مصر موتورز مجتمع السيارات

مصر موتورز مجتمع السيارات (https://www.masrmotors.com/vb/index.php)

- استراحة مصر موتورز (https://www.masrmotors.com/vb/forumdisplay.php?f=9)

- - أدب الرحلات (https://www.masrmotors.com/vb/showthread.php?t=19177)

أدب الرحلات

فى الحقيقة هذا الموضوع مختلف تماما عن آداب السفر فالاخير تحدث عما يجب فعله قبل وبعد واثناء السفر وهذا ماتحدث فيه اخى العزيز ابو نورا باستفاضة فى موضوع مميز له لكن المقصود هنا الكتابات الادبية التى تتحدث عن الرحلات الخاصة بكاتبها وماحدث له من أمور ومشكلات وتجارب حياتيه مختلفة وهو موضوع اردت ان افيدكم فيه بصورة أعم وأشمل حيث ساتحدث اولا عن هذا الفرع من الادب ثم اورد لكم اشهر كتابه واخيرا احداث حقيقيه حدثت معى وكل من حدثت معه احداث طريفة او مؤلمة نرجو اضافتها لكى نستفيد جميعا
أولا * نشط هذا الأدب مع المستكشفين والجغرافيين لانهم اهتمو بتسجيل كل ماتقع عليه اعينهم من مشاهد واحداث ثم بدا يتجه هذا الفرع الى الخيال مثل السندباد ورسالة الغفران للمعرى وملحمة الأوديسا الاغريقية وجلجامش البابليه وابو زيد الهلالى المصرية
ثانيا *أشهر قصص ادب الرحلات طبعا السندباد البحرى ومائة الف فرسخ تحت الماء ل جول فيرن و حول العالم فى 200 يوم لانيس منصور
ثالثا * اشهر الادباء فى هذا المجال ابن بطوطة وجول فيرن والاندلسى وارنست هيمنجواى ورفاعة الطهطاوى ومارك توين وانيس منصور
وأنا شخصيا قرأت كتاب حول العالم فى 200 يوم وهو كتاب جميل وشيق لانيس منصور وان كانت البلاد التى يصفها قد تغيرت تماما وتقريبا لانه كتب هذا الكتاب فى منتصف الستينات من القرن الماضى وتم منحه جائزة الدولة وقتها عن هذا الكتاب وايضا فى هذه الايام يكتب الكاتب صلاح منتصر فى اهرام الجمعه فى ملحق السيارات عن رحلته الى اخر نقطة فى الارض وهى القطب الشمالى وهو نموذج لادب الرحلات ايضا

