المراية الضم ....... من الآخر
 

السلام عليكم

طبعا مشكلة المرايا الضم المعروفة واللى اتعمل كتير من المواضيع عنها
والناس قدمت حلول تفضلوا هنا

http://www.masrmotors.com/vb/showthread.php?t=115464


من كام يوم لورا كدا كنت قاعد عادى مش فى دماغى حاجة قمت جبت الأباجورة دى اللى بقالها سنين عندى من وأنا طفل وقلت أشيل منها المسمار أعمل بيه المرايا
http://imageshack.us/a/img211/3682/nino0005.jpg
طلعت منه المسمار
http://imageshack.us/a/img440/6323/nino0003.jpg
طوله 11 سم المسمار دا
وبعدين قلت افك المرايا كدا مع إنى مكنش ليا نفس أعملها بس قلت ألقى نظرة على طول المسمار اللى قال لى عليه الاستاذ شريف محمد الله يمسيه بالخير إنه جمع الموتور تانى بيه عشان الموتور مينفعش يتفك من الاساس
مش عارف إيه اللى خلانى فكيت الموتور وفضولى خلانى أفوره برغم إن المسمار اللى معايا عايز يتقص منه لأنه طويل
تانى يوم الجمعة بعد ما فكيته خبطت العربية خبطة خفيفة فى الباب بسبب إنى كنت شايل المرايا برضه بس الحمد لله نصيب

موتور المرايا الضم مصنوع فى أستراليا وهو اللى بيحرك المرايا بيفتحها ويقفلها

هو دا اللى أغلب الأعضاء اشتكوا منه

طيب أزاى نفك الموتور ونطلعه من وسط السلوك اللى معدية وسطه ( لازم نقرأ موضوع فك المرايا الضم اللى فوق وموضوع الباش مهندس شريف )

بعد ما نفك المرايا الضم ونفك الغطاء بتاعها ونفك المسامير اللى رابطة الموتور فى جسم المراية طبعا لازم يكون معانا طقم الألانكى النجمة

الجديد هنا إننا مش هنقطع السلوك زى ما عمل الأستاذ شريف محمد والباش مهندس شريف

هنفك الفيشة نفسها اللى فيها السلوك هى قابلة للفك
دا منظر الفيشة نفسها شايفين مكان السهم الأحمر فيه كلبسة لونا أصفر هنجيب أى مفك رفيع ونرفعها سنة ونزقها لبرا ونفس الكلام من ال جمب التانى للفيشة
http://imageshack.us/a/img833/7606/nino0016.jpg
http://imageshack.us/a/img222/8065/nino0014.jpg
http://imageshack.us/a/img833/861/nino0013.jpg
بكدا طلعنا الفيشة الصفراء دى الخطوة اللى جاية إننا نفك السلوك من الفيشة السوداء
كل pin لكل سلك متثبت فى الفيشة السوداء عن طريق الضغط بيبقى فيه زى لسانين على كل سلك ما سكينه هنمسك مجموعة السلوك فردة فردة سلك سلك ونتبدى نشد السلك لتحت وفى نفس الوقت نزيح اللسان بتاعه من جوا الفيشة بأى حاجة رفيعة هينزل حبة بسيطة ونروح للسان التانى اللى ماسك السلك نزيحه برضه السلك هيطلع ف إيدينا نعمل كدا مع جميع الأسلاك
http://imageshack.us/a/img715/15/nino0017.jpg
بس ننتظر ثوانى لازم نحفظ مكان كل سلك كويس
http://imageshack.us/a/img836/8399/nino0018.jpg
الفيشة فيها صفين صف فيه 5 سلوك والصف اللى تحته فيه سلكين

السلكين دول هما الخاصين بالمحرك بتاع المرايا اللى بيفتحها ويقفلها أما الصف التانى خاص بمحرك كف المرايا اللى هو فيه 5 سلوك

