ما ضرر ان تكون العربية رشة دواخل او خوارج او كانت عامله حادثة فى المستعمل
 

السلام عليكم
طبعا انا عاوز اعرف ايه الضرر اللى بيلحق بالسيارة المستعملة نتيجة الحوادث
و لماذا يجب ان اخاف من الرشة ؟؟يعنى ايه الحجات اللى اخلى بالى منها و انا بشترى مستعمل (و ليه الحجات دى تخوف؟)

رد: ما ضرر ان تكون العربية رشة دواخل او خوارج او كانت عامله حادثة فى المستعمل
 

انا بصراحه مش عارف
ما هى دى ليها سعر و دى ليها سعر
اللى اعتقده ان الخطر فى ان ممكن يدحك عليك فيها ولا حاجه
لكن انا مش شايف فيها حاجه لما تشترى عربيه عامله حادثه بس امكانياتها عاليه زى باور تكييف و حاجات حديثه
و اهو احسن ما تحط فلوسك فى عربيه تانيه تطلع عينك و مش تريحك

دى نظريه و للعلم انا مش خبره فى العربيات دا مجرد اعتقااااااد مش اكتر

رد: ما ضرر ان تكون العربية رشة دواخل او خوارج او كانت عامله حادثة فى المستعمل
 

يا جماعة الموضوع ده الأعضاء تكلموا فيها أكثر من مرة، وهي مسألة معروفة:
العربية إلا رشة دواخل عربية تحتوي على مخاطر كثيرة، وقبل ما نتكلم عنها لازم نعرف أولا إن الصاج أهم شيء في أي عربية، أهم من الموتور والعفشة والتكييف والباور، لأن صاج العربية هو إلا عليه الحمل، هو الأساس إلا شايل كل حاجة في العربية، يا فرحتي إن يبقى عندك موتور كويس بس قواعده راكبه على شاسيه تعبان.
العربية إلا رشة دواخل تعني إنها عملت حادثة شديدة عصرت وطبقت الصاج، وده معناه إن الصاج أصبح ضعيفا جدا، معرضا للصدأ والتآكل، ناهيك عن أن هناك احتمالا كبيرا أنه لم يعد بنفس الدقة التي كان عليها، وبالتالي فالسيارة تكون معرضة لفقد الاتزان على الطريق في بعض الأحيان، وتكون معرضة للتلف السريع للكبان إذا كان الحوض قد تأثر بهذه الحادثة.
يعني ببساطة حضرتك بيبقى عندك عمارة ملعوب في أساساتها، فمهما كانت جميلة والدهان الخارجي بتاعها جميل ده لا يغني.
بس طبعا ده لا يغني إنك ممكن تشتري عربية رشة دواخل على سبيل إنك تكون بتتعلم مثلا وعايز تجيب حاجة رخيصة تتعلم وتبهدل فيها بدل ما تبوظ حاجة سليمة، لأن العربية دي بتبقى رخيصة كثير عن العربيات الفبريقة، فممكن لو حضرتك عايز تتعلم تجيب واحدة رشة دواخل -لكن أهم حاجة ما ينضحكش عليك في السعر علشان لما تيجي تبيع ما تخسرش كثير- تجيب العربية تتعلم عليها وبعدين تبيعها بخسارة قليلة وتشتري إلا إنت عايزه بعد كدة.
أرجو أن أكون قدمت لك شيء من الإفادة، وشكرا ليك

رد: ما ضرر ان تكون العربية رشة دواخل او خوارج او كانت عامله حادثة فى المستعمل
 

متشتريش عربية رشة دواخل نهائى...دى اكيد عاملة حادثة و مقلوبة..بالنسبة للرش الخارجى فهو يعيب العربية اذا كانت موديل جديد و تمنها يقل عن الفبريكة..

رد: ما ضرر ان تكون العربية رشة دواخل او خوارج او كانت عامله حادثة فى المستعمل
 

من الاخر يا زعيم لو عايز تجيب لنفسك وجع الدماغ وتلاقي نفسك مش عارف تبيع العربية اللي اشترتها هات اللي رشه دواخل

ريح دماغك وابعد عن اللي رشه دواخل نهائيا وخلي بالك علشان في عربيات بتبقي رشه دواخل ومش اي حد بيقدر يكتشفها بتبقي رشه بفن ومهاره