مصر موتورز مجتمع السيارات - تجربتي الاولي في سوق السيارات

السلام عليكم

بصراحة مش عارفة ابدأ منين

السوق انا اول ما دخلتو فضلت اضحك مكنتش متخيلة ان العربيات بالكثرة دي وان كل الناس دي جاية عشان تبيع

واول حاجة اتفاجئت بيهها الاسعار اقل كتير من كونتكت كار

فقلت لنفسي اكيد الناس دي فعلا جاية تبيع

اول عربية شفناها كانت لانسر 2008 ودي كانت 67 ملحوظة كل اللي هاقولوا اوتوماتيك لاني مبعرفش اسوق مانيوال فكنت بتفرج بس علي اوتوماتيك

والميتسوبيشي لانسر سعرها كان بيتراوح بين 65 الي 70 والعربية موديلات من 2007 الي 2009
واتفرجت علي التيجو بصراحة عربية حلوة اوي بس سعرها اكبر من امكانياتي 80 الف وثابتين عليها يزود 2 او ثلاتة
والتيريوس بردة 2008 نفس الحكاية

نيجي بقي للياريس والنيو اكسنت

العربيتين دول اللي كنت بفاضل بينهم في السوق
لان اسعارهم وموديلاتهم قريبة جدا من الفلوس اللي معايا والامكانيات اللي فدماغي

اتفرجت علي حوالي 7 عربيات ياريس وزييههم نيو اكسنت

الياريس اول عربية كانت مرور اسماعيلية والعربية نظيفة اوي من برة وجوة او فابريقة زي مابيقولوا بس رشة كبوت او شنطة حاجة كدة والاكرة اللي في الباب الخلفي الشمال كانت بتعلق وكمان مفتاح الشنطة وكان طالب فيها 68 مو 2008 وعملا حوالي 65 الف كيلو بس العدادات ناس كتير قالت انها من الممكن يتلعب فيها فمبقتش اهتم
ودة قال لو حصل نصيب هنزل حوالي الف وفيها ورقة واحدة
فانا فرحت وقلت بسسسسسسسسسسسس هيا دي فالي معايا قالولي متستعجليش هتقابلي كتييير جوة :HAPPY_~211:

المهم طبعا مش هينفع اجكس اللي حصل معانا في كل عربية انا هقولقوا علي المهم بس

النيو اكسنت لاقيت الناس ماسكة في السبعيناااات لا وكمان بيزودوا ابتداءمن 2008 واللي 2010 صاحبها بيبقي هاين علية يبيعها زي ماجبها حاجة تفقع المرارة
فبعد ماتفرجت علي صالون الاكسنت في كذا عربية وشنطتها وانا اصلا عارفة انها 1600 وقطع غيارها والقصص دي ومع ارتفاع سعرها المستعمل صرفت نظر عنها ومبقتش اتفرج عليها غير تخاطيف كدة من باب الفضول في معرفة الاسعار

وركزت علي الياريس
لكذا سبب اولهم انها قريبة من الفلوس اللي معايا وفعلا اغلب الياريس اللي في السوق جديد وفابريكة وشكلها افخم وارقي من النيو اكسنت وياباني وصالونها افخم واشيك من النيو اكسنت وسعرها اقل بس هيا اللي سوقها شوية مش ماشي في الريسيل ودة ميهمنيش اني اخسر فيها 6 او سبع الاف لمي ازهق منها وحبيت اغير

وبعد العربية بتاعت مرور اسماعيلية اتفرجت علي كام وااحدة اللي رشة كلها برة واللي فيها خبطة مأثرة علي الأايم واللي فيها حجات اللي معايا قالوا انها مش تمام الي اخرة

الي ان لاقينا راجل كدة قاعد جوة عربية ياريس هادي راسي فاتفرجنا ع العربية وهوا جواها متحركش فال الي معايا قالي العربية دي حلوة

فاضررنا اسفين ان احنا نزعج الرجل الغامض اللي جوة ونسألة عن تفاصيلها

العربية مو 2007 عاملة 93 الف كيلو رشة حتت بسيطة من برةاربعة ازاز كهرباء
اتوماتيك فابريكة اير باج abs طاسات عادية
فالراجل اول كلامة كان 71 الف وشوية وقال 70 وبعدها قال مقدرش احكم فيها لانها مش بتاعتي دي بتاعت عديلي فاللي معايا قالي دة تاجر وكان معاة عربية تانية المهم كلمنا صاحبها في التليفون وبعد مفاوضات وانا في كرارة نفسي اقتنعت بيها كاول عربية ليا سعرها معقول وشيك يكفي اني مش هتورط في اقساط مع الزيرو

الراجل قال 69الف واللي معايا ماسك في 65 فراح الراجل الوسيط او التاجر قال انا هقول كلمتي وقال 68 ومحدش يكسفني

فقلتلو انا بقي ماشي بس اخدها بنزينة واكشف عليها ولو لاقيتها تمام زي مابتقولوا يبقي اتفقنا علي 68

وفعلا الراجل جة اللي معاة المفتاح وقالنا انو جايبها يتاجر فيها وشكلة محترم براحة
ومعترضش اننا نرفعها في بنزينة
بس العربية فيها اربع ورقات او توكيلات وانتم هنا حظرتوني من التوكيلات
بس اغلب العربيات اللي فالسوق فيها مش اقل من توكيل

فالي معايا قالي احنا هنسجلك علي طول ونعمل رخصة العربية باسمك فمش مشكلة

المهم رحنا بنزينة موبيل في مساكن شيراتونالنظرة الاولي للعربية قالوا انها فابريكة وتمام وعلي بركة الله وراحوا رافعينها والراجل واقف علي جمب في منتهي الهدوء
وفجأة قالوا العربية مخبزطة باين في السدر او القنطرة او المقص او الشمعدان بصراحة مفهمتش حاجة
الراجل قال وحلف انة مايعرف

ومشي ....بالعربية

فقلتلهم يجماعة الحكاية دي تقصر في اداء العربية علي الطريق او تتسبب في قلبها او انها تعطل يعني عيب خطير ولا ممكن التغاطي عنة او اصلاحة فرد عليا قريبي وقالي السدر الااصلي ب 1200 وممكن منغيرهوش مش هيتعبك في حاجة
قلتلهم خلاص نكلمة وننزل في تمن العربية

وفعلا كلمناة ونزلنا الف جنية اصبحت ب 67الف

ورحنا اشترينا عقد ابتدائي ودفعت عربون 500ج
وقالي بكرة علي النهاردة هجيبلك شهادة المخالفات ولو جاهزة نروح نسجل في الشهر العقاري

قولولي بأة رأيكم واستنتاجتكم وتحليلكم لكل حاجة
العربية كدة تمام وتستاهل ومسألة التوكيلات أئمن فيها نفسي ازاي
احنا معادنا النهاردة او بكرة بالكتير