رابعا *** مواقف وطرائف حدثت لكاتب هذه السطور
1*** كنت راكب سيارة مع احد اصدقائى وكنا فى زيارة لعائلتنا فى الصعيد وفى العودة وبعد 3 ساعات من القيادة وجدته ينام فقلت له تعالى نريح شوية قال لا لما نوصل بنى سويف ثم فوجئت به ركن دماغه على الدركسيون ونااااااااام وربنا الهمنى انى اضربه على دماغه فقام بسرعة وكسر الدركسيون وفرمل ووقف وكنا هنقع كلنا فى ترعة الابراهيمية وهى فرع كبير من النيل يجرى بجوار القطار من اسيوط حتى العياط وفوجئت بيه بيقول لى انت هتنام وتودينا فى داهية والا ايه
2*** مرة راكبين العربية وتهنا ولقينا نفسنا فى بلد اسمها سمسطا تبع بنى سويف فسالنا كمين مرور هناك وسالنا المخبرين الطريق الزراعى منين على اسيوط فواحد قال يمين والتانى قال شمال والتالت قال قدام ففضلنا واقفين مكاننا فواحد منهم قال لنا هو انتو مفهمتوش والا ايه تعليم ايه اللى بتتعلموه بس
3***يوم الشبورة التقيلة من حوالى 3 اسابيع جاى من اسكندريه الى القاهرة بالطريق الزراعى وركبت معايا ناس كتير لان مكانش فى مواصلات خالص يومها وكان معايا تشكيلة كبيرة ركبت لكن من الذ اللى ركبو ظابط مباحث ركب معايا وعرفنى بنفسه وبضرب عينى فى المرايه لقيت اللى راكبين ورا ماتو ف جلدهم من الرعب وفهمت ان عليهم احكام او هاربين من حاجة وركب معايا امين شرطة قال انا مش لاقى بلدنا فشخط فيه ظابط المباحث وقال انت مش عارف بلدكو فقال خلاص لقيتها ياباشا وكانت كوم حمادة
4***مرة جاى من اسكندريه فى رمضان ومستعجل عايز اتسحر فى القاهرة فى البيت وخارج من اسكندرية 2 وتلت بالليل وسايق بسرعة 185 وفوجئت بعربية فيرنا بعد معديت جنبها جريت ورايا ولاننا مش فى سباق وسعت لهم وعدو من جنبى زى الصاروخ يعنى سرعة فوق ال200 فهديت السرعة لان الفيرنا متتحملش اكتر من 120 وفعلا مشى حوالى 200 متر وانقلب فوقفت ولما لقيتهم احياء خرجتهم من العربية انا وواحد تانى وكانو 3 شباب ولما جبتلهم زجاجة ميه من عندى بصلى اللى كان بيسوق واخد منى زجاجة المياة ورماها وفهمت ان هو فاهم انى السبب فطلبتله الاسعاف واستنيت لحد م جات وسبته ومشيت
5***** مرة راكب القطار واخد المسافة من القاهرة لبنها فى ساعتين والمفروض نص ساعة فلما اتاخر قررت انزل ولقيته هدى السرعة جدا وكاد ان يقف فجيت انزل فراش العربية منعنى فجريت جوه القطار لحد م لقيت باب مفتوح لكن القطار كان فتح السرعة جدا ولسه بفكر لقيت واحد بيقول لى انت هتقف كده كتير وراح زاققنى (اه والله زقنى) والقطار ماشى ووقعت منه وربنا ستر نزلت سليم
6*** مرة ركبت قطار رقم 2 وهو قطار عادى يقوم من الاسكندرية الساعة 3 الفجر ولاحظت ملحوظة غريبة القطار كله زحمة جدا والناس واقفة واللى قاعد على الارض والعربية الاخيرة فاضية فيها كام واحد ميجوش 20 او 25 واحد واستغربت ليه سايبين العربية دى فاضية لكن بعد خروجه من سيدى جابر فهمت اتارى فى عصابة نشالين بيركبو فيها وبيشربو حشيش وبانجو وينزلو دمنهور المهم وانا بتفرج عليهم استغربو وسالونى اول مرة تشوف الحشيش فقلت لهم فعلا والبانجو ؟ قلت والبانجو فاستغربو وبصولى على انى من كوكب تانى فعزمونى ولما فهمتهم انى مبشربش الكلام ده ادونى سيجارة عادية ولما قلت مبدخنش فقالو حاجة غريبة ياباشا انت عايش من غير كيف خالص ؟؟؟ كده مينفعش ياباشا راس بلا كيف عايزة ضرب السيف وضحكت وسكتت !!!!! النكتة بقى انهم كانو عايزين يتعرفو بيا وقررو انهم ميقلبوش الركاب اللى فى العربيه علشان خاطرى
7*** و دى اطرف حكاية هختم بيها كلامى سافرت بلد تبع المنيا من 11 سنة ولما سالت القرية الفلانيه اروح لها ازاى وكان التوك توك لسه مجاش مصر فقالو روح الموقف وسالت على الموقف وفوجئت بوسيلة المواصلات هيا الحمير لامؤاخذة ولما قلت للراجل عايز اروح القرية الفلانيه شاور على حمار معين وقال اللى هناك ده هيوديك وطلب الاجرة فاديتهاله وقلت افرض اخدت الحمار ومشيت قال مش هتعرف قلت افرض تاه قال مش هيتوه قلت طيب هو هيروح ازاى وانا مش عارف البلد اصلا فقال بضيق هوعارف السكة ساعة ميقف يبقى انت وصلت وبطل اسئلة بقى وفعلا عند البلد وقف حاولت امشيه خطوة كمان رفض ضربته ضربه خفيفة برجلى ف بطنه فقلبنى على الارض ومشى رجع تانى لصاحبه
طبعا الحكايات كتيرة لان دول 14 سنة سفر لكل انحاء مصر بجميع انواع المواصلات بما فيهم سيارتى لكن لكى لا اطيل عليكم اللى عنده حكاية او طرفة او قصه حقيقيه حصلتله اثناء السفر ممكن يضيفها

رد: أدب الرحلات

الله يسامحك يا خالد باشا خليتنى اضحك لحد ما صحيت العيال ptmnlo123per112
هخش انيمهم بقى واجى اكمل ptmnlo123per1106

رد: أدب الرحلات

طيب بس اوعى تنام انت كمان ومتكملش الموضوع ولو عندك اضافة ضيفها وانا بقى هكمل باقى الحكايات بكرة ونبقى نطبعها فى كتاب نسميه مغامرات رحالة من الزيتون

