|
طلب نصيحة و تسعير شراء كابريس كلاسيك موديل 1983
السلام عليكم و رحمة الله
بدون مقدمات ورغي كنت عايز أستفسر عن حاجة أخو مراتي معروض عليه عربية شيفورليه كابريس 1983 هو مالوش في العربيات و كان بيسألني , قولت أستفسر من أحلى منتدى أنا طبعا قولتله في البداية ابعد عنها لأنها سيارة قديمة في السوق و ليس لها إعادة بيع ( حاتقعد في أرابيزك ) و قطع غيارها نار و غول بنزين و مش أي حد يفهم في تصليحها المهم كان عند رد على كل نقطة من اللي قلتهاله ( طبعا من كلام صاحب العربية ) : 1- بالنسبة للقدم : السيارة حالتها جيدة جدا و الموتور متجدد و الجير بوكس أيضا و قطع الغيار كلها أصلية و صيانتها ممتازة 2- بالنسبة للبنزين : صاحبها محولها غاز طبيعي 3- بالنسبة لإعادة البيع : قالي مش عايز أبيع و العربية سعرها رخيص ( لقطة ) يعني لو حبيت أبيع مش حاخسر كتير 4- بالنسبة لقطع الغيار : قاله على مكان في القاهرة بيشتري منه قطع غيار أصلية و سعرها رخيص جدا ( على حسب كلام صاحب العربية برضه ) و طبعا لا خلاف في أنها سيارة جيدة و واسعة جدا وو و و على فكرة السيارة دي أوتوماتيك كاملة و سعرها 20 ألف جنيه و قابلة للتفاوض ايه رأيكم ؟؟؟؟ هل تعتبر لقطة و يشتري ولا يقلق منها و يبعد أحسن و لو حايشتري ممكن نكشف عليها فين ؟؟ مع العلم بأننا ساكنين في اسكندرية محتاج رأيكم و نصايحكم لأن أمره يهمني جدا في انتظار الردود يا شباااب |
رد: طلب نصيحة و تسعير شراء كابريس كلاسيك موديل 1983
حبيب قلبي عم علي بص يا سيدي الكلام ده كله في الهجايص
ليه اولا العربية ديه قطع غيارها مش موجودة من الاساس هو بيتوفقلها قطع غيار بس مش بتاعتها الاصلية ثانيا بالنسبة لموضوع الاتوماتيك معروف ان الاتوماتيك اخره في العربيات من 7 ل 8 سنين في العربية علشان بعد كدا بيبتدي يخرف بالمعني الاصح بتاخد خيره لكن ديه بقالها يجي 25 سنة خليه في المضمون احسن لان سعرها غالي هيه لو تخلص علي 15000 تبقي كويسة لكن 20000 عاليه ده يروح يجيب 131 ولا 132 وهو حاطط رجل علي رجل وهتكون حالتها جميلة جدا ومضمونه |
رد: طلب نصيحة و تسعير شراء كابريس كلاسيك موديل 1983
بصراحة ورأيى الشخصى العربية دى جبارة فى كل حاجة, شكل وأداء وفخامة وراحة مافيش أى عربية قدرت توصلها فى السوق بتاعنا, عربية بمعنى الكلمة, وكان نفسى فيها من ساعة ماشفتها, حتى سعرها قليل.
العربية دى مشكلتها الوحيدة بجد هى صعوبة أعادة بيعها, لأنه مش هيخسر فى الثمن قد اللى هيخسره لو أشترى عربية جديدة وباعها, أنما المشكلة صعب جدا يلاقى حد يقدر العربية ويشتريها. اللازم هو الكشف على السيارة 1000 مرة من كل النواحى قبل الشراء, عربية زى دى لوفيها بارومة ولا حاجة مش سليمة فى الموتور أو العفشة هتجننه فى التصليح وفى الأخر هتترمى فى الشارع, عيوب العربيات القديمة عيوب موت. وطالما صاحب حضرتك العربية عاجباه ومأمن لمشاكلها زى ماحضرتك قلت فى الأول يبقى يتوكل على الله ويفحصها, ويهز السعر مع صاحبها شوية يشوف أخرها كام. بس فى عيب مهم جدا حضرتك نسيته, العربية دى حجمها كبير بغباء, وسواقتها فى شارع زحمة أو ضيق عذاب, ده غير صعوبة ركنتها, وأن نص قطر لفتها واسع أوى, ولازم صاحب حضرتك يفكر فى الموضوع ده قبل الشراء علشان لو بيمشى بالعربية كتير جوه المدينة وبيركن فى عدة أماكن هتتعبه جدا. بس للأسف أنا معرفش حد فى أسكندرية علشان الفحص, أهم حاجة تكشفوا كبس الموتور فى بنزينة كويسة, وترفعوا العربية وتكشفوا عليها من تحت, وفيه فى البنزينات الكبيرة حاجة أسمها كشف عام بيفحصوا فيه كبس الموتور وبيبصوا على العربية وبيطلع لحضرتك تقرير بالعيوب اللى فيها, وكمان لازم تجربوا العربية كويس قوى بحثا عن أصوات غريبة, حركات غير مفسرة, وتشوفوا سلاسة نقلات الأوتوماتيك, وهل ليها صوت ولا لأ, وتمشوا بيها فى وسط الزحمة علشان صاحب حضرتك يشوف أبعادها مناسبة ولا لأ وعلشان كمان تتأكدوا من عمل الفتيس الأوتو بكفاءة وتجربوا كل الكماليات اللى فيها لغاية أما تهروها. وأنا مع رأى كورسير فى قطع الغيار, لازم يروح يشوف المحل ده فين, ويتأكد من مكانه وأنه بيبيع للكابريس فعلا, الكابريس مش هتطير زى السيتى444546 وربنا يوفق صاحب حضرتك للأختيار الصح, ومستنى رأى باقى الأعضاء الخبراء. |
رد: طلب نصيحة و تسعير شراء كابريس كلاسيك موديل 1983
سؤالك بصراحة صعب بجد
عربية حلوة وواسعة بس مشكلتها الاكبر قطع الغيار مش بسهولة حيلاقيها وكمان موضوع الركنة بتاعتها دى لوحدها مصيبة لازم يهز فى تمنها جامد لان لوفكر يبيعها حيخسر فى سعرها يعن لو يقدر ينزل سعرها ل15000 يبقى كدة تمام وقبل الكلام دة يفحصها كويس جدا جدا جدا وبالتوفيق |
رد: طلب نصيحة و تسعير شراء كابريس كلاسيك موديل 1983
وكمان لازم يعرف منة الصنايعية اللى شغالين فى صيانتها لان مش اى ميكانيكى حيكون فاهم فيها
|
| الساعة الآن 04:03 PM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017