مصر موتورز مجتمع السيارات - ماس كهربا ويوم جديد مع لوزة

صباحكم كله خير اخوانى
من يجى اسبوع حصلت معايا شوية حاجات غريبة فى العربية
اولا لاقيت الفيوز اللى متحمل عليه الولاعة والكاسيت كل شوية يضرب واغيره يضرب تانى
قلت مش مهم واديها ماشية ومش الراديو يعنى هو المشكلة

شوية ولاقيت زرار الانتظار بيلعب بمعنى لما اشغله مرة يشتغل ومرتين لا ولما يشتغل شوية يستمر وشوية ينور مرتين تلاتة ويقف

اللى كبر العملية فى دماغى بقى لما روحت من كام يوم وانا ساكن فى ارياف لاقيت لمضة الاشارة بتاعت المروحة مطفتش زى العادة لما العربية بردت ببص على المروحة لاقيتها مش شغالة
( بقصد مروحة الردتير طبعا ماحنا ماحليتناش غيرها فى 128 )
المهم تانى يوم الصبح وهى العربية باردة رحت نازل جرى على الزاوية وعينى على مؤشر الحرارة
الحمد لله وصلت وهى موصلتش لمرحة الخطر
المهم شوف يا عم حسن المشكلة فين ( عم حسن ده احسن كهربائي سيارات فى مصر بالتجربة )
المهم مطولش عليكم قولو طول
عم حسن قعد يكشف الماس فين طلع ان المروحة عاملة ماس طب نظبطها قلتله لا غير بالمرة يا عم حسن علشان هى اصلا صوتها مش عاجبنى وقوايمها مشرخة
وتم الاتى
ركبنا مروحة يابانى 120 جنيه حسبهالى 110
غيرنا تريموستات 68 وشوية كلبسات وكوليه رديتير على كام حتة سلك دفعت 32 جنيه من عند محل قطع الغيار
وفك صباح الحرارة من المكنة علشان كان واسع ولحم فيه حتة سلكة
وكمان فك العدادات فتح لقى السلك سايح ورا العدادت ظبطهولى ونضفه وغير اللى سايح فيه
وركب زرار الاشارة بتاع المروحة للانتظار لان حالته لاقاها كويسة
وخد زرار اللانتظار طير منه ريشة البايظة وركبه للمروحة
يعنى عمل بدل بين الزرارين علشان ميشتريرش جديد مادام دول شغالين
وكل ده وخد هو مصنعية 30 جنيه بس
بس ايه المروحة اليابانى اللى ركبهالى يا جدعان مش ممكن فعلا فرق فرق فرق غير عادى

العربية بسم الله ماشاء الله الحر مبقاش ياثر فيها زى الاول وكمان حاسس ان سحبها زاد مش عارف ده من اللى اتعمل ولا مجرد ايحاء علشان انا مبسوط من اللى اتعمل
وده كان يوم من ايام لوزة العجيبة عند الكهربائى قلت احكيلكم عليه يمكن حد منكم يلاقى فيه معلومة تفيده ولا حاجة

وصباحكم جميل انشاء الله وكله خير