مصر موتورز مجتمع السيارات - مالك جديد للجميلة فيلوستر

بسم الله الرحمن الرحيم

بفضل من الله ونعمة،
الحمدلله انضمت لعائلتنا الصغيرة اول عربية كورية، واللي هيا في رأيي الشخصي اجملهم على الإطلاق
2013 Hyundai Veloster - Red
لسة مستلمينها النهاردة من الوكالة، والحمدلله دخلت قلب كل افراد العائلة واحد ورا التاني

دول صورتين كدا على السريع للعربية في اول يوم ليها معانا :)

http://i.imgur.com/u8miil.jpg

http://i.imgur.com/xDgnEl.jpg

ودي صورة تانية بس بعد التعديل فيها شوية

http://i.imgur.com/kVUVj.jpg

شوية معلومات سريعة:
العربية بتزل هنا اوبشن واحد بس، اعتقد اللي هوا الميد اوبشن والله اعلم مش متأكد اوي
عليها ضمان مدى الحياه
عليها 3 سنين خدمة roadside assistance تشمل حتى حالات انتهاء البنزين عليك
عملولنا حماية ضد الصدأ
صيانتها كل 5000 هتكلف في حدود 300 جنيه، والصيانات الكبيرة ممكن توصل 900 او 1000 بالكتير

مبدأيا كده انطباعي عن العربية في أول يوم:
- مقدرش احدد حاجة معينة في العربية ولكنها بشكل عام بتديك احساس رهيب بالفخامة اول ما تقعد فيها، احب اقول اني محستش بالاحساس ده لما عملت تجربة السياقة قبل ما نشتري العربية
- طبعا العربية فيها كل الكماليات اللي ممكن تتخيلها، ما عدا خرائط الملاحة. دي حاجة مش فارقة معانا اوي عشان اسخدامها هايبقى داخل البلد هنا بس اللي احنا حافظنها زي اسامينا. بس اللي مميز جدا جدا فيها (ومعرفش مدى انتشار الموضوع ده في العربيات التانية) انها لما بتتوصل بالبلوتوث مع التلفون، اي حاجة تشتغل على التلفون تشغل على سماعات العربية، مش بس المكالمات.
- النظام الصوتي بتاعها رهييييب رهيييب بكل معنى الكلمة، يتلخص في كلمتين، فرح متنقل.

كسلبيات مفيش كتير، او بمعنى اصح انا كنت متوقعهم من ساعة التيست درايف:
- العربية واخدة الطابع الرياضي، واطية على الارض، ناشفة على المطبات. ولكن اعتقد مع التعود مش هاتبقى مشكلة خالص
- الماتور في عربيتنا مقدرش احكم عليه لسة في اول 1000 كم، بس في التيست درايف كان واضح جدا اللي الناس بتتكلم عليه في النت انو قليل على العربية، وانو العربية بتديك احساس والماتور لما تشد عليه بيموتلك الاحساس ده خالص. بس احب برضو اقول انو صوتو وانتا واقف واطي بطريقة مش طبيعية، ولا وانتا جوه العربية سامعو ولا وانتا بره العربية سامعو
- لو عاوز تركب 5 فيها لازم تجيب مخدة للي هايعد في الوسط :biggrin:

طبعا انا شايف ان القسم هنا نايم شوية، وده يمكن بسبب انتشار العربية الضعيف. بس أنا متأكد ان في ناس كتير على الاقل بتدور على معلومات عن العربية دي، فقولت اخلي الموضوع ده مفتوح لأي حد عاوز اي اجابة تكون من المالك مباشرةً. فأي سؤال انا تحت امركم وهرد عليكم في أقرب وقت ممكن ان شاء الله.

وألف شكر على قرايتكم للموضوع :)

سبحان ربك رب العزة عما يصفون
وسلام على المرسلين
والحمدلله رب العالمين