مصر موتورز مجتمع السيارات

مصر موتورز مجتمع السيارات (https://www.masrmotors.com/vb/index.php)
-   موضوعات متميزة (https://www.masrmotors.com/vb/forumdisplay.php?f=122)
-   -   حكايتى مع السيارات-حكايه 10 سنوات (https://www.masrmotors.com/vb/showthread.php?t=6833)

د0تامر محمد 06-04-2009 02:20 AM

حكايتى مع السيارات-حكايه 10 سنوات
 
حكايتى مع السيارات
-حكايه عشر سنوات
-----------------------
كانت البدايه فى عام98
-1-
تجمعت بين يدى اول نقود اجنها بعرقى بعد بدايه موفقه فى رحله العمل الشاق والترنح فى المواصلات عندما فاض بى الكيل فى ليله وان عائد من عملى ليلا فى بلده ريفيه-فنحن الاطباء يتم تعيينا لمده عامين فى البدايه بقطاع الريف كتكليف-غير كل الريف الذى ترونه 00 ريف من المجاهل والبدائيه وكأبن مدينه كان الموضوع صعبا ان تصطدم بواقع مفاجىء وطارىء لكنه مفروض ويجب ان تتقبله بل وتثبت نفسك لان البدايه قد تكون انطلاقه وقد تكون هاويه00المهم وقفت بانتظار سياره حتى توصلنى للمدينه التى تبعد عن القريه بحوالى40 كيلو وبعد ساعه اشار مرافقى الى سياره نصف نقل كانت الوحيده التى مرت بنا طيله هذا الوقت الذى مر على كأنه الدهر00 كانت الكابينه ممتلئه قال السائق:
-لو تعرف تركب اركب
كانت السياره محمله باقفاص الفاكهه نظرت للخلف وكان هناك حل من اثنين اما التسلق لاعلى واما التشبث بالخلف متشعبطا!
شكرت الرجل وقد ضحكت فى سخريه ومرافقى الطيب يقول:
-هتفرج يابيه
وبعد دقائق مرت سياره ركاب اخيرا فحمدت الله على العطيه الغاليه وصعدت للصندوق الخلفى المغطى والرجل ينطلق باقصى سرعه فاصطدمت بشىء وكدت انكفىء على وجهى وان اسمع صياح الفراخ الفزعه والبط المذعور!!
قالت سيده من الركاب:
-على مهلك00 جت سليمه
المهم جلست والهواء من الثقوب يصفق فى اذنى ويلفح وجهى00 ضممت جسدى لبعضه وانا اشعر بالبرد الشديد والازعاج من صوت الموتور الزاعق الذى يصم الآذان 00قلت فى نفسى كلها ساعه وتمر بسلام00 مددت ساقى للامام قليلا وفى الظلام اصطدمت بشىء لين ثم ارتفع الصوت ليفزعنى:
-ماء00ماء00ماااااااااااااا اء
تبينت انى لم اركب مجرد سياره ولكن حظيره متنقله!
كلها ساعه وتمر00 يا مهون
قال الجالس لجوارى:
- الاستاذ من هنا؟
-قلت :لا
-امال منين
قلت له على مدينتى ولم يصمت فقال:
-وكنت هنا بتعمل ايه؟
-فى زياره
-لمين
-واحد صاحبى
_والاستاذ بيشتغل ايه؟
راجل فضولى ممل فقلت:
-طالب
-طالب القرب00هاهاها
ياللسخافه!!
لم اؤثر الرد عله يصمت00وبالطبع لم يصمت00فالسماجه والصفاقه داء لايرد الا بالصمت عله يرتجع00 ولكن هيهات
ومع اول مطب عنيف اكله السائق00 اصطدمت رأسى بالسقف وشعرت بخدش مبلل بالدماء وشىء يسقط فى حجرى00كاك00كاك00كاك00 ابعدتها فى فزع وقد بللت ملابسى عليها اللعنه فطارت لخارج السياره00وارتفع الصوت:
-حاسب 00حاسب
توقف السائق ونزل الجميع للجرى خلف البطه الشارده حتى امسكوا بها!
كنا قد قطعنا نصف المسافه 00فقال السمج:-
-تعرف00 انا حاسس انك متضايق من الركوبه
بس خلاص هانت00 الاقيش معاك محمول؟
وكنت احمل المحمول فى يدى00 فقلت :-
- ليه؟
-عاوز اعمل مكالمه ضرورى00 وبتمنها
-الرصيد مايكملش
-ياسيدى هات دى مكالمه صغيره
واخذ المحمول00 طلب رقم00
-ايوه يا حاجه00 مش عارفه صوتى 00 انا ابو اسماعين00 ياوليه انتى نايمه ولا ايه00 انا جاى فى السكه00 خمس دقايق واكون عندك00انا بكلمك من محمول واحد صاحبى00 جهزى العشا00مع السلامه00 بقولك ايه00مستنسيش تعلقى على 00 هيه 00هيه00هيه00 بالسلامه0
وطار الكارت منك لله00كنت اتمزق من الغيظ
00 لكنى كنت عاجز عن فعل شىء 00 اقترب صاحبنا من الباب وقال:
-اتفضلوا معانا يا جماعه
قال احدهم:
-ربنا يسهلك ياعم00هيه00هيه00هيه
نزل من السياره وهو يقول: متشكرين يا استاذ
قلت بصوت غير مسموع:
-غور جتك داهيه
وبعدها بدقائق وصلنا بحمد الله 00
وان انزل من السياره شبك البنطلون فى حديده00 ثم الله يرحمه
من بعدها اخذت قرشين من الحاج على ما معى وبدأت رحله البحث عن سياره
وللقصه بقيه
تتبع باذن الله