الكلام دا بالنسبة للمراية الشمال أما المرايا اليمين هيزيد فيها سلكين لحساس الحرارة

لازم نحفظ أماكنهم كويس جدا فيه ناحية من الفيشة مكتوب عليها clinch
ودى اللى تحتها الصف اللى فيه الخمس سلوك نبدأ بالترتيب

حرف السى c مع أول سلك بنفسجى
حرف ال l مع السلك البنى
حرف I مع السلك الأحمر
حرف n مع السلك الرمادى
حرف ال ch مع السلك البنفسجى الأخير ونعلم السلك دا وأحنا بنفك بأى لون تانى عشان منتلغبطش بينه وبين السلك البنفسجى الأولانى

نروح للجمب التانى من الفيشة هنلاقى عليه علامة رينو
فيه خمس فتحات مستغل منهم 2 فقط لأسلاك الموتور اللى هما لونهم أصفر وأخضرأول خانة فاضية تانى خانة فيها السلك الأصفر تالت خانة فاضية رابع خانة فيها السلك الأخضر خامس خانة فاضية بالترتيب من اليمين لليسار نحفظ أماكنهم برضه عشان لما نيجى نركب

بكدا حررنا الفيشة من الأسلاك عشان نحرر الموتور من غير ما نقطع السلوك
http://imageshack.us/a/img685/3659/nino0009.jpg
بعد ما نطلع السلوك نفك الموتور من القاعدة بتاع المراية ( ياريت نقرأ موضوع فك المرايا الأولانى )
http://imageshack.us/a/img849/1909/nino0020.jpg
آدى حزمة السلوك فى الصورة عليها الغلاف الأزرق اللى بيبقى موجود فى المرايا الشمال ودا بيحمى السلوك أثناء الدوران إنها متتقطعش

فى المراية اليمين بيبقى لونها أصفر

هنبتدى نطلع الموتور نفسه بعد ما نفك المسمارين اللى ماسكينه فى جسم المراية نفك الكابل اللى داخل للموتور بنشده هيطلع معانا

http://imageshack.us/a/img560/2397/nino0022.jpg
دى أماكن تثبيت الغطاء اللى بنفكها عشان نفك الموتور
http://imageshack.us/a/img341/1926/nino0023.jpg
الموتور متبرشم فى النقاط دى بنكسرها عشان نفك الغطاء
http://imageshack.us/a/img197/5818/nino0025.jpg
ناخد بالنا كويس من الغطاء دا فيه قطعتين حديد بيوصلوا الكهرباء لأحسن يقعوا مننا
http://imageshack.us/a/img198/448/nino0026.jpg
دا الموتور من جوا
http://imageshack.us/a/img21/3152/nino0027.jpg

بوردة كهربائية تحتها الموتور http://imageshack.us/a/img221/1730/nino0029.jpg
بعدها ترس أبيض بلاستيك بينقل الحركة من الموتور
للترس الأسود الحديد اللى بعده
بعدهم الترس الأسود الدائرى البلاستيك
لحد هنا مفيش أى مشاكل فى الموتور
كله سليم
أحنا محتاجين نطلع الترس الدائرى البلاستيك دلوقتى وهو متثبت فوقيه غطاء الغطاء دا متثبت ببرشام برضه !!!
بحيث إنه مينفعش يتفك

او بالمعنى الاصح لو فكيته مش هتعرف تركبه بس احنا معانا المسمار اللى هنربط بيه متخفوش

بس دى سياسة من المصنع عشان اللى يبوظ يترمى

شايفين فى الصورة اللى قبل اللى فاتت فوق أنا معلم بالأحمر على المناطق اللى فيها البرشام اللى هنكسره بأى مفك
ودى الصورة بعد كسر البرشام نلاحظ فى الصورة حاجة لونها أبيض ودا شحم أبيض
http://imageshack.us/a/img189/8378/nino0035.jpg
بعدين نشد قاعدة الموتور من تحت هتطلع معانا بالشكل دا

