مصر موتورز مجتمع السيارات - (تحذير) سرقة موبيلات بجوار مترو جامعة القاهرة

مساء الفل علي احلي ناس في الدنيا ،
زي ما مكتوب في العنوان الرصيف اللي بجوار مترو جامعة القاهرة اللي بتمشي عليها لما بتخرج من محطة المترو ( رصيف باب جامعة القاهرة اللي بجوار المترو)
حصلت مع واحد صاحبي من فترة كان ماشي علي الرصيف قرب الشارع وعيلين بموتوسيكل شدوا منه الموبيل وخلعو

بعدها بفترة حصل نفس الموقف مع صديق ليا في نفس المكان

ولسه نفس الموقف حاصل قدامي النهارده

المشكلة ان الرصيف كان متكسر وفيه رمل وطوب فطبعا لو انت لابس جازمة او كوتشي مش هتحب تمشي عليه هتمشي في اخر الرصيف علي الطرف او هتنزل تمشي في الشارع
الحمد لله بعد طول انتظار تم سفلتت الرصيف بس فيه مشكلة ان في منتصف الرصيف كل كام متر هتلاقي مربع ومتحاوط بطوب ( مكان لزراعة الشجر بس مفهوش شجر ) فهتضطر انك تمشي في طرف الرصيف قرب الشارع او جانب سور الجامعة

النصيحة : حاول بوجه عام تقلل كلام في الموبيل وانت ماشي علي رجليك
حاول تمسك الموبيل كويس جدااا

والمهم طبعااا انك لما تتكلم بالموبيل في الشارع ( تكون ماسك الموبيل بايدك في الاتجاه اللي مفهوش عربيات )
يعني لو ماشي جانب الرصيف والعربيات علي ايدك اليمين والرصيف علي ايدك الشمال امسك الموبيل بايدك الشمال
بحيث تضمن ان نفيش موتوسيكل هيعدي ويخطفه منك

هحكيلكم الموقف اللي حصلي النهاردة

النهاردة الساعة 4,30 العصر رايح اركب المترو وماشي في امان الله لا بيا ولا عليا علي الرصيف
انا كان اتجاه العربيات مقابل ليا ولمحت عيلين بموتوسيكل بيقربوا من راجل ماشي قدامي بيتكلم في الموبيل الواد اللي ورا علي الموتوسيكل بيشد الموبيل من الراجل
انا كان بيني وبين الراجل مسافة حوالي 15متر

***انا هقولكم انا فكرت في ايه في لحظات ::

قررت اني مش هعدي الموتوسيكل وده كان قرار نهائي ( مع ان ليا بعض التخوفات هقولكم عليها لاحقا)

في لحظة انا نطيت لطرف الرصيف وفكرت في كذا حل والله في ثواني
1) اخبط الموتوسيكل برجلي جامد
2) اشد الواد اللي سايق الموتوسيكل
3) اشد الواد اللي راكب ورا سائق الموتوسيكل

1- العيال هيطيروا لنص او اربع الطريق والعربيات جاية طايرة
وهلبس انا مصيبة وفي عيال ملهاش اي لازمة
2- سرعة الموتوسيكل هتخليني اقع معاهم والله اعلم ايه اللي هيحصل وممكن معرفش اوقفهم
3- وده كان القرار اللي اتخذته اشد الواد اللي راكب ورا وده اسلم حل

بعد كل حساباتي لقيت الواد اللي بيسرق الموبيل معرفش ياخده والموبيل وقع علي الارض وصاحبه نزل ياخده

وكمل مكالمته عادي جدا

لاحظت ان الموبيل شكله مغري لاي حرامي الموبيل حاجمه كبيييير وتاتش وشكله حديث

روحت لاغي حساباتي ورجعت لنص الرصيف وقولت لصاحب الموبيل ابقي خلي بالك والحمد لله سليمة

الراجل معبرنيش خالص هههههههههههههههه معرفش ليه مش مهم المهم كان نيتي اساعد

هقولكم انا قررت ابعد ليه : انا شاب و باديء اظبط حياتي ومستقبلي وبعمل مقابلات شغل وخلافه فمينفعش اني اكون اخد بشله او متعور في وشي وتعويرت الوش مفهاش معلش
بجد ممكن حاجة بسيطة زي ديه تضيع مني مستقبلي عشان كده بقالي فترة بتجنب المشكال بقدر الامكان ( مكنتش كده من كام شهر )
الحاجة التناية الحمد لله موبايل الراجل متسرقش

الحاجة التالتة اني كنت بطولي الرصيف مكانش فيه غيري انا والراجل ده وبنتين (ملحوظة البنتين مكانوش حلوين للاسف ) و صاحب الموبيل ممكن يخلع عادي

فهكون لوحدي قصاد اتنين واحتمال يكون معاهم سلاح ناري عشان المصيبة اللي بيعملوها

وعلي فكرة حصلي حاجة محصلتليش غير نادرا قاعدت انهج كذا ثانية بعد الموضوع مش عارف ليه لو حد عنده تفسير يا ريت يقول ؟؟

السؤال دلوقتي هو انا كده غلطان ولا لأ ،، ولا كان لازم اوقفهم عشان اكفي الناس شرهم ؟؟؟؟؟؟؟؟؟؟؟