د0تامر محمد 07-04-2009 12:53 AM

رد: حكايتى مع السيارات-حكايه 10 سنوات
 
-2-
نزلت الى سوق محلى فوجدت معظم السيارات قديمه جدا وهالكه00 ذهبت الى احد المعارض دلنى عليه احدهم00 وجدت لانسر 97 وهوندا96والفرق كان حوالى 10 آلاف لمصلحه الهوندا00 الصراحه الهوندا سيفيك الاوتوماتيك عجبتنى جدا لكن مامعى لا يكفى واللانسر لم اكن احبها فى هذا الوقت
وايضا غاليه00 المهم دلنى احدهم على واحد عنده اكسيل 97 وكانت فى متناول ما معى 00 فذهبت اليه وكان الطريق على غرار00ودى وصفه سهله00 من شارع لشارع 00لما رجلى ورمت 00خرجت لخارج المدينه لمنطقه لم اكن اعرف انها فى مدينتنا00 المهم ان صديقى الذى يرافقنى انزلق وسقط ليتوحل من جراء الماء الملقى امام احد البيوت 00 زمجر ودمدم وان انفجرت فى الضحك:
-مش تفتح يابنى
-انا عارف ايه المصيبه اللى انت جايبها فيها دى 00قبل ما نشترى عربيه ح نكون اتكسحنا
-خلاص يابنى وصلنا اهه
وقابلنا صاحب السياره الجلف الذى قابلنا بفتور
وكأننا ذاهبين للشحته00المهم تفرجنا عليها الصراحه كانت جميله باستثناء الطين الذى يحيطها من الخارج ونقله الرمل التى بداخلها من جراء عدم نظافه صاحبها 00 ادار الجلف مفتاح السياره مره واثنين ولم تستجب
تنبهت لوجود صديقى المشهور بانه نحس وقلت بركاتك
زفر الجلف وقال:-
-السيارة مش للبيع 00اتفضلوا اشربوا حاجه
تركناه وان كاره للاكسيل حتى اليوم بسببه 00كملت فى طريق العوده عندما تلقي صديقى دش بارد من احد الشرفات 00 صرخ فى غضب:-يا عالم يا بهايم يا ولاد ال00
ولم يتم عبارته حتى شرشحت له السيده:-
-يا افندى يا لوح 00يا قليل الادب00 جتك وكسه00
وما ان فتح فمه ليرد عليها حتى كممت فمه00وقلت:
-حقك علينا ياست
وانطلقت اجره خلفى مسرعا قبل ان نتلقى علقه ساخنه فى حاره ضلمه
وخرجت انا وصاحبى كالخارجين من الحرب بعد ان ردمنا التراب من عفره السيارات التى مرت علينا!
وللقصه بقيه
تتبع

bmkbmk 07-04-2009 10:37 AM

رد: حكايتى مع السيارات-حكايه 10 سنوات
 
ايه يا عم المغامرات دى كلها .....