ودا شكل الغطاء اللى فيه البرشام اللى كسرناه من فوق
http://imageshack.us/a/img846/8615/nino0036.jpg
زى ما أحنا شايفين القاعدة من فوق طالع من وسطها مسمار بلاستيك مفرغ من جوا اللى بيعدى منه ال سلوك
العلبة اللى معدى منها المسمار من تحت كدا من عند السهم الأحمر فيه ترس هو مش ترس بمعنى الكلمة هو حتة حديدة مدورة بيعدى منها المسمار
المسمار لما بيعدى هو عبارة عن بنز شوفوا المناطق اللى معلم عليها بالأخضر بيعدى من الترس الحديد المدور عاشق ومعشوق يعنى لازم ال 3 أماكن المفرغة اللى فى المسمار البلاستيك دا يتقابلوا مع ال 3 مناطق ا لبارزة فى الحديدة المدورة اللى فى العلبة
بحيث إنهم كلهم بيلفوا مع بعض
http://imageshack.us/a/img705/3971/nino0034.jpg
http://imageshack.us/a/img404/217/dsc01522t.jpg
شايفين المسمار لما خلعناه فيه سوستة
السوستة فايدتها إنها بتضغط القرص الحديد المدور اللى فى العلبة السابق ذكره لفوق
وبطول ما هو مضغوط لفوق ما تقدرش تلحلح المرايا من مكانها دا ترس حديد
عشان المراية تلف فيه
ترس تانى راكب فوق العلبة اللى فيها المسمار أول ما الموتور يشتغل الترس بيلف يضغط على الترس الحديد دا لتحت يقوم المرايا تلف ووبعدين يرجع يطلع مكانه تانى فى منطقة معينة

المشكلة بقى إن الترس دا بلاستيك

أول ما تضغط على المرايا بقوة الترس دا بيتكسر وبيفضل دايس على الترس الحديد والموتور يفضل يلف ويفتح المرايا على الآخر

أنا لقيته عندى عبارة عن قطع صغيرة جدا فى الحالة دى المرايا يا إما الموتور هيلف على الفاضى يا إما هتفضل المرايا تلف ومش هتقدر تطفى الموتور غير بفصل الفيشة بس أنا كنت بقعد ألعب فى الزرار نفسه لحد ما تفصل بالصدفة ما علينا

أنا هشرح عمل الموتور من الأول

فى البداية انت بتلف الزرار من الباب عندك اللى بيحصل الآتى

الموتور بيتحرك بسرعة عالية الحركة بتنقل من ترس الموتور البلاستيك الاساسى لترس تانى أبيض بلاستيك بسرعة أقل نسبيا وعزم أكبر نسبيا نرجع للصور فوق هنفهم توالى الحركة من الموتور مع التروس
http://imageshack.us/a/img16/4354/nino0031.jpg
http://imageshack.us/a/img221/1730/nino0029.jpg
ومنهم إلى الترس الحديد الأسود بسرعة أقل وعزم أكبر كل مانروح السرعة بتقل والعزم بيكون أشد
http://imageshack.us/a/img152/8780/nino0033.jpg

ومنهم إلى الترس المدور الأسود والسرعة تكون أقل والعزم يكون فى أقصى مرحلة
http://imageshack.us/a/img189/8378/nino0035.jpg
الترس الأسود المدور دا من تحت فيه 3 نقاط بارزة
ال 3 نقاط دول بيعشقوا فى الترس أو القرص المدور الأبيض اللى تعذر تصويره لأنه مكسر خالص عندى ومعرفتش حتى شكله
الترس دا مش ترس مسنن لكنه مصمم بطريقة أول ما يلف بيضغط القرص الحديد ( اللى السوستة ضاغطاه لفوق ) بينضغط وينزل ويلف بالمسمار الأسود والمراية تلف وتقفل أو تفتح وبعدين الترس الحديد يرجع يعشق فى البيت بتاعه ويقف عن الحركة