رد: أدب الرحلات

روعه يا خالد والله جميلة جدا تسلم ايدك

رد: أدب الرحلات

نسمى باسم الله ونكمل مواقف وطرائف فى السفر والرحلات
1- فى يوم ماشى فى مدينة العلمين وكان الاتوبيس اتعطل بينا هناك وقررت استكشف المكان لحد ميصلحو الاتوبيس وفوجئت وانا بتمشى بأيه بكلب بس غريب شوية راسة كبيرة وودانه طويلة زيادة عن اللازم وبيبيصلى بغلاسة كده فقلت له هش امشى وجبت طوبة وضربته فبص لى ومشى لكن نظراته كانت غريبة ورجعت بحكي الحكاية لسواق الاتوبيس فقال ده ديب (ذئب) بس حظك انه مكانش جعان وعلشان كده معبركش
2-مرة حجزت تذكرة درجة اولى فى القطار و جاى من اسوان فكان رقمها غريب كان رقم الكرسى 1 والعربية 1 فبقول لصراف التذاكر كرسى 1 عربية 1 طيب مش كنت حجزتها جوه الجرار جنب السواق وخلاص فقال طيب لما تسافر هتعرف قيمة التذكرة دى المهم فعلا جه الكمسارى لقيته راح منحنى بأدب شديد جدا وقال اهلا ياباشا ازى صحتك ممكن بعد أذنك التذكرة فأنا استعجبت لانى معرفوش فبقول له حضرتك تعرفنى فقال رد غريب جدا ياباشا انت زى الشمس نار على علم وهل يخفى القمر فانا جانى ذهول مين ده ؟؟؟؟!!!المهم كل شوية ينط لى شاى يابا شا وانا ارد / اشكرك قهوة ياباشا وانا طبعا ( اشكرك ) والله لتشرب حاجة ياسيدى شكرا لايمكن وأصر شربت بعد الحاح راح جاب الشاى وسابنى ومشى المهم نزل الاقصر وجه غيره وعمل نفس التصرفات لحد اسيوط وجه غيره هيبتدى نفس التصرفات فأنا بصراحة اتعفرتت وافتكرت نفسى مشهور بجد فهزرت مع الكمسارى اللى ركب من اسيوط قلت له بقول لك ايه لو انت فعلا ليك فى السياسة ومتابع نشرات الاخبار وقناة الجزيرة كويس تقدر تقول انا مين فرد بذكاء يحسد عليه زى يونس شلبى فى مدرسة المشاغبين وقال / وهى دى عايزة مفهومية يااستاذ طبعا عضو مجلس شعب فانا اتحرق دمى اكتر / فانا قلت وسيادتك شفتنى فى جلسات المجلس فى التلفزيون ؟؟؟ فقال الكدب خيبة ياباشا لكن الكرسى ده كرسى اعضاء مجلس الشعب او اعضاء النيابة العامة فلما سعادتك جبت سيرة السياسة قلت تبقى وزير او عضو مجلس بس انت صغيرع الوزارة فقلت تبقى عضو المجلس فقلتله طيب عضو المجلس الموقر من ساعة م طلع القطار من اسوان لحد هنا يعنى من 7 ساعات فاتو مش عارف ينام بسبب شهرته ممكن انام ال6 ساعات اللى جايين لحد مصر واشكرك مقدما على اى واجب كنت ناوى تعمله معايا فقال ياباشا انت تؤمر طيب شكرا ياسيدى وانا هنام ولسه هنام لقيته بيقول لى معلش ياباشا ممكن كارت من حضرتك فانا بكل غيظ قلت نسيتهم فى مصر وانا نازل من القطار فى القاهرة هديك تليفونى الخصوصى قال ماشى ياباشا وادانى ضهره من هنا وظبطت المنبه بحيث اصحى قبل الجيزة ونزلت الجيزة بدل القاهرة واخدت المترو وروحت وامرى لله ( الشهرة وحشة برضه والله المشاهير صعبو عليا )
3- مرة راكبين قطار عادى ومكسر وحالته بالبلا المهم بسبب الزحام الرهيب قامت خناقة ولقيت واحد من ال2 اللى بيتخانقو راح قايل للى بيتخانق معاه وهو منفوخ اوى انت متعرفش انا مين فانا اتفرست قلتله هتكون مين يعنى واحد راكب قطار عادى مكسر هتبقى منصبك ايه يعنى وزير النقل ياخى ؟ وضحكنا وانتهت الخناقة
4- مرة طلع واحد داخل القطار بيبيع فيران بلاستيك سودا وكبيرة وشكلها وحش بقول له ايه ده حد يبيع فيرا ن فقال ياباشا لو ركبت بكرة نفس القطار هتلاقينى ببيع قطط للى اشترو منى الفيران
5- مرة كنت فى الدراسة ومسافر اسكندرية وقابلت راجل ظريف بسأله طريق اسكندرية الصحراوى منين فقال بكل ثقة تدخل يمين وبعدين شمال وبعدين على طول والا اقوللك انا هركب معاك لحد المريوطية وتكمل انت فقلتله ماشى المهم قعد يحكى حكاية طويــــــــــــــــــــــ ـــــــــــــــــــــــــ ـــــــــــــــلة على مخلصها كنت نسيت اولها المهم نزل المريوطيه وقال الطريق الصحراوى كده على طول بس تدخل يمين حتة صغيرة والا اقوللك قلت له قول فقال ممكن اجى معاك اسكندرية فضحكت قلتله تعالى واحنا فى السكة خلانى ندمت انى ركبته فضل يتكلم وجاب قصة حياته من وهو طفل لحد مخلف 13 عيل وجانى صداع وكانه بيحكى قصة حياة سعد زغلول مثلا وبعدين نزل اسكندرية عند محطة القطار بيقوللى انت رايح فين قلتله المنشية فقال انت عارفها فبصيت له وضحكت وقلتله اه عارفها سلام عليكم وجريت قبل ميركب تانى
كفاية كده النهاردة وبكرة نكمل