الله يكون فى عونك والله

و لعلمك كلنا اتبهدلنا آخر بهدلة والله مش انت لوحدك :) بس ما دام الفترة دى فاتت و بقت ذكريات بنفتكرها و نضحك. :) :)

د0تامر محمد 08-04-2009 02:56 AM

رد: حكايتى مع السيارات-حكايه 10 سنوات
 
-3-
نصحنى صديق لى -يدعى دائما انه ملك السيارات وخبير مفوض لمختلف الماركات-بشراء سياره128 لانى جديد فى السواقه ولطش فيها براحتك00 قلت ماشى طالما انت شايف كده
اخبرنى بان هناك سياره مع طبيب ويعرضها للبيع 00قلت ظروفها ايه؟
قال: ايه وان00 استعمال طبيب يدوب من العيادة للبيت
وحدد لى موعدا لنراها فى اليوم التالى ومر التالى والتالى 00حتى كدت ان اكون مطاردا له 00فانا متغيب عن العمل منذ ثلاثه ايام وانا اقسم بالا اذهب مره اخرى الا بالسياره00 المهم اخيرا تعطف علينا الدكتور وبعد انتظار نصف ساعه وسط الحريم فى عياده نساء وتوليد والواحد وشه جاب الوان من نظراتهم00وصديقى عيناه تجول احيانا وفى حوار دلع مع البنت السكرتيره احيانا-فهو عينه زايغه وبتاع حريم م الاخر-دخلنا للبيه الدكتور وانا اظنه سيرحب بى كزميل مهنه لكن المهم اعطى صديقى المفتاح وقال له:
-خليه يجربها
المهم نز لنا ورايتها مانت معقوله لكن بالنسبه لموديل 1989 ماشى الحال وما كدنا نقترب حتى رأينا صديقى الفقر يقترب ويقول:
-دوختنى عليك 00 رحت المحل قالوا لى انكم هنا
دخلنا لنركب السياره وقبل ان يديرها صديقى
وجد كيس عيش وطعميه مزيته ولب ملقى على التابلوه فوضعه جانبا وقال:
-شايف ياعم الدكاتره
عيش ولب وسودانى وطعميه 00عينى00 مدلع نفسى والله
وعندما ادار السياره بالطبع كما تعلمون لم تدر فالبركه جالس بالخلف وبعد ان دارت على طريقه اللى يحب النبى يزق 00انطلقت تزمجر وتقطع وسارت تهبد فى المطبات كالجرار الزراعى 00شويه والطقطقه اشتغلت 00سألت ك
-ايه الصوت ده
-الكبالن بسيطه دول ببلاش نغيرهم على جوز مساعين تبقى عروسه
ذهبنا لميكانيكى قريب ليفحص السياره وبعد خمس ربع ساعه اتانا ليقول:
-العربيه موديلها عالى وتمام بس ح نشدها00 ونغير شويه حاجات بسيطه تبقى ست العرايس ال28 ده لعبتنا
قلت ببراءه :
-يعنى هيه عايزه ايه بالظبط؟
-حاجه بسيطه00 جوز كبالن على جوز مساعدين امامى وخلفى 00جوزين طنابير قول اربعه وطقمين تيل وبطاريه ومارش وطلمبه ميه على شويه شغل خفافى فى العفشه والكهربا
فعلا حاجه بسيطه عربيه عايزه عربيه
تركنا الرجل ونحن نضحك وصديقى الفقلر يقول:-
-انت ناوى تركبنا صفيحه خرده
-عندك حاجه قدامك
قال صديقى الاخر:
-الشغل اللى فيها قول بتاع تلت تلاف ياعم انت تسلمها للراجل وتستلمها بعد اسبوع ومتنشاش ان الراجل طالب سعر واطى جدا
-رأيك كده؟
-طبعا دى لقطه
-ماشى الحال
وصعدنا للدكتور 00واذ به يهوى علينا بسعر يزيد 4ىلاف جنيه عن الذى سمعته من صديقى الذى قال:
-لكن حضرتك كنت قولت لى سعر غير ده!
قال ناهيا:
-ده كان قبل ما الاسعار ترفع سعر السوق النهارده كده وده النهائى0
وطبعا باظت البيعه فلست اهبل حتى ادفع هذا المبلغ فى سياره خرده البيه كان ناقص من زبالتها يربى فيها بط وفراخ00
قال صديقى :
-ولايهمك فيه حته 131 فىبلد بعدينا 00بس عربيه بنت ابوها بجد00 نشوفها بكره
وانتظرت اسفا لهذا الغد

هيامى 08-04-2009 02:51 PM

رد: حكايتى مع السيارات-حكايه 10 سنوات
 
شكرا على الكوميديا الحلوه دى


الساعة الآن 01:40 PM.

Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017