طيب إيه اللى بيوقف الموتور عن الحركة الله أعلم بالضبط أنا أعتقد إن السر فى البوردة بتاع الموتور
http://imageshack.us/a/img201/1688/nino0028.jpg
اللى ممكن يكون دورها كالآتى إن لما الموتور بيواجه ضغط عالى بترسل أشارة لفصل الكهرباء عنه

أو فى نفس الوقت بتكون بتخفض الجهد الواصل ليه من العربية اللى هو تقريبا 12 فولت لأقل من كدا
لأن زى ما انتم شايفين الموتور صغير نسبيا ممكن يكون 4 فولت أو ممكن يكون 12 والله أعلم بس البوردة دى عايزة حد يكون فاهمها كويس ودا تعذر عليا

زى ما قلت إن حركة المرايا باليد أو أى مؤثر خارجى الترس الحديد مش بينضغط لتحت وبالتالى أضعف نقطة هو الترس الأبيض اللى بيضغطه لتحت بيتكسر

ما الحل ؟؟؟

بعد ما فكينا دا كله لو لقيت الترس ينفع يتلحم الحمه وركبه تانى

لو الترس مدشدش إنسى انك تصلح المرايا غير لما تجيب ترس زيه

على فكرة إنت ممكن تعرف أذا كان الترس مدشدش ولا لأ من غير ما تفك المرايا

أزاى ؟؟

لو المرايا لما توقفها بإيدك بتقف بسهولة أطمن احتمال كبير الترس يجى منه

لو المرايا بتطقطق ومش بترضى تقف نهائى وبتفضل تلف وكإنها عايز تطير لبرا كدا الترس بايظ خالص

لو الموتور بيلف على الفاضى إنسى برضه عشان كدا الترس متدهور جدا


نيجى للتركيب

أنا استغنيت عن المسمار اللى طلعته من أباجورتى العزيزة وركبته تانى مكانه بعد ما رحت لمحل أدوات أضاءة طلبت منه المسمار المفرغ أدانى واحد ومعاه صامولتين ووردتين وبنزين ( ورد زنق )
http://imageshack.us/a/img827/843/dsc01517e.jpg
مرضيش ياخد منى فلوس
نركز قوى فى الصورة دى صامولتين وردتين + وردتين زنق الوردتين عشان لما نلف الصامولة منبوظش البلاستيك اللى تحتها وورد الزنق عشان بعد ما نجمع الموتور مع الفتح والقفل الصامولة ما تفكش مهمين جدا جدا وببلاش
لأن دلوقتى المسمار دا هو اللى ماسك المراية فى العربية لو اتفك المراية هتطير وانت ماشى
نيجى للمسمار نفسه المسمار اللى أنا جبته طوله 7,5 سم أحنا هنحتاج 6 سم هيبقى تمام قوى مع الوورد وورد الزنق بس وبعد ما نلحم الترس نجمع الموتور عادى جدا
http://imageshack.us/a/img841/3277/dsc01518bx.jpg
طيب لما نيجى نقص من المسمار نعمل إزاى ؟؟
نربط صامولة من طرف المسمار وبعدين نحدد المسافة اللى هنقصها تبقى قبل الصامولة من برا و نقص هنقص بصفيحة منشار أو عندى أى حد عنده ساروخ يطيرها طيب ليه نربط الصامولة عشان مكان القطع ممكن منعرفش نربط منه ودا اللى خلانى ربطت الصامولة قبل ما أقطع
http://imageshack.us/a/img217/8056/nino0004.jpg

بعد ما نربط المسمار تمام نضغط بحيث إن السوستة تكون مضغوطة ورافعة الترس الحديد اللى فوقيه لفوق كويس لأنها لو مش مضغوطة كويس الترس مش هيرشق فى المكان الخاص بيه بعد ما المراية تقفل وهتفضل المرايا تلف على الفاضى

