|
صيانة 20000 كم مازدا 3 بالتوكيل أم خارج التوكيل
السلام عليكم
بدون الدخول في مقدمات , كلكم تقريبا عارفين قصتي مع المازدا و مأساتي مع غبور ودة لينك لاخر موضوع عن صيانة ال 10000 و المهزلة التي حدثت لي داخل التوكيل http://masrmotors.com/vb/showthread.php?t=58649 المرة دة عايز اخد رأيكم , هل أكمل صيانة في التوكيل ولا أكمل بره و أريح دماغي؟؟؟ للمساعدة أنا حالخصلكم في نقاط مزايا و عيوب كل حاجة 1- مميزات الصيانة في التوكيل : الاحتفاظ بالضمان ( مع اني مش مقتنع أساسا إن غبور ممكن يصلح حاجة في الضمان دة يجيلهم سكتة قلبية ) 2- عيوب الصيانة في التوكيل : حدث و لا حرج .. يمكن الرجوع الى الموضوع الذي أشرت إليه لعدم الاطالة و - الدش - 3- مميزات الصيانة خارج التوكيل : كتيييير أولا حاتوفر تمن المصنعية الرهيب ثانيا حاتتأكد من كل حاجة بتتعمل أدام عينك ثالثا ( و دة الاهم ) مش حاتحس إنك بتنضرب على قفاك :) مع العلم بان عندي ابن خالتي عنده ورشة لصيانة السيارات التويوتا و عنده فني على أعلى مستوى كان شغال في توكيل تويوتا و لو احتجت قطع غيار ممكن أعصر على نفسي برميل لمون و أشتريها من غبور و أمري لله ( لو حد يعرف حد بيبيع قطع غيار مازدا أصلي في اسكندرية ياريت يعمل معروف و يقولي بالله عليكم ) و على أسوأ الظروف و بحسبة بسيطة بافتراض إن عمو غبور رضي عليا و غيري قطعة غيار على حسابه في الضمان ( و دة شيء غير متوقع ) , و القطعة دي تكون بحوالي 600 جنيه , فهي لا تساوي دفعي لمبلغ حوالي 3000 على الاقل في 10 صيانات حتى وصولي ل 100000 كم بالاضافة لأن مازدا شركة عريقة و معروفة بجودة الصناعة و احتمالي وجود عيوب صناعة مش كبيرة ولا إيه رأيكم أرجو الافادة من اخواني بالمنتدى |
رد: صيانة 20000 كم مازدا 3 بالتوكيل أم خارج التوكيل
لو مكانك بره التوكيل طبعا و حضرتك رديت
المازدا صعب اوى يبقى فيها عيوب تصنيع اذا كان انا باللانوس المعفشة طلعت من الضمان عند 15 الف و كملت مع نفسى و الحمد لله مظهرش عيب تصنيع اظن ان 10 تلاف مسافة كافية فى عربية يبانى لو كان فيها عيب كان ظهر توكل على الله و كمل بره |
رد: صيانة 20000 كم مازدا 3 بالتوكيل أم خارج التوكيل
هو المفروض الضمان ميسقطش الا لما تتخلف عن صيانتين كبار يعنى على ال 30 الف كم
وانا عامة شايف ان لحد ال 20 الف كم الاولى هتبان اذا كان فيه مشكلة كبيرة او لاء فكفاية لحد صاينة ال 10 الاف ومن هنا لصيانة ال 20 - 25 لكن انا عموماً مع الصيانة بره |
رد: صيانة 20000 كم مازدا 3 بالتوكيل أم خارج التوكيل
حمدلله علي السلامه يا استاذ علي والله ليك وحشه
وانا مع رأي الناس اعملها بره وكل اللي هتعمله هتغير فلتر الهوا والبنزين والبوجيهات والزيت وفلتر الزيت والعفشه اي حد لسه ابن اول امبارح يربطهالك ومش هتكلفك 20 جنيه والفرامل اي واحد بتاع فرامل يعملك احلي رجلاش ومش هتكلفك بردك 20 جنيه لكن لو عندك اي مشكلة تخص الميكانيكا او الكهربا فنصيحة مش هيبقي قدامك غير غبور وربنا يديك خيرها ويكفيك شرها |
رد: صيانة 20000 كم مازدا 3 بالتوكيل أم خارج التوكيل
إحنا عندنا فى بورسعيد تقريبا مفيش مراكز صيانة ﻷى سيارة ناهيك عن إنتشار الخليجى بشكل كبير جدا و العربيات ماشية زى الفل و ما سمعناش عن مشاكل لحد و الحمد لله هو فيه رأى دايما بيتقال ﻷصحاب اﻹسبيرانز صلح كل إللى تقدر عليه برة التوكيل بس حافظ على المتابعات الدورية مع التوكيل لإستمرار فى الضمان |
| الساعة الآن 03:57 AM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017