|
مجرد فضفضة فى زمن الإخوان
السلام عليكم ورحمة الله وبركاته اخواتى واخوانى الكرام رجاء الا يتهمنى أحد بالهجوم على الاخوان المسلمين لاننى لست هجومية واعتقد اننى شخصية معروفة بالمنتدى منذ فترة ليست قصيرة واننى لا اتسم بالهجومية او التجاوز على أحد ومعظم الاخوة الاعضاء يعرفوننى جيدا منذ زمن بعد المقدمة دى عاوزة افضفض معاكم لا لشئ سوى اننى أعتبركم دائما إخوتى ويعلم الله ليس لى هدف الاساءة لأحد لاننى كتبت خطاب قبل ذلك لدكتور مرسى ووجدت هجوم شديد من البعض ومرة اخرى كتبت انى هقول (لأ) للدستور وبرضة زعل منى ناس وقالوا انى ضد الاخوان بصراحة انا عاوزة اقول حاجات تدور فى خاطرى وانا فى أشد الاسى و الحسرة و الحزن على فقراء بلدى وعاوزة أسأل سؤال لأولى الأمر فى بلدى لما أستاذ الجامعة يمرض ويحتاج عملية جراحية عاجلة ودقيقة وخطيرة ولا يجد له وسيلة سريعة من الدولة و لا نقابة و لا تأمين صحى ولا يحزنون ولا يوجد حل الا على حسابه وتصل تكاليف العملية الى مبلغ خيالى يفوق قدرات انسان شريف محترم استاذ جامعة ورئيس قسم و و و ويضطر لبيع شقة غالية عليه تعب فى ثمنها وكان يتعشم ان يحتفظ بها لأولاده ويضطر لبيع سيارته لإستكمال علاجه ولما يكون العلاج فى مستشفى مثل القصر الفرنساوى أو دار الفؤاد بأرقام لا يتخيلها عقل وشخص بهذا الوضع له من العزة والكرامة ما يمنعوه من السلف من أقارب او خلافه بالله عليك يا رئيس مرسى و يا أولى الامر مش هقول فين (العيش- الحرية - العدالة لاجتماعية ) لأ هقول فين إغاثة المريض فى البلد والفقير اللى ليس عنده شقة أو سيارة أو خلافه يعمل اييييه ؟؟؟؟ لكى الله يا مصر ولك الله يا فقير مصر والله انا حزينة جدا على الفقراء الفقير يموووووت واللى ماعهوش ما يلزموووش حسبى الله ونعم الوكيل اللى قالوا على الدستور نعم ايه رأيهم فى البلد واللى زعلوا منى لما ارسلت خطاب الى د/مرسى واللى هاجمونى لما قلت (لأ) للدستور واللى قالوا ان انا عندى فوبيا الهجوم على الاخوان عاوزة اقولهم ان نقابة المهندسين بتساهم فى العمليات الخطيرة اللى ممكن توصل ل 300 الف جنيه ومضاعفاتها هو 2750 جنيه ما شاء الله وتعطيهم للعضو المهندس ليس نقديا ولكن بخطاب تحويل للمستشفى المتعاقدة فقط مع النقابة مهزلة و ذل وقلة كرامة وبلاشهم احسن و أكرم تحياتى للدكتور مرسى تحياتى لكل الأخوان المسلمين تحياتى للعضو المحترم اللى عمل عملية تجميل لأنفه وكمان تحياتى لبطرس غالى اللى عالج عينيه ب 2 مليون ايام مبارك وعلشان محدش يتهمنى انى ضد الأخوان وخلاص تحياتى لحسنى مبارك وايامه الزفت المريض ايامه كان لا يجد من يغيثه ودلوقتى ايه رأيكم ؟؟؟؟؟؟ هذه مجرد فضفضة ولنا الله جميعا SLAM :140109~347: السلام عليكم ورحمة الله وبركاته والله المستعان |
رد: مجرد فضفضة فى زمن الإخوان
وعليكم السلام
موضوع متميز جدا البلد بظت عليه العوض شكر وتقدير |
رد: مجرد فضفضة فى زمن الإخوان
دى موروثات النظام القديم
ايام مبارك كان الاغنياء بيسافرو يتعالجو على نفقة الدولة فى الخارج وبيتعالجو من حسنة فى الوش وحاجات من دى واللى مريض مرض مزمن ومحتاج عملية بيفضل يجرى فى وزارة الصحة عشان يعمل قرار علاج على نفقة الدولة بـ 5 الاف جنية طب مهو الطبيعى ان حد عايش فى مصر وبيحمل الجنسية المصرية يتعالج على نفقة بلدة .....اية الغريب فى كدة ولية اجيب قرار علاج على نفقة بلدى مهو المفروض ان دة العادى الاخوان لم يسنو قرار بمضمون كلامك ودة ميعفهمش من التقصير ولكن مسالة الوقت |
رد: مجرد فضفضة فى زمن الإخوان
ليس دفاعا عن الاخوان ولكن .....
هم بشر يصيبون ويخطئون , ولا ننسي أنهم في الاصل جماعه خيريه خدميه تقدم خدمات كثيره للمجتمع أراها عن قرب من مستشفيات وعلاج للفقراء ودعم لهم , بالنسبه للرئيس مرسي فميراثه ثقيل من فساد النظام السابق طوال عقود مضت لن ينتهي تأثيرها السيئ بمجرد أنه اصبح هناك رئيس للبلاد , بالأضافه الي معارضه تعاني من هسس ومراهقه سياسيه طالما أن الرئيس لا ينتمي اليهم ونسوا أن الهدف في النهايه هو مصر وشعبها , الموضوع مش مجرد رئيس أي كان اسمه أو حزبه , لكن من وجهة نظري أن المشكله تكمن في جزء كبير منها في الشعب الذي لا يريد أن يتغير ومتخيل أن الثوره هتحل له مشاكله , المشاكل لن تحل إلا بالعمل وليس بالمسيرات والمليونيات كما نفعل .... طولت عليكوا بس ده وجهة نظري |
رد: مجرد فضفضة فى زمن الإخوان
موضوع متميز يا بشمهندسه أنا للاسف من كثرة التخبطات فى الاراء السياسية وغوغائية الاعلام المصرى مبقتش عارف مين الصح و مين الغلط وكل اللى بقولة ( ربنا يحفظ مصر و اهلها من كل سوء ) |
| الساعة الآن 03:28 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017