيانة الجاية عند 500 كم (علشان حطيت زيت 5000 كم مش عشر تلاف).

محتاج خبير يقولى هل الصوت العالى ده طبيعى وأغير على الجير الأعلى وخلاص ولا فيه فى الموضوع سبب مفروض يتم تظبيطه ولا صاحبى ده خلى الماتور يزعل ويتعود على دوس العالى أوى على البنزين؟