عشان نتأكد أنا ممكن يكون معانا محول 12 فولت ونشغل بيه الموتور مع تغيير الأقطاب للفتح والقفل للتجربة مش أكتر
أو تجيب الفيشة وتوصل فيها السلكين بتوع الموتور وتروح عند العربية توصل الفيش مع بعض وتلف الزرار

طيب ضبطت كل شئ تعمل إيه دلوقتى ؟؟

هنعدى السلوك تانى اللى فكيناها بس من جوا المسمار الحديد مش هيبقى مرحرح زى المسمار البلاستيك طبعا لأنه معدى من جواه بس هيعدى
مجموعة الأسلاك حواليها غطاء لونه أزرق أو أصفر بلاستيك وطرف الاسلاك عبارة عن حديد

http://imageshack.us/a/img849/1909/nino0020.jpg
مينفعش نعدى الأسلاك مرة واحدة عشان الأطراف الحديد كلها مع بعض هتبقى أكبر من قطر الماسورة بتاعتنا

نعمل إيه ؟؟

الأول هنرجع الغلاف الأزرق بإيدنا لورا قدر الأمكان لو معانا سشوار سخن هيساعدنا فى كدا وبعدين نيبتدى نعدى الأسلاك نفسها سلك سلك لحد ما نعديهم كلهم
طبعا الغلاف الأزرق اتكرمش لورا بس هنعديه برضه بإذن الله
نجيب حتة شحم وندهن بيها طرف الغلاف واحنا بندخله ونفضل نكاركله بإيدنا لحد ما يطلع من الناحية تاني من الماسورة وبعدين نشده بملقاط مثلا عشان نفرده
ياريت ميكونش فايض أى شئ من المسمار بعد ما نركبه عشان الأسلاك معمولة بالظبط فلو طولنا المسمار الأسلاك مش هتطول معانا

الفكرة كلها كإنك بالبلدى كدا بتشمر أكمامك أكمامك هى الغلاف الأزرق ودراعك هو الأسلاك عشان تعديهم سلك سلك

بالنسبة للباش مهندس شريف متهيقلى مركبش الورد وورد الزنق وعدى السلوك من غير الغلاف بتاعها ودا خطر

ممكن لو عايز تعدى السلوك من غير ما تتعب نفسك وتعدى معاهم الغطاء بتاعهم عن طريق

إنك تجيب سيليكون وتدهن بيه كل سلك من السلوك ودا حل أسهل طبعا
وفى النهاية الم وضوع مفيهوش أى خساير يعنى لو الترس اتلحم وحالته كويسة المراية هتشتغل لو الترس مطحون هتجمع زى ما فكيت ومش هتخسر حاجة برضه
سؤال للباش مهندس شريف ؟؟ حضرتك صلحتها بالطريقة دى بالظبط ولا بطريقة غيرها ؟؟
طبعا زى ما احنا شايفين الموتور من جوا ترس بلاسيتك وترس حديد والموتور فى تصميمه غير قابل للفك يعنى ملهوش قطع غيار بالتأكيد المفروض إن التروس تكون مصممة بشكل إنها تقبل الحركة العكسية بحيث إن لو حد خبط المرايا تقفل مش تبوظ من جوا بس هما مش عايزين كدا طبعا
وطبعا أشكر الأستاذ شريف محمد
والباش مهندس شريف اللى سبقونى و صلحوا المراية بتاعتهم بالطريقة دى لكن أنا حاولت أشرح اللى فهمته لما فكيت وأوضح أكتر

رد: المراية الضم ....... من الآخر
 

موضوع جميل ومجهود تشكر عليه

رد: المراية الضم ....... من الآخر
 

رد: المراية الضم ....... من الآخر
 

مشكور على المجهود

رد: المراية الضم ....... من الآخر
 

افكار عبقرية ومجهود رائع الف شكر ع الشرح الرائع