مصر موتورز مجتمع السيارات - تقيمكم لسيارة لادا 2105 موديل 1981

بسم الله الرحمن الرحيم
اولا كل شىء نصيب وربنا يكرمك بعربية كويسة
العربية اللى حضرتك بتقول عليها دى رنجها حولين الـ 16 الف
الـ لادا وبحكم انها دفع خلفى لازم تطمن على الموتور والفتيس والكارونا
تشغل العربية حوالى نص ساعة وهى واقفة وتفضل تتفرج عليها بس الموتور يكون داير عشان الزيت يسخن والموتور يقول اللى جواة وبعدين تكل على الله واطلع جربها فى شارع فاضى واسمع صوت المكنة وصوت الفتيس وطبعا هاتحس بصوت الكارونا
الموتور لازم يكون صوتة طبيعى مفهوش خبط ولا ترزيع ولا اى صوت غريب والكارونا لو فيها ونة هتبان اول ما تسيب رجلك من على البنزين وتمور الفتيس
بعدها تقف وتسمع صوت المكنة وتحدد صوتها لان كل مكنة ليها صوت زى الانسان وتدوس دبرياج وحاول تحدد لو فى فرق فى الصوت قبل وبعد دوسة الدبرياج وكدة يبقى انت بتختبر طقم الدبرياج
طبعا موضوع الصاج لازم تتاكد منة قوايم وسقف وحوض وشنطة وعتب يبقى على الاقل مفهمش بارومة والحوض ما يكنشش راشش انما الشنطة ممكن التغاضى عنها
العفشة انا اعتقد انها مش مؤثرة اوى لانى واثق ان فيها حاجات عاوزة تتغير الـ لادا كدة بتحب تغير عفشة كتير
اختبر العدادات والاضاءة والفرامل
شوف حالة الصالون من جوة كام فى المية
الابواب امسكها وهى مفتوحة وحاول تحركها فوق وتحت وخصوصا الابواب الامامية لو فيها مشوار كبير يبقى بلاش من العربية بجد لان كدة الحوض بالربع الامامى فى مشاكل
وما تنساش صلاة الاستخارة