استفسار عن رينو ميجان 2006
 

السلام عليكم

ناوى بإذن الله اشترى ميجان اوتوماتيك مستعملة, وعرفت من مقالات الأعضاء فى المنتدى ان الافضل اشترى بداية من موديل 2006 (بجد استفدت اخر حاجة من المنتدى دا). بس عندى شوية اسئلة ياريت خبراء الميجان يجاوبولى عليها.

1. من اعلانات الميجان على كونتكت كارز لاحظت ان فى عربيات موديل 2006 معروضة بفتحة سقف وعربيات من غير. عربيات بمثبت سرعة وعربيات من غير.
السؤال: هو فى كذا نوع من موديل 2006؟, ولو كدا, اعرف ازاى اذا كان فى اوبشنز ناقصة فى العربية اللى هشوفها علشان ما يتضحكش عليا؟

2. لقيت ناس عارضة ميجان 2006 على 59 الف وناس على 62 الف و67 الف, رغم ان المواصفات واحدة تقريبا.
السؤال: ممكن خبراء الميجان يدونى تسعير ليها؟ يعنى اقل واعلى مبلغ ممكن يتدفع فيها؟

3. عرفت ان مفتاح العربية عبارة عن كارت, وان اعربية بتشتغل بزرار (عاجبانى اوى الفكرة دى, بتحسسنى انى هسوق بى ام), بس لقيت مقال فى المنتدى فيه ان ممكن يطلع كارت بكل سهولة للعربية.
السؤال: هل الموضوع دا ممكن يشكل خطر على العربية؟ نظرا لسرقة العربيات اللى على ودنه اليومين دول؟

4. عجبنى كدا الاوبشنز الكتير الموجودة فى الميجان, حاجة رائعة بجد, بس قصاد كدا معرفتش معلومات كفاية عن حاجات تانية اهم.
السؤال: ياريت اعرف تقييم العربية من ناحية: الثبات , استهلاك البنزين , التكييف , التعامل مع المطبات , وباقى الحاجات اللى كلكو عارفينها طبعا.

5. فى ناس عارضة ميجان وتقول انها اوتوماتك, وناس تانية عارضاها وتقول انها اوتوماتك ستيبترونيك.
السؤال: هى الميجان 2006 اوتوماتك بيور ولا ستيبترونك؟

6. الميجان هتبقى اول عربية ليا ان شاء الله, ونظرا لطبيعة شغلى مش مستعد اروح بالعربية كل شوية للصيانة, بس معنديش مانع اوديها توكيل (المهم يظبطها صح بحيث مش كل شوية اروحله), وبرضو معنديش مشكلة لو قطع الغيار غالية شوية, المهم ان العربية ما تعطلش منى كل شوية فى الطريق, خصوصا ان زوجتى كمان هتستخدمها عشان توصل ابنى للحضانة ومش عايز العربية تتعبها.
السؤال: هل الميجان عربية ممكن اعتمد عليها فى الحالات دى ولا هتتعبنى معاها؟

ارجو من الاخوة الخبراء انهم ما يبخلوش عليا برأيهم, بجد الردود اللى هقراها هتحدد اذا كنت هجيب العربية ولا ادور على حاجة تانية, فياريت الردود تكون بناء على خبرة عملية مع العربية لانى هدفع فيها تحويشة 3 سنين :)

جزاكم الله خيرا

رد: استفسار عن رينو ميجان 2006
 

لو مستعد تتصاحب على التوكيل وتقضى وقت فراغك عندهم وبالميت بالميت 1000 جنيه كل شهر تصرفها على العربيه والكمبيوتر ولمبه التشيك والحساسات!!!!
وفى الاخر العربيه تولع علشان لباد العزل قريب من الفرن.... لو مش مصدق اطلع على الحرفيين التوكيل بيشترى استعمال من هناك؟؟؟؟؟؟؟؟؟؟؟؟



يبقى على بركه الله اشترى!!!!



خليك فاكر قولتلك بلاش!!!!!!!!!!!

رد: استفسار عن رينو ميجان 2006
 

التوكيل بيشترى قطع غيار مستعمل من الحرفيين؟؟؟!!!!! معقول !!!!!!!!!
متهيألى ايا كان التوكيل حرامى مش توصل انه يشترى قطع غيار مضروبة, يعنى يشترى اصلى ويبقى غالى ماشى , انما مضروبة من الحرفيين !!!!
هو انا فى الاول كنت ناوى على الكليو وبعد كدة فكرت فى اللوجان ودلوقت بفكر فى الميجان بس لو كلامك دا فعلا بيحصل يبقى الاحسن اصرف نظر عن الرينو بالكامل.

على العموم شكرا ليك samykenzy على اهتمامك بالموضوع ومشاركتك فيه.

فى انتظار ردود الاعضاء

رد: استفسار عن رينو ميجان 2006
 

ايه يا جماعة, 80 مشاهدة ومفيش اى ردود ؟؟؟!!!!
هى الاسئلة صعبة ولا ايه :)

رد: استفسار عن رينو ميجان 2006