مصر موتورز مجتمع السيارات - محاولة شراء سيارة أنتهت بالفشل

أمبارح الساعة خمسة بعد العصر روحت للميكانيكي اللي بأتعامل معاه وسألته إذا كان قدامه عربية فيرنا تكون موديل من أول 2008 (أنا معنديش أي خبرة في شراء العربيات)قالي تعالى معايا وروحنا جنب الورشة عند واحد بتاع قطع غيار وسأله على عربية فيرنا وقاله عندي واحدة أهي وكانت واقفة قدام المحل، موديل 2008 جميع الكماليات، راح الميكانيكي فتح ابواب العربية وابتدى يتفرج على العربية (العربية رشة من بره جديد بس وكل حاجة فيها بتلمع حتى الكاوتش، وده خلاني قلقان من العربية) المهم شافها يدوبك في خمس دقايق، أنا حاست ان اتفرج بسرعة قوى من غير تركيز وقالي حلوة تعالى نتكلم في سعرها، قلت له ماشي ودار الحوار ده مع صاحب العربية :
الميكانيكي: مطلوب كام في العربية دي يا حاج؟
صاحب العربية: 47.5
الميكانيكي: وعشان خاطرنا؟
صاحب العربية: خلاص 47وربع، يالله ماشي
الميكانيكي بيكلمني أنا ماشي كويس كده!!
أنا: لا لازم تكرمنا أكتر من كده
صاحب العربية: والله العربية جابت لي امبارح 47 وانا مكنتش موافق
أنا: خلاص 47 زي ما أنت قلت
صاحب العربية: الف مبروك عليك
أنا: ماشي،ممكن أشوف الرخصة، طلع الرخصة، وكانت مش بأسمه ولما سألته عن صاحبها قالي دي بتاعت أبن خالتي ومعايا توكيل
صاحب العربية: ماشي، بس تسيب عربون دلوقتي، عشان لو حد جه يتفرج عليها
أنا: بكرة هجيب الفلوس بس هنرفع العربية الأول في بنزينة وأخد تقرير بحالتها الاول ودفعت له الف جنيه عربون وقبل ما أمشي سالته هي تبع مرور إيه معرفش غير بعد لما بص على الرخصة.
اما بقه عن انطباعي على العربية والموضوع كله مكنتش مستريح وحسيت انه تاجر وده اللي أتاكدت منه بعد كده ( أصل أنا من عيلة على نياته)
تاني يوم
روحت في الميعاد وأخدنا العربية من صاحبها وروحت أنا والميكانيكي على بنزينة وفي الطريق كنت باتفرج على العربية (مش مستريح ليها) التكييف مش شغال الميكانيكي بيقولي عايز شحن، ماشي، زرار ازاز الباب اللي جنب السواق مش شغال، الكاسيت فيه مشكلة، والميكانيكي بيقولي في الطريق مش مستاهلة على فكرة تروح بنزينة وتصرف فلوس العربية حلوة وحاول يلعب بدماغي، المهم رفضت وقلت له لازم البنزينة

روحنا البنزينة
طلبت من الفني يعمل كشف كامل على العربية،ودفعت بايصال مبلغ 88 جنيه، وابتدى يكشف من تحت العربية وجوانب العربية وبودي العربية وبعدين دخل على الشنطة والحوض، المهم شاف كل حتة في العربية، حتة حتة مخلاش، وقالي بعد كده الشاسية واخد خبطة بسيطة ومرشوشة وهي تقريبا 20 سنتيمتر في 10 سنتميتر في فردة الشاسية وده بيأثر على العربية وسعرها وكده تبقى العربية فيها عيب، حاول الميكانيكي يقول ان العيب ده ملوش تأثير وأني مش هبيع العربية، الفني سكت الميكانيكي على طول وقالوا أنا بأقول على كل حاجة في العربية وماليش دعوة باللي أنت بتقوله، وبعد كده وراني أن الموتور ملعوب فيه وكان فيه تسريب وفهمني ان هما حطوا نوع من اللزق لون ابيض واسود بيمزجوهم مع بعض ويحطوهم مكان التسريب، وفهمني أن ده هيعمل مشكلة فيما بعد، المهم دخل بالعربية على جهاز فحص الموتور وبعد الفحص قالي أن الموتور كفاءته 70 في الميه، وفهمني أن العربية مش كويسة خالص.
ومشينا من البنزينة، مش الميكانيكي يسكت ويتكتم على عينه قالي العربية مفيهاش أي حاجة والبنزينة لازم تطلع عيوب في العربية حتى لو كانت زيرو، طبعا مرديتش عليه خالص، كنت مخنوق بجد منه، وروحنا لصاحب العربية وقلت له على اللي حصل كرر نفس كلام الميكانيكي وطبعا طلبت منه العربون، ومشيت قرفان منه الاتنين.
على فكرة انا كتبت الموضوع ده عشان كل واحد عايز يشتري عربية ياخد باله كويس، وربنا ستر والحمد لله.