مشاكل وشكاوى ضد بيت التأمين المصرى السعودى
 

الاخوه الاعزاء :
عندى سياره نيسان صنى اكس صالون مو 2009 الشكل القديم ، قمت بالتأمين عليها لدى بيت التأمين المصر ى السعودى وقت شرائها (قسط التأمين كان حوالى 3250 جنيه على كامل قيمة السياره وكان 93000 جنيه) وكان ذلك من 10 شهور ومنذ أسبوعين تقريبا (تحديدا يوم 7/9 الساعه 11 ص، السياره عامله 26000 كم حت ذلك الوقت) استيقظت من النوم على صوت الانذار وهرج ومرج ووجدت الجيران يقومون باطفاء السياره واتصلنا بالشرطه والمطافى التى اكملت اطفاء النار (النار اقتصرت ظاهريا على الربع الامامى الايسر) وعلمت من الجيران ان مجهولا (لم يروه) قام باشعال نار بجوار السياره فاشتعلت، فى المحضر حيث لا انى اعرف من اشعلها وليس لى أعداء أعرفهم فلم اتهم احدا .
المهم أخطرت شركة التأمين وعملت محضر وفى نفس اليوم نقلت السياره لمركز الخدمه المعتمد وبعد 5 أيام من المتابعه والسؤال أخبرونى أن مقايسة الاصلاح تبلغ حوالى 80 ألف جنيه وانهم بانتظار خبير التأمين لمناقشة الامر. فى اليوم التالى علمت منهم ان الخبير عاين السياره وانه أشر فى المقايسه على الاجزاء والمصنعيات المؤكده (التى لاتحتاج فحص اخر لتحديد تلفها) وبلغ جملة ما أشر عليه حوالى 50 الف جنيه
وبعدها بيومين علمت من شركة التأمين أن تقرير الخبير تم تسليمه الى الشركه وانهم يحتاجون منى صورة المحضر (الشرطه) وتقرير المعمل الجنائى.
أنا بقالى أسبوع باحاول اجيب صوره رسميه من المحضر ...حاجه تقرف وعذاب لكن فى الاخر هييجى ان شاء الله.. أنا قريت الوثيقه من الاف للياء اكثر من مره وموش قادر أحدد منها ايه اللى ليا وايه اللى عليا فى اخر المطاف
بكل بساطه موش قادر أحدد العربيه هتتكهن ولا هتتصلح والقرار هيكون قى ايدى ولا فى ايد التأمين ولو هتتكهن هيصرفولى كام ولو هتتصلح هتتصلح فين وهيصرفولى كام وهل من حقى الاصرار على اصلاحه فى التوكيل وبقطع غيار اصليه جديده أم لا؟؟؟ ومنين اجيب تقرير المعمل الجنائى واعرف منين هو اتعمل ولا لأ والمتاهه دى آخرها ايه...
ومنه لله اللى فتح عليا باب الهم والغم ده.....

لو حد يقدر يفيدنى بكلام فى الصميم من غير مايحبطنى اكثر أكون شاكر وهادعيله بظهر الغيب
والحمد لله الذى لا يحمد على مكروه سواه

رد: افيدونى عافاكم الله
 

ربنا يعوض عليك
المهم تابع مع البيت المصرى السعودى ولازم تروح بنفسك وتشوف هما عيزين اية واية الحل لو حصل ان قيمة الاصلاحات تقدر ب 50 هيعملوا اية ولو اكثر هيعملوا اية وتسال انت كنت عامل بليصة بنسبة تحمل ولا بدون نسبة تحمل
كمان حاول تتفاهم معاهم وحاول متكونش هادى خليك شوية ناشف معاهم وحاول تفهم هيتم اية لانك لو مشيت على تصرفتهم الموضوع هيطول ومش هتخلص من الموضوع دة
وتبع بالاخبار علشان لو اى شى اقدر اساعدك فية

رد: افيدونى عافاكم الله
 

جزاك الله خيرا يا أخى على اهتمامك ومساندتك....
أنا أرفقت صوره الوثيقه التأمينيه scanned soft copy حتى تنصحنى (أنا سددت كل أقساط السياره عند الشهر السادس ومعى مخالصه من الشركه البائعه وهى شركة عبد اللطيف جميل المحدوده لتجارة السيارات)

وشكرا لك

رد: افيدونى عافاكم الله
 

ربنا يعوض عليك
وعسى أن تكرهوا شيئا وهو خير لكم وعسى أن تحبوا شيئا وهو شر لكم
وإن شاء الله تتم على خير وفى أسرع وقت

رد: افيدونى عافاكم الله
 

ربنا يعوض عليك ويرزقك باحسن منها بإذن الله

اهم شىء دلوقتى تسرع فى الحصول على صورة المحضر وترفقة بالاخطار والمقايسة
موضوع طلبهم لتقرير المعمل الجنائى ده جديد بصراحة اول مره اسمعة خاصة انك بتقول ان الحادث بفعل فاعل فعلاً وده المثبت فى المحضر فاية لازمتة تقرير المعمل الجنائى اصلاً

بس صورة المحضر مهمة طبعاً ولازم تستوفيها

وارجو من الاستاذ سيف ومن جميع المختصين بالقسم التجارى او التأمين بالاخص التعاون لحل مشكلتك وتقديم العون والمشورة